YEHEZKIEL 8 - KITAB NU TUMPU ALLA LELE MA'IMAI'

KOPINDUANNYO I YEHEZKIEL NONTOA ANU PINOTOA NU TUMPU ALLAH HI IA MONGKONA TUMPU ALLAH 8:1–10:22 Pensomban pilogot i Yerusalem

¹ I tanggan olima' bitu'on ko anomnyomo ka' mule', i taun anu kino anomnyomo tempo'nyo kami daagi' kiijo' mae itampat pinomboan ka' pinompojoongan, to pola-polaya' nu aha mian anu binoa ka' pinojoongmo kiijo'mae aijo'mo aha mian Yehuda tinokamo mae ilaiganku ka' kinosusuhangmo tiba aku. Mamanga ahi kakuasa'an nu Tumpu Anu Matangkas na Kuasanyo nongkuasaimo mae aku.

² Aku tinolosindamo no kiita' ka' nontoamo anu susumo manusia. Lengkat ilampeokannyo mokaiyong i tengkenyo otoa sumomo ahi' apu ka' mule' lengkat ilampeokannyo mokiita' i ubaknyo otoa sumomo ahi' tambaga' anu ginegesanmo.

³ Ia nonguluakonmo mae anu susumo lima lantas nontoongimo bulu nu ubaku. Lantas tinoangku, aku ihangkatmo tangka-tangkas nokiita' ilanga nu Roh nu Tumpu ka' binoamo i Laigan nu Tumpu i Yerusalem isabatan pinsoopan mokiijo' ipopasannyo anu i unonyo sasu utaranyo. Ikiijo' daagi' ko patong nu pilogot anu nonsaduakonmo da Tumpu notambuha'.

⁴ Lantas aku nonsakisimo jingka anu majingka hondo salaku tanda Tumpu nu Israel tinokamo, pokakana susumo anu tinoangkumo tempo'nyo aku kiijo' mae i sonibi nu Kaunyo Kebar.

⁵ Tumpu notataemo hi belengku, “O, manusia anu madi' tumuu' batu, soba toa mokiita' sasu utara.” Lantas tinulutankumo ka' isasu mezbah koko jalan pinsoopan, aku nontoamo patong nu pilogot anu nonsaduakonmo Tumpu notambuha'.

⁶ Tumpu notataemo hi belengku, “O, manusia anu madi' tumuu' batu, tinoamo nu beleyum apaa na anu jinadimo? Palahatikan na palabuatan-palabuatan anu okahegati bibinaumo nu aha Israel anu nompojo'onmo Aku i Laigan-Ku! Imbo'da Kupotoa hi beleyum hahan anu lebe mahumimi' mule'.”

⁷ Lantas binoa-Nyomo na aku isabatan pinsoopan ipopasan anu isambiha'nyo ka' mule' pinotoa-Nyomo mae na sa'angu' na bolo' ipagan mesen.

⁸ Ia notataemo mae, “O, manusia anu madi' tumuu' batu, soba podaka' na bolo' aijo'.” Salatan binaungkumo na aijo', aku nontoamo sa'angu' nasabatan.

⁹ Ia notataemo mae hi belengku, “Pinsoop ka' soba toa na palabuatan-palabuatan anu mahumimi' ka' okahegati anu binaumo nu aha ikiijo'.”

¹⁰ Aku ninsoopmo ka' tinoangkumo. Songko-songko na pimpi'nyo anu aijo' i unonyo pinaha gambalanmo nu ngangahan nu ulo tiba to bina-binatang anu madi' toho' okaan, ka' mule' ngangahan nu gambalan nu pilogot anu nu sombah nu aha mian Israel.

¹¹ Aha pitumpulu' na to pola-polaya' nu bansang Israel daagi' ikiijo' tua-tuangmo suele ikiijo' na i Yaasaya anak i Safan. Toto samian montoongi sa'angu' na anu pinompapuanmo kamangian anu kinopuha-puhamo na tibuknyo.

¹² Tumpu notataemo hi belengku, “O, manusia anu madi' tumuu' batu, tinoamo nu beleyum apaa na anu binaumo nu to pola-polaya' nu Israel pohowini nu aha na mombau aijo'? Aha monsombah i unonyo aijo' kalana koonyo nu aha Aku nompala'imo lipu' aiya, ka' madi' mule' montoa palabuatan nu aha.”

¹³ Lantas Tumpu notataemo hi belengku, “Beleyum montoaje aha mombau han anu lebe mule' okahegati.”

¹⁴ Lantas binoa-Nyomo na aku isabatan daka' sasu utara Laigan nu Tumpu ka' pinotoa-Nyomo hi belengku na to bou-boune mohaangi Pilogot Tamus sinilakamo.

¹⁵ Tumpu nompokilawamo mae hi belengku, “O, manusia anu madi' tumuu' batu, tinoamo nu beleyum na han aijo'? Daagi' lebe manjoo' mule' na aku okahegati.”

¹⁶ Lantas binoa-Nyomo na aku i popasan nu Laigan nu Tumpu. Koko pinsoopan mamba mokiijo' i unonyo nu anu susi' i'olot nu mezbah tiba jalan ise-ise' daagi' ko mian aha uampulu' ka' olima'. Aha mohiku unonyo anu susi' ka' tinolodadupumo ka' monsombahmo mongahopi kabete'an i sinaa anu bete'mo mae.

¹⁷ Tumpu notatae hi belengku, “O, manusia anu madi' tumuu' batu, tinoamo nu beleyum na aijo'? Aha mian nu Yehuda haha aiya madi' puas de ola mombau hahan anu okahegati haha aijo' ka' palabuatan-palabuatan anu misa'mo palabuatan nu manusia isongko-songko na lipu'. Panyo aha mombau mule' ahi' palabuatan haha aijo' i uno nu Laigan-Ku aiya ka' nonsaduakonmo Aku da nompaka potambuha' mule'. Soba toa mosia na aha mongambangimo mae Aku nu palabuatan anu mahumimi' hondo aiya!

¹⁸ Aha mongoa'ije tambuha'-Ku anu taha-tahahumo! Aku madi'mo daagi' mongampuni kasala'an nu aha. Maunyomo ahi' aha' moloboo'akonmo mae daka-daka' do'a nu aha hi beleng-Ku, panyo Aku na madi'mo ahi' mongka'oho' mompotombihing!”