YEREMIA 37 - KITAB NU TUMPU ALLA LELE MA'IMAI'

I Zedekia nongkakasemo hi Yeremia da odo'akon na bansa

¹ Tempo'nyo i Nebukadnezar tomundo' nu Babel nompobelentimo i Yoyakhin anak i Yoyakim, ia nohangkatmo i Zedekia anak i Yosia binau tomundo' nu Yehuda.

² Panyo maumo ahi' i Zedekia kabai mian anu ko pangkatnyo ka' mian da'isan madi' ahi' montuluti potuunon nu Tumpu anu pinoto'i-Nyo mae hi belengku da akuje na mompoto'i hi aha mian.

³ I Tomundo' Zedekia nompokaumo i Yukhal anak i Salemya, tiba i Imam Zepanya anak i Maaseya da momoita aku balado'a hi Tumpu bau kapentingan nu bansa.

⁴ Tempo'nyo aijo' aku ma'isa pinosoop italungku ka' daagi' bebas mombau apa-apaa hi aha mian da'isan.

⁵ Suludadu nu aha Babel nontumbuhimo Yerusalem, panyo salatan ihongomo nu aha na suludadu nu Mesir nolengkatmo mae lengkat i Mesir da mahampatemo, aha ninsusule'mo.

⁶ Tumpu, Tumpu Allah Israel, nompokaumo mae aku,

⁷ da opoto'i sumo uuka hi mian anu pinokau mae i Tomundo' Zedekia; “Poto'i hi Zedekia, ‘Suludadu nu aha Mesir anu nambamo mae montulungi belemiu mobalikmo ka' minsusule'mo.

⁸ Lantas aha mian nu Babel tokamo mule' mae ka' montumbuhimo kota' aiya ka' mompatundu'mo ka' mompapuimo.

⁹ Aku, Tumpu, mompokinde'i belemiu, da boli mongakali posi butong nu belemiu kalana balapikinmo au' aitu aha mian nu Babel nambamo ka' madi'mo daagi' po ule' minsusule' mae. Kalana memang aha tionyo ahi' minsusule' mae.

¹⁰ De maluanyo belemiu moko ala ahi' mompatundu' iwi-iwi' na suludadu nu Babel sahingga anu tontuha' me anu singkap tinadokmo na belenyo ibangka'nyo nu aha iwi-iwi', panyo aha saidi' mae na totinjo mompapui sampe motanggot na kota' aiya.’ ”

I Yeremia ihakopmo ka' tinalungku'mo

¹¹ Suludadu nu Babel ninsusule'mo nompala'imo Yerusalem kalana suludadu nu aha Mesir nolengkatmo mae mompanjolongimo mae kota' aiya.

¹² Sahingga aku nompala'imo Yerusalem ka' nambamo idaerah Benyamin da montalimamo pombagian buden lengkat hi to to utu-utusku.

¹³ Panyo salatan aku tinokamo i Sabatan Daka' Benyamin, kamundan nu suludadu anu monjagai ikiijo' nontahanmo aku ka' notatae, “Beleyum kahanda'mo mopalai maninggalumo hi aha Babel!” (Suludadu sanggonyo i Yeria; ia anak i Salemya ka' mule' ia makumpu i Hananya).

¹⁴ Tinaamanku, “Madi' totu'u! Aku madi' ko kahanda' mopalai ka' mainggalumo hi aha sampobali'.” Panyo madi' pinalesaya i Yeria. Ia nohakopmo ka' nomboamo aku nangadap hi to mia-mian anu ko pangkatnyo ipamalentahan.

¹⁵ Aha notambuha'mo hondo hi belengku ka' nompalentahmo da aku opahandokeakon ka' otahanmo i laigan i Yonatan julutulis nu negara. Laigan aijo' pinojadimo salaku talungku'.

¹⁶ Aku pinosoopmo isa'angu' na kolam i aluk nu tano' ka' pinin hondo na tinahan ikiijo'.

¹⁷ Lapas aijo' i Tomundo' Zedekia nompalentahmo mian da momboa aku mangadap hi ia ilaigan nu tomundo'. Ikiijo' pinohowininyo na ia nompokilawa mae hi belengku pa' daagi' ko potuunon lengkat mae hi Tumpu. “Daagi',” na koongku. Lantas po ule' mule' aku notatae, belento “Tomundo' obee'mo hi tomundo' Babel”.

¹⁸ Lapas aijo' pinokilawangkumo, “Apaa na palabuatanku anu ma'idek hi belento Tomundo kabai hi to mia-mian anu ko pangkatnyo i pamalentahan nu belento Tomundo' kabai hi aha mian da'isan, sahingga nu posoopmo nu belento Tomundo' na aku i uno nu talungku'?

¹⁹ Iyamo mae na to nabi-nabi nu belento Tomundo' nonontaloakonmo tukoonyo tomundo' nu Babel madi' mule' mae montumbuhi belento Tomundo' tiba lipu' aiya?

²⁰ Uuka aiya belento Tomundo' anu talasanggo, de timbali sanang pe'e mae na mohongo apaa na anu ku kakase aiya. Bolimo mae belento Tomundo' moki boa aku minsusule' italungku' i laigan i Yonatan kiijo' mae, dumo aku matemo kiijo' mae.”

²¹ Sahingga i Tomundo' Zedekia nompalentahkonmo da aku otalungku'mo i popasan nu nu laigan nu tomundo'. Jadi aku jinojoongmo ikiijo' mae, ka' sansina-sinaa obee'i roti anu o'alamae itampat pombauan roti sampe palasadia'an roti ikota' aijo' i ningkotmo iwi-iwi'.