YEREMIA 22 - KITAB NU TUMPU ALLA LELE MA'IMAI'

I Yeremia nompokinde'imo to utu-utus itomundo' Yehuda

^1-2 Tumpu nompalentahmo mae aku da mamba ilaigan nu tomundo' Yehuda, lee'mae i Daud da mompoto'iakon potuunon nu Tumpu hi tomundo' ka' hi aha to mia-mian anu ko pangkatnyo ka' mule' hi aha mian anu jojoong i Yerusalem. Sumo uuka na pinoto'i mae nu Tumpu hi aha,

³ “Tionyo ahi' adin ka' hodi' na kinyonyoa. Pobebasmo na mian anu me saja' o ala na tenaganyo nu aha anu balakuasa anu saja' mongala tenaga nu mian. Boli mombee'i kasansala'an kabai mombau anu ma'idek hi aha mian anu isalipu'an mae, hi aha anak anu madi'mo ko tinanyo ka' tuumanyo, kabai hi aha anu binalumo. Boli mompatei mian anu madi' ko sala'nyo itampat aiya.

⁴ De memang ahi' belemiu mompojalan palentah-ngKu totu-totu'u, saba' to tomu-tomundo' anu mompalentah susumo i Daud, na mompinsoopi sabatan toto daka-daka' haha aiya anu ilaigan nu tomundo'. Aha tiba to mia-mian anu ko pangkatnyo ka' mian da'isan nu aha na saidi' mae monsake'i kareta ka' ajahan.

⁵ Panyo de belemiu madi' ahi' montuluti sinin na palentah-ngKu, saba' Ku sumpa'mo na laigan nu tomundo' aiya da hansunmo. Aku, Tumpu notataemo.

⁶ De ola pontoang-Ku laigan nu tomundo' Yehuda ma'ima' hondo, sumomo ahi' ko ima'nyo tano' nu Gilead ka' sinin na bungkutnyo nu Libanon; panyo tampat aijo' Ku potimbalimo susumo padang tampat anu mateges anu madi' nu jojoongi nu mian.

⁷ Ku saimo na mian da mamba mohansuni. Nu boamo mae nu aha na bobolo' ka' mompahantaa'akon ohi'nyo sahingga motua'mo, ohi'nyo anu toto ima-ima' haha aijo' te kau' cemara na binau anu lengkat mae i Libanon. Lantas nu lumbu'akonmo nu aha i apu.

⁸ Lapas mae manjoo' na mian anu lengkat mae isalipu'an motulu ikiijo' ka' mompaha poki-pokilawa hi samian ka' samian kadaka' Belento Tumpu nombaumo sumo aijo' ikota' anu ma'ima' hondo aijo'.

⁹ Lantas nu taamimo nu mian koonyo nu aha iwi-iwi' aijo' jinadimo kalana belemiu madi'mo nongganapi palajanjian nu belemiu hi Tumpu Allah nu belemiu ka' mule' nonsombahmo ka' pinalesayamo to pilo-pilogot sangga'at.”

I Yeremia nonsisikmo i Yoahas

¹⁰ O mian nu Yehuda, bolimo daagi' susa' ka' molibos kalana i Tomundo' Yosia sinilakamo. Anu ohangi ola ahi' i Yoahas anaknyo momo'ane kalana ia binoamo ka' madi'mo daagi' minsusule' mae. Tano' kinahampeannyo madi'mo daagi' nu toa.

¹¹ Mongkona i Yoahas, anak momo'ane i Yosia anu jinadimo tomundo' nu Yehuda nombolosakon tuumanyo, pinoto'imo nu Tumpu sumo uuka, “Ia nambamo nompala'imo tampat aiya ka' madi'mo daagi' minsusule' mae.

¹² Ia silakamo kiijo' mae itampat pinomboan aha ka' madi'mo daagi' montoa lipu' aiya.”

I Yeremia nonsisikmo i Yoyakim

¹³ Silakamo na mian anu mombau laigannyo panyo binau nu jalan anu madi' adin, ka' nompodaka'mo panyo pinodaka'mo nu jalan anu madi' hodi' na kinyonyoa. Silakamo na ia anu mompalentah mian mokalaja padahan madi' otamboi.

¹⁴ Silakamo na mian anu montaloakon, “Ku baumo na laigan nu tomundo' anu daka' tiba salipi'nyo toto ewa-ewa aita' mae ilunduannyo anu ibawonyo,” lantas laigan nu tomundo' aijo' obaui tolongannyo ka' opokonai bingkainyo kau'lontio' nu Libanon na obau ka' ocet momea'.

^15-16 Potombihing mae o Tomundo' Yoyakim! De beleyum mombaumo laigan nu tomundo' kau' lontio' anu ma'ima' hondo lengkat mae i Libanon, pa' aijo' timbalimo sa'angu' na bukutinyo saba' beleyumo na tomundo' anu lebe ma'ima' molingkudui tomundo'-tomundo' sangga'at? Soba tutugi na tuuma nu beleyum: Ia nolasaimo kasanangan i uno nu kantumuu'an ka' iwi-iwi' na usahanyo ihumpaknyomo kalana ia saja' hodi' na kinyonyoa ka' mule' mongulus palakala nu mian anu kasiasi adin hondo. Memang sumo aijo' ahi' na palabuatan nu mian anu monsumbu' Tumpu.

¹⁷ Panyo beleyum, Yoyakim, sangalasan. Beleyum ola molio posi ka untungan nu beleyum. Beleyum nompateimo mian anu madi' ko sala'nyo ka' talalo ahi' monsakisa mian da'isan nu beleyum ka' talalo ahi' singgi.

¹⁸ Kalana aijo' mongkona i Yoyakim tomundo' nu Yehuda, anak momo'ane i Yosia tinaloakonmo nu Tumpu sumo uuka, “Ia silaka madi'mo ohangi; madi'mo daagi' ko anu motatae, ‘Paya' na sangalungku, paya'.’ Madi'mo daagi' ko anu susa' kalana molibos kabai moloboo', ‘Paya' na anu obagi tumpu!’

¹⁹ I Yoyakim ohela'mo ka' olumbu'akonmo isambiha'nyo nu sabatan daka' Yerusalem, susumo anu binaumo nu mian hi bangke' nu keledai.”

Lele mongkona uki' nu Yerusalem

²⁰ Tumpu notatae, “O mian anu jojoong i Yerusalem, lako mamba i Libanon ka' i Basan, ka' poloboo'mo kiijo' mae. Polokihis aita' mae i bungkutnyo nu Moab, kalana iwi-iwi' na sangalu nu belemiu pinatundu'mo.

²¹ Pinoto'ing-Kumo hi belemiu salatanmo pe'e ka ada'an nu belemiu daagi' na'ima' panyo belemiu madi' mohongo-hongo. Memang sumo aijo'mo na kalakuan nu belemiu naipuan pe'e mae sangkutnyo tempo' uuka aiya; madi' toho' belemiu mongka'oho' tulu-tulutan mae hi beleng-Ku.

²² Kalana aijo' to pola-polaya' nu belemiu saidi' mae mingkotmo susumo anu nu puhakon nu mombun. Iwi-iwi' na sangalu nu belemiu oboamo salaku mian anu ihakop ka' kota' nu belemiu o alumo ka' mule' opopo ambangmo kalana sinin na palabuatan ma'idek nu belemiu.

²³ Belemiu jojoong madi' ko anu mompoposia nu tikubi nu ohii' kau' lontio' lengkat mae i Libanon, panyo saidi' mae de belemiu nu tokaimo mae nu kasusa'an belemiu mongoa'imo kasansala'an susumo boune anu kahanda'mo monganak.”

Tumpu mohukumo i Yoyakhin

²⁴ Tumpu notataemo hi Tomundo' Yoyakhin, anak momo'ane i Yoyakim tomundo' nu aha Yehuda, “Atas sanggong-Ku, Tumpu Allah anu tumuu', Ku pokeman totu-totu'u saba' maumo ahi' beleyum pinojading-Kumo susumo sinsin meterai ilimang-Ku koanan, panyo beleyum Ku bubutmo,

²⁵ ka' Ku bee'mo hi to mia-mian anu nu kabuhuk nu belemiu ka' anu kahanda'mo mompatei belemiu. Beleyum Ku bee'mo hi Nebukadnezar tomundo' nu aha Babel, ka' hi to sulu-suludadunyo.

²⁶ Beleyum tiba tina nu beleyum Ku laa'mo ka' Ku boamo ilipu' anu misa tano' kinahampean nu beleyum ka' ikiijo' mae belemiu silakamo.

²⁷ Belemiu saidi' mae mongindimo minsusule' mae ilipu' aiya, panyo belemiu madi'mo daagi' minsusule' mae.”

²⁸ Aku i Yeremia nompoto'imo, “Pa' i Tomundo' Yoyakhin tinimbalimo susumo kuhon tano' anu noposo'mo anu o alinmo ka' madi'mo daagi' oka'ima'i? Mokonyo aijo' ia tiba to ana-anaknyo olaa'mo ka' oboamo ilipu' anu madi' nu sumbu-sumbu' nu aha?”

²⁹ Paya' na lipu'ku, potombihing mae apaa na anu pinoto'imo nu Tumpu,

³⁰ “Mian aijo' tinantukanmo nu Tumpu madi'mo ko to ana-anaknyo ka' saja' madi' mingkaliangan i uno nu kantumuu'annyo. Sadangkan lee'nyo suele madi'mo daagi' ko anu mingkaliangan na mompalentah i Yehuda salaku tomundo' lee' mae i Daud. Aku, Tumpu notataemo.”