YEREMIA 48 - KITAB NU TUMPU ALLA LELE MA'IMAI'

Apaa na jadi ilipu' nu Moab

¹ Sumo uuka na anu pinoto'i nu Tumpu Anu Mahakuasa, Tumpu Allah Israel, apaa na anu jadi saidi' mae hi lipu' nu Moab, “Silakamo na mian anu jojoong i Nebo kota'nyo na'idekmo! Kiryataim pinatundu'mo, ka' benteng anu mahoson aijo' ihansunanmo, sahingga mian anu jojoong kiijo' na ambangmo;

² Moab madi'mo tinalasanggo. Sampobali' nompatundu'mo Hesybon ka' ikiijo' mae aha binala tanga'mo da ohopu'imo ingko-ingkot na bansa Moab. Ingko-ingkot na potatae ikota' Madmen otewa'mo, kalana kota' aijo' nu tumbuhimo nu suludadu.

³ Potombihing mae! Mian anu jojoong i Horonaim sola'mo noloboo', ‘Silakamo! Silakamo!’

⁴ Moab ihansunmo! Kihis nu to ana-anak nu aha kinahongoanmo toka-toka i Zoar.

⁵ Potombihing na haang ijalan mindako mamba i Luhit, ka' tando' kiijo' ijalan pintudunan mamba i Horonaim.

⁶ Koonyo nu aha, ‘Lia-lia'! Posalamat na nyawa nu beleyum! Popadeka'mo susumo keledai anu ma'ela' itampat anu mateges!’

⁷ O, Moab! Beleyum montakabunakon kabaanian tiba kakaya'an nu beleyum. Panyo uuka aiya beleyum opatundu'mo. Kamos, pilogot nu beleyum tiba to ima-imam nu beleyum ka' to mia-mian anu kopangkatnyo ikiijo' oboamo itampat pompojoongan.

⁸ Iwi-iwi' na kota' hansunmo, madi'mo daagi' ko sa'angu' na madi' hansun. Bangka'nyo tiba hatanyo ingko-ingkot hansunmo. Aku, Tumpu notataemo.

⁹ Pokonaimo paliasa' na kota' Moab, kalana madi'mo daagi' pin na lipu' aijo' hansunmo ingko-ingkot. Sinin na kota'nyo singkapmo mohobo' ka' madi'mo daagi' kosamian na jojoong ikiijo'.”

¹⁰ Monta'upmo kutuk na mian anu madi' montuluti palentah nu Tumpu totu-totu'u. Monta'upmo kutuk na ia anu madi' mongkeat bajak ka' mompatei.

Kota-kota' nu Moab ohansunimo

¹¹ Tumpu notatae, “Salatanmo pe'e naipuan mae na kantumuu' nu Moab madi' ko anu nompoposia. Ma'isa toho' ia binoa itampat pinompojoongan. Ia sumomo ahi' anggur anu pinotendamo ka' madi' toho' ilambe'akon itampat nu anggur sangga'at. Anggurnyo daagi' ahi' singongohan ka' ma'ima'.

¹² Panyo saidi' mae tokaje ahi' na tempo'nyo Ku palentahmo da Moab olambe'akonmo susumo anggur ka' tampat pinongisian opolongkangmo ka' opahamposo'akonmo.

¹³ Moab mososonmo hi Kamos te pilogot nu aha, sumomo mian nu Israel nososonmo hi Babel anu nutakabunakon nu aha aijo'.

¹⁴ Mosia na to momo'ane nu aha Moab daagi' motatae, ‘Kami talenga', suludadu anu baani' anu inguji'mo i uno nu pahampatean?’

¹⁵ Moab tiba iwi-iwi' na kota'nyo ihansunanmo ka' to oli-olitaunyo toto ima-ima' hondo pinateanmo. Aku notataemo, Aku tomundo', Tumpu Anu Mahakuasa.

¹⁶ Balaa' anu montokai mae Moab malia'mo mae hondo toka, madi'mo daagi' pin ia hansunmo.

¹⁷ O, belemiu negara-negara anu mompaha ohani Moab anu nonsumbu'mo kamajuannyo, haangimo na ia! Taloakon, ‘Moab madi'mo daagi' balakuasa, kaholomatan tiba kahosonannyo imadi'anmo!’

¹⁸ O, mian anu jojoong i Dibon, pintatau'mo mae atina' itampat nu beleyum anu oholomati hondo; ka' suhangmo itano' ka' i abu'. Kalana anu mongidei Moab lipu' nu beleyum atina' tinokamo mae, ka' mohansunimo iwi-iwi' na benteng nu beleyum.

¹⁹ Belemiu anu jojoong i Aroer, tinjomo isonibi nu jalan ka' palahatikanmo! Pokilawa hi aha anu nopalaimo ka' madi'mo pinatean, ‘Apaa na anu jinadimo?’

²⁰ Nu taamije nu aha, ‘Moab pinatundu'mo ka' na ambangmo, kalana aijo' haangimo na ia. Bebakonmo itutuus Kaunyo nu Amon taalu' Moab ihansunmo.’ ”

²¹ “Hukuman inabu'akonmo ikota-kota' anu idaerah aita'mae ibungkutnyo: aijo'mo Holon, Yahas, Mefaat,

²² Dibon, Nebo, Bet-Diblataim,

²³ Kiryataim, Bet-Gamul, Bet-Meon,

²⁴ Keriot, tiba Bozra. Iwi-iwi' na kota' nu Moab, majo'on tiba anu ohani ihukumo.

²⁵ Kahosonan nu Moab pinato'anmo ka' mule' kakuasa'annyo ihansunanmo Aku, Tumpu, notataemo.”

Moab madi'mo oholomati

²⁶ Tumpu notatae, “Popalangumo na Moab kalana ia kino bubunmo mae hi beleng-Ku Ia mongkaliade'imo anu ilua'nyomo ka' nu kokojoimo nu mian.

²⁷ Te misa' naipuan mae mian nu Israel kinokojoanmo ahi' nu aha mian nu Moab ka' lewa'mo pinobau-bau au'aitu aha kinadapatanmo hingga-hinggat iba aha anu sola' montomang?

²⁸ Belemiu anu jojoong i Moab, pala'imo na kota' nu belemiu iwi-iwi' ka' jojoongmo ipuge'nyo nu batu susumo tomonsi' malapati' anu mombaumo petanyo itungebe nu keles.

²⁹ Belemiu kinobubuunmo hondo! Ihongong-Kumo talalomo binulon, talalomo montige-tige, tinakabunmo, ka' pinonga'mo na belemiu!

³⁰ Aku, Tumpu, nonsumbu'mo taalu' buulon na beleyum. Potatae nu beleyum madi' ko isi-isinyo ka' palabuatan nu beleyum madi' ko alati'nyo apa-apaa.

³¹ Mokonyo aijo' Ku haangimo hoso-hoson na belemiu iwi-iwi' ka' suele kona hi aha mian nu Kir-Heres, puso nu kota' nu belemiu.

³² Aku lebe mule' ahi' mohangi mian anu jojoong i Sibma nu lingkudui na pohangingku Yaezer. Kota' Sibma sumomo ahi' sosu'anon anggur anu to panga-panga'nyo nolelemo toka-toka isantoa nu Ambai Mate, kojo'onnyo tinokamo i Yaezer. Panyo uuka aiya bua'nyo iwi-iwi' anu itempo' nu posinaa tiba bua' nu anggurnyo ingideanmo.

³³ Taligala nu lame' imadi'anmo ilipu' nu Moab anu ma'omuk hondo aijo'. Ku pobelentimo na anggur mo ili lengkat mae ipakakas pompao'an anggur; madi'mo daagi' ko mian anu mombau anggur ka' montaligalaimo kalana lame'mo.

³⁴ Mian anu kiijo' i Hesybon tiba anu i Eleale ihumangmo ka' haangnyo kinahongoanmo toka-toka i Yahas ka' kinahongoanmo suele hi aha mian nu Zoar toka-toka i Horonaim tiba Eglat-Selisia. Aha ihumangmo kalana uee i panga' nu Kaunyo Nimrim suele ahi' noti'imo.

³⁵ Ku pobelentimo na aha mian nu Moab mompapu koloban itampat-tampat ponsomban nu aha ka' madi'mo mompalasombahkon koloban hi to pilo-pilogot nu aha. Aku, Tumpu notataemo.

³⁶ Iwi-iwi' na kakaya'an nu Kir-Heres tiba songko-songko na Moab imadi'anmo. Aku molibos hondo na montoa kantumuu'an nu aha aijo'; Aku sumomo ahi' mian anu montiop lagu anu otiop de ko anumo silaka isa'angu'na puloit.

³⁷ Aha iwi-iwi' nongkiismo ubak tiba jangkut, nombelaimo botokon ka' nompusokmo hude kalung salaku tanda sinusa'mo.

³⁸ Aita' mae isundap nu laigan iwi-iwi' ka' isongko-songko na tanah lapang me saja haang na ohongo. Kalana Moab pinoso'-Kumo susumo gumbang anu madi'mo oka'ima'i.

³⁹ Moab ihansunmo nohintutu! Na ambangmo hondo na Moab! Ia ihumangmo kalana pinopo ambangmo ka' sola'mo kinokojoan nu to bansa-bansa anu aitu mae mompaha ohani ia. Aku, Tumpu, notataemo.”

Madi'mo daagi' kojalan sangga'at na Moab

⁴⁰ Tumpu notatae, “Susumo bonyia' de monsabutmo polipiknyo nu bokaamo, sumo aijo'mo na bansa sa'angu' tokamo mae ka' monsabutmo Moab.

⁴¹ Sinin na kota'nyo tiba bentengnyo iwi-iwi' opatundu'mo ka' suludadunyo singkapmo mabuhuk sumomo boune anu kahanda'mo mompohampe anak.

⁴² Moab hansunmo ka' madi'mo daagi' susumo sa'angu' na bansa kalana aha binulonmo mae hi beleng-Ku.

⁴³ Aha nongahopimo kasilaka'an, bolo' tiba so'o.

⁴⁴ Mian anu mompalaimo da madi' ko kasilaka'an manabu'mo i bolo' ka' anu moko ala mingkemuat mae i bolo' nu konamo ahi' nu so'o. Iwi-iwi' aijo' jadimo ahi' de tokamo itempo'nyo na anu tinantukan-Kumo da mohansunimo Moab.

⁴⁵ Aha mian anu nalaimo madi'mo noko ala nombau apa-apaa aha nambamo nolio paninsulukan kiijo' mae i Hesybon, panyo kota' aijo' suele ahi' pinapumo ka' laigan i Tomundo' Sihon kinaanmo nu apu. Apu nontanggotimo daerah potempasan tiba bungkutnyo nu Moab, lipu' nu to mia-mian anu mongka'ima'i mahampate.

⁴⁶ Silakamo na Moab! Mian anu jojoong kiijo' monsombah Pilogot Kamos pinateanmo ka' to ana-anak nu aha binoamo salaku anu ihakop.

⁴⁷ Panyo sinaa anu aiya mae i ahop po ule'mo Ku sule'akon na kantumuu'an nu lipu' Moab. Aku, Tumpu notataemo!” Sumo aijo' na anu tionyo ahi' nu bau nu Tumpu hi aha mian nu Moab.