YEREMIA 42 - KITAB NU TUMPU ALLA LELE MA'IMAI'

Mian da'isan nongkakasemo hi Yeremia da odo'akon na aha

¹ Ilapas na aijo' iwi-iwi' na mian, anu tu'amo tiba anu daagi' anak tiba to sulu-suludadu anu toto tangka-tangkas na pangkatnyo, tibamo suele i Yohanan anak i Kareah tiba Azarya anak i Hosaya tinokamo mae

² hi belengku ka' nompoto'i, “Kita tuuma, susumo anu pinosi toamo nu kita Tuuma, kami aiya naipuan mae manjoo', panyo uuka aiya me sangkiding. Opoita mami kita Tuuma da mondo'akon mae kami hi Tumpu Allah anu nu sombah nu kita Tuuma. Do'akon mae na kami anu daagi' tinontuha' aiya,

³ da nu potiju' mae nu Tumpu hi kami pa' moya na anu tionyo kalambanan mami ka' mule' apaa na anu tionyo ahi' obau mami.”

⁴ Tinaamanku, “Ma'ima'mo de sumo itina', ku situjui apaa na anu kinakakasemo nu belemiu atina'. Aku balado'amo hi Tumpu Allah-nto, ka' pa' apaa na pontaami-Nyo mae ku sisikje iwi-iwi'; maumo sa'angu' madi' ku pohowini hi belemiu.”

^5-6 Aha notataemo mae hi belengku, “Opoita mami da kita Tuuma balado'amo hi Tumpu Allah-nto, kalana kami montulutimo Ia, da kantumuu'an mami jadimo ma'ima'. Jadi, ma'ima' kabai ma'idek na anu nu poto'i nu Tumpu aijo', otulutimo mami. Tumpumo ahi' na timbali sakisi anu madi' tageo' ka' madi' mongkolilimi mae kami de maluanyo kami madi' montuluti iwi-iwi' na palentah anu binee'mo nu Tumpu hi kami nunu poto'i mae nu belento Tuuma.”

Pinontaami nu Tumpu do'a i Yeremia

⁷ Isinaa kinosampulu'annyomo Tumpu notataemo mae hi belengku.

⁸ Sahingga ilagangkumo na i Yohanan tiba to sulu-suludadunyo haha aijo' tiba mian iwi-iwi' sangga'at anu tinokamo mae hingga-hinggat mae tiba ia.

⁹ Aku notataemo hi aha, “Belemiu nompokaumo aku da mompotokakon poitaon nu belemiu hi Tumpu, Tumpu Allah Israel. Jadi, Tumpu notataemo,

¹⁰ ‘De belemiu mongka'oho' jojoong tataap ilipu' aiya, Ku bangonakonmo na belemiu, misa' montua belemiu; Ku potinjomo na belemiu, misa' mohobo'akon. Aku nolibosmo hondo kalana nompotokamo mae kasilaka'an hi belemiu.

¹¹ Bolimo daagi' mongkabuhuk itomundo' Babel ai-aijo'. Aku atina'mo hingga-hinggat hi belemiu ka' montulungimo ka' molapasakonmo belemiu da bolimo nu kuasai nu Babel.

¹² Kalana aku mongkalibosimo belemiu, Ku pojadimo na itomundo Babel da mongkalibosimo belemiu ka' mompobee'mo belemiu minsusule'. Aku, Tumpu notataemo'.’ ”

^13-15 Panyo belemiu anu daagi' jinojoong i Yehuda boli ahi' panggaga hi Tumpu Allah nu belemiu ka' boli montaloakon, “Kami madi' mongka'oho' jojoong ilipu' aiya. Kami mambamo i Mesir ka' jojoongmo ilipu' aijo'. Ikiijo' mae kami madi'mo mongoa'i pahampatean, madi'mo mohongo onyi' nu tolompet bau polaga da mahampatemo, ka' madi'mo daagi' mongoa'i susa' i anu okaan.” De belemiu talalo ahi' daka-daka' na kinyonyoa mamba i Mesir ka' jojoongmo kiijo' mae, sumo uuka na potuunon nu Tumpu Anu Mahakuasa, Tumpu Allah Israel toka hi belemiu;

¹⁶ “Pahampatean ka' kasusa'an i anu okaan oka-okabuhuk nu belemiu mololoi'mo belemiu toka-toka i Mesir ka' mule' belemiu silakamo ilipu' kiijo' mae.

¹⁷ Iwi-iwi' na mian anu talalo daka-daka' na kinyonyoa mamba i Mesir ka' jojoongmo kiijo' mae, saidi' mae silakamo i uno nu pahampatean kabai silakamo kalana kasusa'anmo i anu okaan, kabai panyakit anu molele. Madi' ko samian na anu daagi' tumuu' de Ku potokamo mae na balaa' hi aha; iwi-iwi' silakamo.

¹⁸ Susumo Aku, Tumpu Allah Israel nompobuntumo tambuha'-Ku ka' pusang-Ku hi aha mian anu jojoong i Yerusalem sumo aijo'mo na Aku mompobuntu tambuha'-Ku kona hi belemiu anu mambamo i Mesir. Mian saidi' mae mabuhukmo na montoa belemiu; belemiu sola'mo o'alu, ka' sanggo nu belemiu lewa'mo opake' salaku bau pontotobi'akon. Belemiu madi'mo daagi' po ule' montoa lipu' nu belemiu aiya.”

¹⁹ Lantas aku motataeje mule', “Tumpu nompalentahmo da belemiu anu daagi' tinontuha' i Yehuda madi' mamba i Mesir. Kalana aijo' Ku bee'i pokinde' na belemiu uuka aiya,

²⁰ aijo'mo belemiu nombaumo sa'angu' na kasala'an daka'. Pinoita nu belemiu da aku balado'a hi Tumpu Allah-nto guna belemiu, ka' belemiu binalajanji'mo montulutimo iwi-iwi' na anu pinoto'imo nu Tumpu.

²¹ Uuka aiya pinoto'ingkumo na potuunon nu Tumpu Allah-nto hi belemiu, panyo belemiu madi' ahi' nontuluti potuunon aijo'.

²² Kalana aijo', tutugi; kiijo' mae ilipu' anu kahanda' olambani nu belemiu ka' jojoongmo tataap kiijo' mae, belemiu silakamo i uno nu pahampatean, kabai kalana kasusa'anmo i anu okaan, kabai kalana panyakit anu molele.”