YEREMIA 34 - KITAB NU TUMPU ALLA LELE MA'IMAI'

Potuunon toka hi Zedekia

¹ Salatan i Nebukadnezar tomundo' nu Babel tiba suludadunyo anu lebemo pinaka pohoson nu to sulu-suludadu anu lengkat mae isinin na bansa ka' negara tinundu'mo hi ia, aha tinokamo mae nontumbuhi Yerusalem tiba kota-kota' anu madi' majo'on ikiijo', Tumpu nompoto'imo mae hi belengku.

² Ia nompalentahmo mae aku da mamba hi Zedekia tomundo' nu aha Yehuda ka' opoto'i sumo uuka, “Aku, Tumpu Allah nu Israel, mombee'mo kota' aiya hi tomundo' Babel ka' nu papuimo.

³ Beleyum madi'mo daagi' moko ala mopalai panyo ohakopmo ka' obee'mo hi ia. Beleyum singkabotmo ka' basisikmo tiba ia, lantas beleyum mambamo i Babel,

⁴ panyo potombihing mae na potataeng-Ku aiya mongkona beleyum, Zedekia! Beleyum madi' silaka i uno nu pahampatean,

⁵ panyo silaka ahi' ima-ima'. Ka' susumo ahi' biasa mian da'isan mompapu kamangian de molamunmo mompolee' nu beleyum anu nompalentahmo ma'isa pe'e beleyum nompalentah, sumo aijo'mo suele na mian da'isan mompapuakonmo kamangian beleyum. Aha susa'mo na kinyonyoa ka' motataemo, ‘Paya’! Na Tomundo mami imadi'anmo! Aku, Tumpu notataemo.”

⁶ Sahingga potuunon nu Tumpu aijo' pinotokangkumo hi Tomundo' Zedekia kiijo' i Yerusalem.

⁷ Salatan suludadu nu tomundo' Babel nontumbuhimo kota' aijo'. Aha suele mule' ahi' nontumbuhimo kota' Lakhis tiba Aseka, ohua' na kota' anu ko bentengnyo aijo' na daagi' nontinjohakon kiijo' i Yehuda.

Palabuatan anu madi' adin hi aha to botu-botuan

⁸ I Tomundo' Zedekia tiba mian anu jojoong i Yerusalem nombaumo palajanjian da opobebasmo

⁹ na to botu-botuan nu aha mian nu Ibrani mau to momo'ane kabai to bou-boune da madi'mo ko samian na aha Israel mombotuani aha, totu-totu'u mompobebasmo ahi' botuan nu aha haha aijo'.

¹⁰ Iwi-iwi na mian daisan ka' iwi-iwi na pegawe nu pamalentah anu binala janji'mo da mombebaskan mo to botu-botuan nu aha ka' madi'mo ahi daagi mombotuani, totu-totu'u mompobebasmo to botu-botuan nu aha aitu.

¹¹ Panyo mamanga ahi' aha sinangalasanmo na binapikin lantas po ule' mule' ahi' ingala nu aha na botuan haha aijo' ka' pinakisamo nu aha da timbali botuan mule'.

^12-13 Sahingga Tumpu, Tumpu Allah Israel, nompalentahmo mae aku da mompoto'i sumo uuka hi mian haha aijo', “Tempo'nyo Aku nomboamo mae mompolee' nu belemiu lengkat mae i Mesir ka' nompobebasmo da madi'mo binotuanan, Aku nombaumo palajanjian hi aha.

¹⁴ Pinoto'ing-Kumo da iwi-iwi' na botuan te aha mian nu Ibrani anu lewa'mo nontuluti apaa na anu pinokauhakon nu belemiu inganom na taun na kinopinnyo tionyo ahi' opobebasmo ikamingkotanmo nu taun anu kopopitu'nyomo. Panyo mompolee' nu belemiu madi' ahi' nompalahatikan kabai nohongo-hongo apaa na anu pinoto'ing-Kumo aijo'.

¹⁵ Pa' piniangkuka na sinaa anu ihikuhakonmo na na'ima'mo ahi' na kalakuan nu belemiu ka' nombaumo ahi' anu momposanang mae kinyonyoang-Ku. Belemiu iwi-iwi' nonsitujuimo da mompobebasmo ahi' to botu-botuan anu bubu' mae bansa nu belemiu ka' binalajanji'mo tiba Aku i uno nu Laigan-Ku.

^16-19 To mia-mian anu toto tangka-tangkas na pangkatnyo ipamalentahan Yehuda tiba Yerusalem ka' mule' to pangkat-pangkat anu bakalaja ilaigan nu tomundo', ka' mule' to ima-imam, ka' mule' iw-iwi' na anu monjagai tano' nu belemiu nonsahkanmo palajanjian aijo' tinanda'an nongkolot sapi' kinolong ohua' ka' ilumajangmo i'olot nu kolongannyo ohu-ohua' aijo'. Panyo mamanga ahi' sinangalasanmo na pikilan nu belemiu ka' nongalumo mae Aku. To botu-botuan anu pininmo na pinobebas nu belemiu da tumuu'mo ahi' bebas montuluti posi pongka'oho' nu aha po ule'mo ingala nu belemiu ka' pinakisamo da po ule' timbali botuan. Kalana aijo' Aku, Tumpu mompoto'i saba' belemiu nolanggaimo palentah-ngKu ka' madi'mo nontuluti apa-apaa na anu tionyo ahi' obau aijo'mo belemiu madi'mo nompobebas sangko sangalu bansa nu belemiu aha Israel. Jadi uuka Ku bee'imo kabebasan na belemiu; kabebasan da silakamo i uno nu pahampatean kabai silakamo nu panyakit anu molele kabai kalana kasusa'anmo i anu okaan. Ku baumo na belemiu susumo belemiu nombaumo sapi' anu kikinolotmo nu belemiu. Ku pojadimo da mabuhuk na bansa iwi-iwi' idunia aiya na montoa apaa na anu binaung-Kumo hi belemiu.

²⁰ Ku bee'mo na belemiu hi aha sampobali' nu belemiu anu kahanda'mo mompatei belemiu. Bangke' nu belemiu nu kaanmo nu tomonsi' tiba binatang anu mahangas.

²¹ I Zedekia tomundo' nu aha Yehuda tiba mian anu toto tangka-tangkas na pangkatnyo ipamalentahan Ku bee'mo hi to mia-mian anu kahanda'mo mompatei aha. Ku bee'mo na aha hi suludadu nu Babel, anu uuka aiya nompala'imo belemiu.

²² Ku bee'imo tanda da aha po ule'mo mae minsusule' ikota' aiya, lantas montumbuhimo mae, ka' mongkuasaimo, ka' nu papumo nu aha. Sinin na kota' nu Yehuda Ku pojadimo susumo padang tampat anu mateges anu madi'mo nu jojoongi nu mian. Aku, Tumpu notataemo.”