YEREMIA 16 - KITAB NU TUMPU ALLA LELE MA'IMAI'

Anu nu kahanda'i nu Tumpu hi Yeremia

¹ Tumpu po ule' mule' mae notatae hi belengku, Ia notatae,

² “Boli mo osoa ka' mohumpak anak itampat aiya.

³ Ku poto'ije hi beleyum apaa na anu jadi saidi' mae hi aha to ana-anak anu ihampe i aiya tiba hi aha tina tiba tuumanyo.

⁴ Aha silakamo nu kona nu panyakit anu ahi' monsilakaimo, ka' mule' aha silakamo i uno nu pahampatean kabai silaka kalana tempo' nu kasusa'an i anu okaan. Madi'mo daagi' ko samian anu mohangi kabai molamun aha. Bangke' nu aha mo enamo susumo pupuk i uno nu tano' ka' nu tolukmo nu tomonsi' tiba binatang anu mahangas.

⁵ Boli mamba hi aha mian anu hau-haunyo ko anumo sinilaka hi aha aijo', o Yeremia. Boli susa' maumo pa' ihe na sinilaka. Aku madi'mo daagi' mombalakati mian anu palesayamo hi beleng-Ku da mohumpak kantumuu'an ma'ima', ka' mule' madi'mo ahi' mompotoa kanonongan kabai mongkalibosi aha.

⁶ Mian anu kaya tiba mian anu kasiasi ilipu' aiya saidi' mae de silakamo madi'mo daagi' ko anu molamun aha. Madi'mo daagi' kosamian anu monsakisa butongnyo kabai mongkis ubaknyo salaku tanda susa' kalana ko anumo sinilaka na aha.

⁷ Ka' madi'mo daagi' ko anu mongadatakon bau-bauon sangkiding salaku tanda bau pohibun mian anu tinokanmo nu tomate. Madi'mo daagi' ko anu suele humang mau mule' kakona hi mian anu sinilakamo na tuumanyo kabai tinanyo.

⁸ Boli minsoop ilaigan nu mian anu mombau bau-bauon. Boli mongkaan ka' monginum tiba aha.

⁹ Potombihing mae apaa na anu Ku poto'i hi beleyum, Aku, Tumpu Allah Israel Anu Matangkas na Kuasanyo. Lewo' nu mian anu lame' ka' kalame'an ma'di'mo Ku pobee' iwi-iwi'. Han aijo' nu sakisije nu to mia-mian anu daagi' tumuu' na belemiu tempo uuka aiya.

¹⁰ De nupoto'imo na aiya iwi-iwi' hi aha, ugat nu pokilawamo nu aha kadaka' Aku mohukumo aha sumo aijo'mo na ko boatnyo. Nu pokilawamo nu aha pa' apaa na kasala'an tiba dosa' nu aha anu binaumo hi Belengku, Tumpu Allah nu aha.

¹¹ Poto'i hi aha Aku notatae sumo uuka, ‘Mompolee' nu belemiu nompala'imo Aku da monsombahmo ka' palesayamo hi pilogot sangga'at. Aha nonteemo Aku ka' madi'mo nongka'oho' nontuluti sinin na atulan-Ku.

¹² Panyo belemiu nombau mule' lebe ma'idek. Belemiu panggaga ka' ola saja' mombatuki posi pongka'oho' nu beleyum anu ma'idek atina'. Belemiu madi' mongka'oho' montuluti Aku.

¹³ Kalana aijo' belemiu Ku laa'mo da madi'mo jojoong ilipu' aiya ka' Ku boamo isa'angu' na lipu' anu madi' hondo-hondo osumbu' nu belemiu ka' mompolee' nu belemiu. Ikiijo' mae belemiu monsombahmo to pilo-pilogot sangga'at sinaa tiba pihi, ka' Aku madi'mo mongkalibosi belemiu.’ ”

Mian anu palesayamo hi Tumpu minsusule'mo mae lengkat ipinomboan ka' pinompojoongan aha

¹⁴ Tumpu notatae, “Tokaje mae na tempo'nyo mian madi'mo basumpa' atas sanggong-Ku, Tumpu Allah anu tumuu', anu nomboamo mian nu Israel nosabat lengkat mae i Mesir,

¹⁵ panyo atasmo sanggong-Ku, Tumpu Allah anu tumuu' anu nomboamo mian nu Israel nosabat lengkat mae isa'angu' na lipu' sasu utara ka' lengkat mae ilipu' iwi-iwi' sangga'at anu pinongga'a-ga'atakonan-Kumo aha. Aha po ule'mo Kusule'akon mae itano' nu aha, lipu' anu binee'-Kumo hi mompolee' nu aha.”

Hukuman anu saidi' mae onabu'akonmo hi aha

¹⁶ Tumpu notatae, “Aku kahanda'mo molaga manjoo' na anu saja mompagala ikan da mohakop mian haha aiya. Lapas aijo' Aku kahanda'mo molaga manjoo' na anu saja' mombebas da mombebasi aha aita' mae itoto sa'angu' na bungkutnyo tiba puge'nyo ka' mule' itoto sa'angu' na liang nu bungkutnyo nu batu.

¹⁷ Aku montoamo sinin na anu nu bau nu aha. Madi'mo daagi' ko anu naninsuluk da madi' Ku toa; dosa' nu aha mule' tinoang-Kumo.

¹⁸ Dosa' tiba palabuatan ma'idek nu aha Ku balosakonmo nu hukuman pinduan lipat, kalana aha nohenyuimo lipu'-Ku nu pilogot manjoo' hondo. Pilogot haha aijo' madi' konyawanyo sumomo ahi' bangke' nu mian anu sinilakamo.”

I Yeremia nongakuimo kapalesaya'annyo hi Tumpu

¹⁹ O Tumpu, Belentomo na nonjagaimo mae aku ka' nombee'imo mae kahosonan hi belengku; Belento nontulungimo mae aku tempo'nyo i uno nu kasusa'an. To bansa-bansa lengkat mae ipuus nu tano' tokamo mae hi Belento ka' motatae, “Mompolee' mami daagi' ko pilogot anu madi' totu'u ka' madi' ahi' hondo-hondo kokaliangannyo.

²⁰ Te moko ala na manusia mombau posi pilogotnyo? Tantu madi' ahi'! Anu binaunyo aijo' memang misa'ahi' Tumpu Allah.”

²¹ “Kalana aijo',” Tumpu notataemo, “minsan uuka Ku pojadimo na to bansa-bansa da mongoa'i kakuasa'an tiba kahosonan-Ku da sampe toka sidu-sidutu' na nu sumbu' nu aha taalu' Akumo ahi' na Tumpu.”