YEREMIA 12 - KITAB NU TUMPU ALLA LELE MA'IMAI'

I Yeremia notusa'mo hi Tumpu

¹ “De ku poto'i na palakalangku hi Belento, o Tumpu, tantu saidi' mae onyata' je memang ahi' Belento na totu'u. Panyo aku ko kahanda'ahi' mompoto'i hi Belento mongkona han ka adilan: Kadaka' mian anu palabuatannyo ma'idek na mohumpak kantumuu'an ma'ima'? Ka' mule' kadaka' mian anu tageo' na kinyonyoanyo na mohumpak kabilahian?

² Sinu'anmo nu belento na aha susumo sosu'anon, lantas aha nimbakatmo, tinumuu'mo, ka' nimbua'mo. Aha saja mombisalakon anu toto ima-ima' mongkona butong nu Belento, panyo i uno nu kinyonyoa nu aha, aha sabenannyo ahi' madi' mompajuli Belento.

³ Panyo Belento o Tumpu monsumbu' aku. Tinoamo nu belento mae apaa na anu binaungkumo, ka' Belento monsumbu' ahi' mosia na anu ku oa'i i uno nu kinyonyoangku padon atina' hi Belento. Boa na mian anu toto ide-idek na palabuatannyo haha atina' isambiha'nyo, boa na aha susumo domba itampat pongkolotan. Jagai na aha sampe tokamo na tempo'nyo aha okolotmo.

⁴ Daagi' toka hipian na kopinnyo lipu' aiya manggasmo ka' hemputnyo magayoumo i iwi-iwi na ale'? Tomonsi' tiba binatang sangga'at natemo kalana palabuatan ma'idek nu bansa mami. Aha notatae, tukoonyo nu aha aku madi'mo montoa pa' mosia na ka ahenannyo saidi' mae na aha.”

⁵ Tumpu notatae, “O Yeremia, de beleyum malawemo na pailomba tiba manusia, tantu lebe mule' ahi' madi' nu poko ala na pailomba tiba ajahan? De itano' anu aman beleyum mabuhukmo, tantu lebe mule' madi' ko anu nu poko ala nu bau de beleyum kiijo' mae i alas isonibi nu Yordan?

⁶ Beleyum kinabisa'anmo, pakalaus mule' ahi' tibamo to utu-utus nu beleyum na nongkabisa'i; aha suele ahi' nolambanimo beleyum. Boli opalesaya na aha, maunyomo ahi' matami' na potatae nu aha.”

Tumpu sinusa'mo kalana mian anu palesayamo hi Ia

⁷ Tumpu notatae, “Tampat kajojoongan-Ku madi'mo daagi' pinajulian-Ku, lipu' anu Akumo na tumpunyo pinala'ian-Kumo ka' mian anu palesayamo hi belengku anu Ku kalibosi binee'-Kumo ilima nu sampobali' nu aha.

⁸ Mian anu pinile'an-Kumo pinanggagamo hi beleng-Ku; susumo singa i uno nu alas sumo aijo'mo na aha mohu'akon Aku. Mokonyo aijo' kina'idekan-Kumo na aha.

⁹ Aha sumomo ahi' tomonsi' anu kahanda'mo nu sabut nu bonyia' anu lengkat mae iyaya na tampat. Lagamo mae iwi-iwi' na binatang nu alas da suele ahi' mongingkotimo aha.

¹⁰ Nanjoo'mo na anu balakuasa lengkat mae isalipu'an nongideimo ale' nu anggur-Ku ka' sola'mo nompahampeja'akon ale'-Ku. Lipu'-Ku anu ma'ima' hondo binali'anmo nu aha sahingga tinimbalimo padang tampat anu mateges ka' iliingmo.

¹¹ Ya, tinoang-Kumo na aha nompojadi lipu'-Ku tampat anu iliingmo hondo ka' nonsusa'imo kinyonyoang-Ku. Iwi-iwi' madi'mo ko anu nongkalesang, madi'mo ko anu nompalahatikan.

¹² Lengkat mae aijo' ipadang tampat anu mateges anu aita' mae ibungkutnyo, to mia-mian tinokamo mae kahanda' montololangi. Pinotokang-Kumo mae na pahampatean da mongideimo iwi-iwi' na lipu' sahingga madi'mo daagi' ko samian na anu tumuu' dame.

¹³ Mian anu palesayamo hi beleng-Ku montugan gandum panyo ola ahi' hii' na ihumpak na hasinnyo. Aha binala usahamo ahi' totu-totu'u, panyo usaha nu aha madi' ahi' ko anu ihumpak apa-apaa. Aku notambuha'mo hondo' sahingga madi'mo jinadi na aha nohumpak bua'nyo.”

Palajanjian nu Tumpu hi negara-negara anu mompaha ohani Israel

¹⁴ Tumpu notatae, “Uuka na potuunon-Ku mongkona negara-negara anu mompaha ohani Israel anu nongideimo lipu' anu binee'-Kumo hi mian anu palesayamo hi belengku aha Israel. Susumo sosu'anon anu ginautakonmo itano' sumo aijo'mo na aha mian anu palabuatannyo ma'idek Ku sabatakonmo da madi'mo jojoong ilipu' nu aha, ka' Yehuda Ku lapasakonmo da madi'mo nu kuasai nu aha.

¹⁵ Panyo salatan osabatakonmo na aha, po ule'je ahi' Ku kalibosi na aha; batu-batu bansa po ule'mo Ku sule'akon mae minsusule' iposi lipu' nu aha.

¹⁶ De aha totu-totu'umo ahi' na montalima agama nu mian anu palesayamo hi beleng-Ku ka' basumpa'mo ahi' ka' motatae, ‘Tiba sanggo nu Tumpu anu tumuu',’ – susumo naipuan mae aha nongajanmo mian anu palesayamo hi beleng-Ku binasumpa'mo tiba sanggo nu Baal – sahingga aha suele minsoopmo mian anu palesayamo hi beleng-Ku ka' mohumpakmo kantumuu'an anu ma'ima'.

¹⁷ Panyo bansa anu madi' mongka'oho' montuluti Aku, saidi' mae Ku gautakonmo susumo sosu'anon ka' Ku ingkotimo. Aku, Tumpu notataemo.”