YEREMIA 10 - KITAB NU TUMPU ALLA LELE MA'IMAI'

Monsombah pilogot

¹ O mian nu Israel, potombihing mae na potuunon nu Tumpu toka hi belemiu.

² Ia notatae, “Bolimo mombau kabiasa'an nu to bansa-bansa sangga'at ka' boli tolokengkeng na montoa tanda-tanda aita' ilangit anu nunu kabuhuk nu bansa haha aijo'.

³ Adat nu bansang haha aijo' madi' hondo ko gunanyo. Aha montaa' kau' i alas ka' opoki bau hi tukang kau' da bau patong nu pilogot.

⁴ Lapas mae patong aijo' nu opakeimo nu aha nu mosoni' tiba salaka, lantas opaku'imo da mahoson ka' madi' manabu'.

⁵ Patong pilogot haha aijo' sumo mian na lupanyo anu opo una' i ale' nu kantimun. Aha madi' moko ala motatae, madi' moko ala tololangkas, ka' tionyo ahi' ohangkat. Boli okabuhuk na aha kalana aha madi' moko ala mombau anu ma'idek hi belemiu; ka' mule' mombau anu ma'ima madi' ahi' nu poko ala nu aha.”

Monsombah Tumpu

⁶ Tumpu anu talasanggo hondo Belento madi' ko anu moko ala mongkakanai sanggo nu Belento talasanggo hondo ka' balakuasa hondo.

⁷ Ihe na madi' mongka'oho' tundu' hi Belento, tomundo' nu aha bansa iwi-iwi'? Memang, Belento patut hondo o, adati. Iwi-iwi' na anu pande hi aha to bansa-bansa ka' hi aha iwi-iwi' na tomundo' nu aha, madi' ko samian pe'e na timbali pompokakana i tiba butong nu Belento o, Tumpu.

⁸ Ponga' ka' waweng na aha iwi-iwi' kalana pilogot nu aha ola kau' samata-mata madi' moko ala mompogulu' anu kogunanyo.

⁹ Ia ilapisan nu salaka tiba mosoni' anu binoa mae lengkat i Spanyol ka' lengkat mae i Ufas, iwi-iwi' anu binau nu lima nu mian topo ukin tiba tukang tutuk mosoni'. Baju'nyo hude anu mingkamumu' hondo tiba anu madi' talalo mingkamumu' tinonun nu anu pande montonun ka' talalo ahi' pinokopianan.

¹⁰ Panyo Belento, Tumpu Allah anu totu'u Tumpu Allah anu mombee'i mae kantumuu'an, tomundo' anu sampe toka sidu-sidutu'. De Belento pusamo tano' gayu'anmo de Belento motambuha'mo to bansa-bansa madi' moko ala mongahopi. (

¹¹ Belemiu o manusia tionyo ahi' mompoto'i hi aha taalu' to pilo-pilogot anu madi' nompotimbali langit tiba tano' aijo' opateimo. Aha madi'mo daagi' tumuu' itano' aiya.)

Nyanyian bau pompuji Tumpu Allah

¹² Tumpu nompotimbalimo tano' kalana kakuasa'an-Nyo, nombontukmo dunia kalana kapandean-Nyo ka' nombokamo langit kalana suele kapandean-Nyo.

¹³ Ola pinalentah-Nyo binuhokanmo na uee aita' ilanga Lengkat mae ipuusnyo nu tano' pinotoka-Nyomo mae na kundom, ka' pinojadi-Nyomo na kilat pojingkalap i uno nu ujan, ka' sinai-Nyomo mae na mombun lengkat itampat pinompo una'an-Nyo.

¹⁴ Salatan nontoamo aijo' iwi-iwi' nangalati'je na manusia taalu' ia ponga' ahi' ka' madi' ahi' ko anu nu pisumbu-sumbu'. To tuka-tukang anu pande montutuk mosoni madi'mo pinalesaya, kalana patong pilogot anu binaunyo aijo' madi' ko kaliangannyo ka' mule' madi' ko santuu'nyo.

¹⁵ Pilogot haha aijo' madi'mo ko halaga'nyo, pantasmo ahi' na oletakon ka' lewa' o, alu. De tokamo mae na tempo'nyo aha opateimo.

¹⁶ Tumpu Allah i Yakub na madi' ahi'susumo pilogot haha aijo'; Ia na nompotimbali iwi-iwi na apaa. Sanggo-Nyo aijo'mo Tumpu Anu Mahakuasa; Ia nompile'imo Israel da timbalimo mian anu palesayamo hi Ia.

Tinokanmo nu buhuk na lipu'

¹⁷ Mian anu jojoong i Yerusalem, belemiu otumbuhi! Kalana aijo' pogompilingmo!

¹⁸ Uuka aiya Tumpu momboamo iwi-iwi' na bansang Yehuda itampat pompojoongan; belemiu iwi-iwi' Nu hansunimo ingko-ingkot. Sumo aijo' na potuunon mae lengkat hi Tumpu.

¹⁹ Mian anu jojoong i Yerusaem notataemo daka-daka', “Kami binelaonmo daka' hondo ka' madi'mo opoko ala opakuli'i da ma'alin. Momonanyo sinangka mami saba' kasansala'an aiya opoko ala ahi' osimbu mami, padahan madi' ahi'.

²⁰ Kemah mami na'idekmo tiba kahohon bau pompuuti singkapmo nobotu'. Madi'mo daagi' ko anu moko ala mombau kemah ka' mompaha pokona hudenyo kalana to ana-anak nambamo.”

²¹ Aku nontaamimo, “Pinonga'mo na polaya'to haha aijo'. Aha madi'mo nomoita pokinde' hi Tumpu, aijo' na sababnyo apaa na anu nu tanga'i nu aha madi' jadi, ka' kita notuhekapmo namba iyaya mae.

²² Potombihing mae! Daagi' ko lele koonyo nu aha sa'angu' na bansa isasu utara nompopobuhukmo mae. Suludadu nu aha mompojadimo kota-kota' nu Yehuda liingmo ka' madi'mo daagi' ko anu monjojoongi. Dedeng nu alas maninsulukmo kiijo' mae.”

²³ O Tumpu, madi' ko samian pe'e na anu mahakuasa timbali montantukan uki'nyo kabai moko ala mosi tantukan jalan nu kantumuu'annyo.

²⁴ Doke mae na kami o Tumpu panyo boli ahi' talalomo opolanit na mondoke mae. Ka' boli ahi' mohukum mae kami de Belento hau-haunyomo pusa, kalana tantu kami silakamo ingko-ingkot.

²⁵ Potudunje na kapusan nu Belento hi aha to bansa-bansa anu madi' mongakui Belento ka' madi' monsombah Belento. Kalana aha nonsilakaimo mian anu palesayamo hi Belento ingko-ingkot ka' mule nohansunimo lipu' mami.