YEREMIA 28 - KITAB NU TUMPU ALLA LELE MA'IMAI'

I Yeremia tiba i Nabi Hananya

¹ I taunmo aijo' kakona ibitu'on kino olima'nyomo ka' mule' itaun kino opatnyomo na i Tomundo' Zedekia nompalentah, i Hananya anak i Azur te nabi anu lengkat mae i kota' Gibeon notataemo mae hi belengku i uno nu Laigan nu Tumpu. I ahop nu to ima-imam tiba mian da'isan ia nontaloakonmo mae hi belengku,

² koonyo Tumpu Anu Mahakuasa, Tumpu Allah nu aha Israel nompoto'imo mae sumo uuka, “Kahosonan i tomundo Babel ilepo'an-Kumo.

³ I uno nu tempo' ohua' na taun Ku sule'akonmo na to bala-balang anu ingala i uno nu Laigan-Ku, anu binoamo i Tomundo' Nebukadnezar i Babel.

⁴ Aku mule' momboamo mae i Yoyakhin anak momo'ane i Yoyakim tomundo' nu Yehuda tiba iwi-iwi' na mian da'isan nu Yehuda anu binoamo i Babel. Memang totu'u Ku lepo'imo na kahosonan nu Babel, Aku, Tumpu notataemo.”

⁵ Sahingga i ahop nu to ima-imam tiba iwi-iwi' na mian da'isan anu sika-sika tinjo i Laigan nu Tumpu aijo', pinoto'ingkumo hi Hananya,

⁶ “Ma'ima'mo! O'amalakon da apaa na anu kinila-kilamo nu beleyum aijo' ko bukutinyo ahi' ka' Tumpu totu-totu'u ahi' po ule'mo monsule'akon mae lengkat i Babel balang haha aijo' anu memang ahi' balang nu Laigan nu Tumpu tibamo aha mian iwi-iwi' anu binoamo kiijo' mae.

⁷ Panyo beleyum, Hananya, tiba belemiu iwi-iwi', o, mian da'isan potombihing mae na uuka;

⁸ To nabi-nabi ma'isa pe'e kinokitanyo polo'mo nongkila-kila tukoonyo nu aha pahampatean, balaa' kapatean, ka' mule' panyakit anu molele mongkonamo manjoo' na bansa tiba kalaja'an anu toto hoso-hoson.

⁹ Panyo nabi anu nongkila-kilamo kadamean ola timbali o, akui salaku nabi anu totu-totu'u sinai mae nu Tumpu, de iwi-iwi' na anu kinila-kilanyomo memang ahi' ko bukuti'nyomo.”

¹⁰ Lantas ihahumbitakonmo i Hananya na tokon anu kona-kona i tundunnyo ka' pinato'nyomo.

¹¹ I ahop nu mian da'isan iwi-iwi' anu tohu-tohung ikiijo' tinaloakonnyomo, “Pinoto'imo nu Tumpu koo-Nyo sumo aiya na Ia mompato'akon tokon anu pinokona i Tomundo' Nebukadnezar i tundun nu bansa iwi-iwi'; Nu baumo nu Tumpu na aijo' i uno nu ohua' na taun aiya.” Lapas aijo' aku mule' ahi' nambamo.

¹² Madi' pinin salatan noko lapasmo na han anu jinadimo aijo', Tumpu nompalentahmo mae aku,

¹³ lako mamba i Hananya ka' poto'i sumo uuka, “Koonyo nu Tumpu taalu' beleyum timbalije mule' ahi' mompato' tokon kau' aijo', panyo Nu bolosimo nu tokon besak.

¹⁴ Tumpu Anu Mahakuasa, Tumpu Allah nu Israel nompoto'imo mae koo-Nyo Nu pokonamo mae na tokon besak hi tundun nu sinin na bansa haha aiya ka' aha tundu'mo ka' mule' tulutmo hi Nebukadnezar, tomundo' nu aha Babel. Tumpu nontaloakon mule' tukoo-Nyo binatang anu mahangas hondo Nu bee' mule' mae hi kakuasa'an i Nebukadnezar.”

¹⁵ Iwi-iwi' aijo' pinoto'ingkumo hi Hananya, lantas pinoto'ingku mule', “Potombihing mae, o, Hananya! Tumpu na madi' ahi' nompokau beleyum; beleyum nonsaduakonmo bansa aiya da pinalesaya hi potatae anu madi' totu'u.

¹⁶ Kalana aijo' posi Tumpu ahi' na nompoto'imo mae tukoo-Nyo beleyum Nu pateimo da madi'mo daagi' ko anu i dunia aiya. Taunmo aiya na beleyum silakamo, kalana beleyum nompokaumo bansa aiya da madi'mo montuluti Tumpu.”

¹⁷ Sahingga memang itaunmo aiya kakona ibitu'onmo kopopitu'nyo, i Hananya sinilakamo.