YEREMIA 2 - KITAB NU TUMPU ALLA LELE MA'IMAI'

Kalibosan nu Tumpu hi aha Israel

¹ Tumpu nompalentahmo aku,

² da mombebakon lele aiya hi aha iwi-iwi' mian nu Yerusalem, “O Israel Ku inau' hondo na tulu-tulutan nu beleyum tempo'nyo beleyum daagi' olitau; talalo hondo na beleyum mongka'ima'i mae tempo'nyo kita salaje notuang. Namba ipadang tampat anu mateges binatukan nu beleyum na Aku notulu daerah anu madi' ko sosu'anonnyo.

³ O Israel, beleyum ola Aku na tumpunyo, batu nu kinyonyoangku anu Ku kanonongi. Ku potokamo mae na balaa' hi aha iwi-iwi' nonsaduakonmo beleyum da sinansala, Aku, Tumpu notataemo.”

Dosa' nu mompolee' nu bansa Israel

⁴ Potombihing na potuunon nu Tumpu, o belemiu lee' mae i Yakub, tulunan nu to bansa-bansa Israel!

⁵ Tumpu notatae, “Kasala'an apaa na anu tinoa nu mompolee' nu belemiu hi beleng-Ku, sahingga aha pinalagantamo mae hi beleng-Ku? Aha pagala nolio pilogot anu madi' ko angga'nyo ka' ahennyo posi ahamo ahi' na na ambang.

⁶ Aku madi'mo pinajulian; Aku na nontakamo aha ijalan, ka' nomboamo aha nosabat lengkat mae i Mesir nontulu padang tampat anu bone'on, daerah anu kinunmo ka' kaho lingkobaknyo, ka'mule' nanggasmo ka' okabuhukmo – padang tampat anu madi'mo ojojoongi ka' madi'mo daagi' otului!

⁷ Namba ilipu' anu ma'omuk Aku na nomboa aha da molasaimo hasin nu tano'nyo ka' iwi-iwi' na anu ma'ima ikiijo' mae. Panyo ikiijo' mae tano'-Ku ihumimi'anmo nu aha ka' anung-Ku pinojadimo nu aha susumo sa'angu' na balang anu okahegatimo.

⁸ To ima-imam madi'mo ko anu mompokilawa iya mae na Aku, Tumpunyo. To mia-mian anu montinjohakon atulan madi'mo daagi' monsumbu' pa' ihe na Aku, to mia-mian anu balakuasa notomuhukmo mae hi beleng-Ku. Atas sanggo nu Baal na to nabi-nabi motatae, ka' monsombahmo pilogot anu madi' kokaliangannyo.”

Tumpu nontuu'mo aha mian anu palesayamo hi Ia

⁹ Tumpu notatae, “Uuka aiya mian anu palesayamo hi beleng-Ku Ku sampopalakala mule' ka' lee'nyo Ku ulusmo na palakalanyo.

¹⁰ Tusakonmo na sonibi nu ambai Siprus sasu kinsoban, boamo na mian isasu kabete'an ilipu' Kedar, palesa kiijo' mae ima-ima' pa' toho'jinadi na han anu pokakana?

¹¹ Ma'isa toho' ko sa'angu' na bansa mompotolos pilogotnyo maumo ahi' aijo' misa' Tumpu Allah anu sahondo-hondonyo. Panyo, mian anu palesayamo hi beleng-Ku nompotolosmo Aku, anu nunu kabubunakon nu aha tiba apa-apaa anu madi' moko ala mombau apa-apaa.

¹² Kalana aijo', o langit, tolotanggamo! Bangangmo ka' langkakatanmo!

¹³ Mian anu palesayamo hi belengku nombaumo ohua' na ngahan nu dosa': aha nohikumo mae Aku, mata nu uee anu mombee'i kantumuu'an hi manusia; aha nombaumo kolam nu butong nu aha, kolam anu losut madi' moko ala montahan ueenyo.”

Akibatnyo nu Israel madi' tulu-tulutan

¹⁴ “Israel misa' posaihon, misa' mule' ahi' lee' nu posaihon salaku botuan. Panyo kadaka' ia tinimbalimo kaanon nu sampobali'nyo?

¹⁵ Sampobali'nyo mohu'akonmo ia susumo singa tano'nyo opokunmo ka' madi'mo daagi' ko isinyo iwi-iwi' na kota'nyo mingkotmo nu toyo'i nu apu opojohokmo madi'mo ko anu monjojoongi.

¹⁶ O Israel, ubak nu beleyum oguntingimo nu aha mian nu Memfis tiba Tahpanhes.

¹⁷ Posi beleyumo ahi' na nonsabapi iwi-iwi' na anu jinadimo hi butong nu beleyum kalana tempo'nyo beleyum tinaka'-Kumo na ilumajang beleyum nohikumo mae Aku, Tumpu Allah nu beleyum.

¹⁸ Apaa na untungnyo beleyum namba i Mesir? Pa' kahanda' da monginum uee nu Kaunyo Nil? Apaa na untungnyo beleyum namba i Asyur? Pa' kahanda' da monginum uee nu Kaunyo Efrat?

¹⁹ Posi palabuatanmo nu beleyum ma'i-ma'idek na nohukum butong nu beleyum, beleyum sinakisamo kalana madi'mo nongala Aku, Tumpu Allah nu beleyum. Aku, Tumpu Allah nu beleyum notataemo; Akumo na Tumpu Allah Anu Matangkas na Kuasanyo ka' Balakuasa hondo.”

Israel madi'mo mongka'oho' monsombah Tumpu

²⁰ Tumpu notatae, “Pininmo na beleyum madi'mo nongka'oho' nohongo-hongo Aku; madi'mo mongka'oho' mo tuluti kabai monsombah Aku. Aita' mae itoto sa'angu' na puge'nyo anu matunjo, ka' akaong i patuunyo nu toto sangkau na kau' anu tambok na honnyo beleyum monsombahmo to pilo-pilogot anu mombee'i kalumba'an.

²¹ Beleyum sinu'an-Kumo susumo kau' anggur anu pinile'an-Kumo ingala ibibitnyo anu ma'ima'. Panyo uuka aiya beleyum nongabali'mo tinimbalimo sosu'anon nu kuhat ka' madi'mo kinokaliangannyo.

²² Maunyomo ahi' beleyum mindi' ka' minsabung manjo-manjoo' Panyo kotolan-kotolan nu kasala'an nu beleyum na daagi' ahi' Ku toa.

²³ Baani hondo na beleyum motatae tukooyum, beleyum madi'ko palabuatan ma'idek, ka' tukooyum Baal madi' toho' tinulutan nu beleyum! Soba toa na palabuatan nu beleyum akaong ibangka'nyo tutugi na palabuatan nu beleyum ma'i-ma'idek ka' akuimo! Beleyum sumomo ahi' unta behenyo anu mongkahanda'imo ohasi' nu lakinyo maha popadeka'anmo mokiijo' ka' mo uuka mae madi'mo opoko ala otahani,

²⁴ lantas minsoopmo ipadang tampat anu mateges ka' iliingmo. Ia madi'mo opoko ala otahani de mongkahanda'imo nu hasi' nu lakinyo. Anu ko kinyonyoamo i aijo' madi'mo palalu daagi' molio kalana de tempo'nyomo ohasi' iamo ahi' na mompokiijo'akon butongnyo hi lakinyo.

²⁵ O Israel bolimo daagi' beleyum mopadeka' lewa' mololoi' pilogot ka' bolimo daagi' lewa' moloboo' molaga aha, dumo ahi' tengke nu beleyum belaon ka' mule' onyopan nu beleyum motismo kalana megotmo. ‘Madi'mo, aku madi'mo bisa minsusule',’ sumo aijo' na tinaloakon nu beleyum, ‘kalana aku nongka'ima'imo pilogot ka' kahanda'mo ahi' mombatuki aha!’ ”

Israel pantasmo na ohukum

²⁶ Tumpu notatae, “Susumo anu sola' tomang mongoa'imo ma'ambang salatan ia ihakopmo, sumo aitumo na belemiu iwi-iwi' saidi' mae mongoa'imo ma'ambang o mian Israel, to tomu-tomundo' tiba to mia-mian anu kopangkatnyo, to ima-imam tiba to nabi-nabi nu belemiu!

²⁷ Belemiu saidi' me opopo ambangmo kalana sangkolong na kau' olaga nu belemiu na tuuma, ka' sa'angu' na batu olaga nu belemiu na tina. Belemiu madi' ahi' toka mae hi belengku, panyo ola mule' ahi' mompala'i Aku. Panyo de tokamo na tempo' nu kasusa'an, Akumo ahi' na olaga nu belemiu da tokamae momposalamat belemiu.

²⁸ Iyamo mae na pilogot nu belemiu anu bibinaumo nu belemiu? De ko kasusa'an, pokau na aha da momposalamat belemiu de memang ahi' aha moko ala! O Yehuda, pilogot nu belemiu sumomo ahi' konjoo'nyo nu kota' nu belemiu!

²⁹ Apaa na anu madi' oka'ima'i nu belemiu hi belengku sahingga belemiu madi'mo montuluti Aku?

³⁰ Ola palasuma' na belemiu Ku hukum, kalana belemiu madi' mongka'oho' montalima pokinde'. Pokakana susumo singa anu nangamu'mo, sumo aijo'mo na belemiu nompateimo to nabi-nabi nu belemiu.

³¹ O mian nu Israel potombihing mae na potataeng-Ku aiya. Pa' toho'mo na Aku susumo padang tampat anu mateges na jinadi' atina hi belemiu kabai pa' sumo tano' anu pinikatmo hondo? Panyo kadaka' belemiu notataemo koonyo nu belemiu, belemiu mongkahanda'imo bebas, ka' madi'mo daagi' mongka'oho' minsusule' mae hi beleng-Ku?

³² Pa' daagi' kolangkoyang anu bisa mongkolilimi palahiasannyo, kabai pa' daagi' ko boting boune anu bisa mongkolilimi baju'nyo nu boting? Panyo belemiu pininmo hondo na nongkolilimi mae Aku – salatanmo pe'e naipuan mae anu madi'mo opoko bilang na kopinnyo.

³³ Belemiu pande hondo na mongatun kapandean monggoda kinyonyoa nu sindua'an nu beleyum. Maumo ahi' mian anu saja' masala' tala-talalo hondo palaganta panyo daagi' ahi timbali balajan hi belemiu!

³⁴ Baju' nu belemiu binanodamo nu baso' nu mian kasiasi tiba mian anu madi' kosala'nyo, misa' baso' nu mian anu saja' montomang na ihakop. Panyo maumo ahi' sumo aijo',

³⁵ belemiu notatae koonyo nu belemiu, belemiu madi' kosala'nyo, koonyo nu belemiu Aku madi'mo daagi' montambuha'i belemiu. Panyo Aku, Tumpu mohukumo belemiu kalana belemiu madi'mo mongakui taalu' belemiu sinala'mo.

³⁶ Malia' hondo na belemiu mamba hi to pilo-pilogot nu bansa sangga'at momoita tulung! Belemiu saidi' mae mompele-pele'je hi Mesir, susumo belemiu nompele-pelemo hi Asyur.

³⁷ Belemiu saidi' mae mompala'imo Mesir ka' mompele-pele'mo ka' mule' ma ambangmo. Aku, Tumpu madi'mo nontalima aha anu ota-otaha'imani nu belemiu; madi' ko anu ohumpak nu belemiu na ka'untungan apa-apaa lengkat hi aha.”