YEREMIA 35 - KITAB NU TUMPU ALLA LELE MA'IMAI'

I Yeremia tiba sa'anakan mae i Rekhab

¹ Salatan i Yoyakhin anak i Yosia tinimbalimo tomundo' nu Yehuda, Tumpu notataemo mae hi belengku,

² “Lako' mamba hi aha mian sa'anakan mae i Rekhab ka' basisik tiba aha. Boa na aha isala'sa'angu' na salipi' kiijo' i uno nu Laigan-Ku, ka' po inumi anggur na aha.”

³ Sahingga nambamo na aku nolaga iwi-iwi' na aha sa'anakan mae i Rekhab, aijo'mo i Yaazanya (anak nu samian sanggonyo i Yeremia anak i Habazinya) tiba iwi-iwi' na to utu-utusnyo ka' anaknyo anu toto momo'ane.

⁴ Aku nomboamo aha i Laigan nu Tumpu, i uno nu dasanyo nu to muli-mulit i Nabi Hanan anak i Yigdalya. Dasanyo aijo aita mae ibawonyo nu dasanyo i Imam Maaseya anak i Salum koko dasanyo nu to mia-mian anu kopangkatnyo sangga'at. I Maaseya pagawe anu matangkas na pangkatnyo anu monjagai iwi-iwi' na sabatan i Laigan nu Tumpu.

⁵ Lapas aijo' ingatunkumo i ahop nu aha mian Rekhab na poci' anu ko isinyo buke-buke' na anggur, tiba to pia-piangkuka na galas. Lantas pinoto'ingkumo hi aha, “Imbo' inumo mae.”

⁶ Panyo tinaaman nu aha, “Kami madi' monginum anggur. Mompolee' mami i Yonadab anak i Rekhab nontewa' kami tibamo lee' mami madi' timbali monginum anggur. Pontewa' aijo' tataap otuluti sampe toka sidu-sidutu'.

⁷ Kami madi' timbali mosu'an apa-apaa ka' mule' madi' timbali mombau ale' kabai ko ale' nu anggur. Hau-haunyo kami daagi' tutuu', kami madi' mule' ahi' timbali mombau laigan. Kami tionyo ahi' ola jojoong i kemah da timbali tataap jojoong ilipu' aiya salaku mian anu lengkat mae isalipu'an.

⁸ Iwi-iwi' na anu pinalentahkonmo i Yonadab hi kami tinulutanmo mami. Hau-haunyo kami daagi' tutuu' kami tiba to ana-anak mami tiba to bengke-bengkele' mami madi' timbali monginum anggur.

^9-10 Kami madi' timbali mombau laigan da bau kajojoongan mami, panyo kami na jojoong ahi' i uno nu kemah. Kami suele madi' kino ale' nu anggur, ale' kabai mule' ahi' bine' nu gandum da osu'an. Osanggomo kodo-kodo' sinin na palentah nu mompolee' mami i Yonadab aijo' tinulutanmo mami ingko-ingkot.

¹¹ Panyo salatan i Tomundo' Nebukadnezar nontumbuhimo lipu' aiya kami nopalaimo namba da madi' nu patei nu suludadu nu Babel tiba suludadu nu Siria jinojoongmo i Yerusalem. Aijo' na sababnyo sahingga kami uuka aiya jinojoongmo i aiya.”

^12-13 Lantas Tumpu Anu Mahakuasa, Tumpu Allah Israel, nonsaimo aku namba hi aha mian nu Yehuda tiba Yerusalem, ka' nompoto'imo potuunon nu Tumpu aiya hi aha, “Aku, Tumpu mompokilawa kadaka' belemiu madi' mongka'oho' mohongo-hongo Aku, ka' madi' mongka'oho' montuluti iwi-iwi' na palentah-ngKu.

¹⁴ I Yonadab nontewa'mo lee'nyo da boli monginum anggur ka' tinulutanmo ahi' nu aha na palentah aijo'. Sampe sinaa uuka madi' ko samian pe'e na aha na anu monginum anggur. Panyo Aku na saja' ahi' mompoto'i hi belemiu panyo belemiu madi' ahi' mongka'oho mohongo-hongo.

¹⁵ Aku saja'mo nompokau namba hi belemiu iwi-iwi' na posaihon-Ku to nabi-nabi ka' aha nompokinde'imo belemiu da opokopiani na kalakuan nu belemiu ka' da madi'mo mombau palabuatan anu ma'idek. Aha nompokinde'imo belemiu da bolimo monsombah to pilo-pilogot sangga'at ka' madi'mo palesaya hi aha da belemiu tataap ahi' jojoong ilipu' aiya anu binee'-Kumo hi belemiu tiba hi mompolee' nu belemiu. Panyo belemiu madi' ahi' nompalahatikan ka' madi' ahi' nohongo-hongo Aku.

¹⁶ Lee' i Yonadab na nontulutimo ahi' mompolee' nu aha, panyo belemiu na madi' montuluti Aku.

¹⁷ Kalana aijo' Aku, Tumpu Anu Mahakuasa, Tumpu Allah Israel, mompotokamo mae aiya hi belemiu – mian nu Yehuda tiba Yerusalem – iwi-iwi' na balaa' anu tinantukan-Kumo mongkona belemiu, susumo anu pinoto'ing-Kumo. Han aijo' Ku baumo kalana belemiu madi' mongka'oho' mohongo-hongo de Ku poto'imo hi belemiu, ka' belemiu madi' mongka'oho' montaami salatan Ku lagamo na belemiu.”

¹⁸ Lantas pinoto'ingkumo hi aha to mia-mian sa'anakan mae i Rekhab koongku, Tumpu Anu Balakuasa hondo, Tumpu Allah Israel, nompoto'imo mae sumo uuka, “Belemiu nontulutimo mompolee' nu belemiu i Yonadab; iwi-iwi' na palentahnyo tinulutanmo nu belemiu ka' binaumo.

¹⁹ Mokonyo aijo', Aku, Tumpu Anu Mahakuasa, Tumpu Allah Israel, balajanji'mo saba' lee' mae i Yonadab anak i Rekhab tionyo ahi' saja' daagi' ko samian na mo'ane na anu mombau apa-apaa na anu Ku palentahkon.”