YEREMIA 18 - KITAB NU TUMPU ALLA LELE MA'IMAI'

I Yeremia nambamo ilaigan nu mian anu biasa mombau kuhon tano'

¹ Tumpu notataemo mae hi belengku,

² “Lako' i laigan nu mian anu biasa mombau kuhon tano'; toka kiijo' mae Ku poto'ije hi beleyum na potuunon-Ku.”

³ Sahingga nambamo na Aku i laigan nu mian anu biasa mombau kuhon tano' ka' tinoang-Ku na ia hau-haunyo mokalaja mompake tuladan.

⁴ De maluanyo kuhon tano' anu nu bau aijo' madi' talalo ma'ima', kuhon aijo' po ule'mo nu bau ka' opotimbalimo kuhon tano' sangga'at susumo anu pa' mosia na nu kahanda'i.

⁵ Lantas Tumpu nompalentahmo aku da mompoto'i hi mian nu Israel,

⁶ “O mian anu palesayamo hi beleng-Ku. Te Aku madi' moko ala mombau hi belemiu susumo anu binaumo nu mian anu biasa mombau kuhon tano' aijo' itano' ponto aijo'? Susumo tano' ponto ilima nu mian anu biasa mombau kuhon tano', sumo aijo'mo suele na belemiu i uno nu limang-Ku.

⁷ De tokamo itempo'nyo Aku montantukanmo da mongalamo santuu' nu aha, mompatundu'mo ka' mohansunimo sa'angu' na bansa kabai kalaja'an,

⁸ lantas bansa aijo' balatobatno madi'mo mombau dosa' na ia, saba' madi'mo ahi' Ku sidahi na tanga'an-Ku aijo'.

⁹ Panyo mule' ahi' de maluanyo tinantukan-Kumo da mompotinjomo kabai mompohosonmo sa'angu' na bansang kabai kalaja'an,

¹⁰ panyo lapas mae bansa aijo' madi'mo tulu-tulutan hi beleng-Ku lantas mombaumo palabuatan anu ma'idek, saba' madi'mo ahi' Ku sidahi' na anu tinanga'an-Kumo aijo'.”

¹¹ Tumpu notataemo mae hi belengku, “Uuka aiya, poto'imo hi mian nu Yehuda tiba hi aha mian anu jojoong i Yerusalem taalu' Aku binatanga'mo da mongewamo aha, ka' nontoukaimo hukuman anu onabu'akonmo hi aha. Palentah na aha da bolimo mombau kabiasa'an nu aha anu baladosa' aijo' lantas mombabali'imo kalakuan nu aha tiba palabuatan nu aha.

¹² Panyo aha saidi' mae montaami, ‘Apaa na gunanyo? Kami na tataap ahi' montuluti posi pongka'oho' mami! Kami toto samian na mombau ahi' apaa na anu nu ka'ima'i nu kinyonyoa mami ma'i-ma'idek!’ ”

Mian nu Israel nohikumo Tumpu

¹³ Tumpu notatae, “Soba pokilawa hi toto sa'angu' na bansa pa' toho'mo jinadi' na han anu susumo aiya. Mian nu Israel nombaumo han anu okabuhuk hondo!

¹⁴ Madi' toho' madi'mo ko dondu'oknyo nu eis aita' ibungkutnyo nu batu i Libanon. Madi' toho' uee anu lop mo'ili aita' mae ibungkutnyo timbali mo'oti.

¹⁵ Panyo mian anu palesayamo hi beleng-Ku nongkolilimimo Aku, ka' nompapuimo kamangian sinombahkon hi pilogot. Aha tinasala'mo ijalan nai-naipuan mae anu tionyo ahi' nu tului nu aha, lantas noselemo namba ijalan anu ma'isa pinohata.

¹⁶ Lipu' aiya pinotimbalimo nu aha tampat anu okabuhuk hondo ka' saja'mo timbali bau sisik anu okokojoi. Iwi-iwi' na anu motulu ikiijo' mahalilokanmo ubak kalana mabuhukmo.

¹⁷ Susumo abu' nu tilahabakonmo nu mombun anu lengkat mae isasu kabete'an, sumo aijo'mo na mian anu palesayamo hi beleng-Ku, Ku bee'mo hi sampobali. De tokamo na kasilaka'an, Ku hikumo na aha ka' madi'mo daagi' montulungi aha!”

Kasangaja'an mongewamo i Yeremia

¹⁸ Mian notatae, “Imbo' da kita basangaja'mo mongewa i Yeremia. Misa' ola ia na bisa motatae, mompotoka apa-apaa hi Tumpu. Saja' daagi' ko imam anu timbali mombee'i pangajalan, daagi' ko mian pande anu timbali mombee'i pokinde'; ka' daagi' ahi' ko nabi anu timbali mompotoka mae hi kita potuunon-potuunon lengkat mae hi Tumpu Allah. Imbo' da okalaktomo na ia hi mian kopian ka' madi'mo daagi' kita mompotombihing potataenyo.”

¹⁹ Sahingga aku binalado'amo, “O Tumpu potombihingakon mae na do'angku; palahatikan apaa na anu tinaloakon mae nu aha sampobali'ku hi belengku!

²⁰ Pa' pantas na palabuatan anu ma'ima' obalosakon nu palabuatan anu ma'idek? Panyo aha nongkekemo bolo' da aku manabu' i unonyo. Inau'akon mae kalana aku nontinjohimo aha i ahop nu Belento, da Belento bolimo montambuha'i aha.

²¹ Panyo uuka aiya, Tumpu, bakasmo da to ana-anak nu aha matemo nu ohop kabai silakamo i uno nu pahampatean. Bakasmo da to bou-boune nu aha madi'mo ko langkai' nu aha ka' mule' madi'mo ko anak nu aha; bakasmo da to momo ane nu aha silakamo kalana panyakit anu molele ka' mule' to oli-olitau nu aha silakamo i uno nu pahampatean.

²² Palentah mae da nu potolokengkeng mae nu tololang na molambani mae laigan nu aha, sahingga aha lewa'mo mahakihisan kalana mabuhukmo. Aha nongkekemo bolo' da aku manabu'mo i unonyo, ka'aha nompota'anmo so'o bau pohakop nu aha aku.

²³ Panyo, Belento o Tumpu monsumbu' apaa na anu tinanga'anmo nu aha da mompateimo mae aku. Kalana aijo' bolimo mongampuni mae aha; bolimo mohapusi kasala'an nu aha. Dokemo na aha sampe tombahangkangmo. Baumo pa' apaa na obau hi aha kalana notambuha'mo na Belento.”