YEHEZKIEL 5 - KITAB NU TUMPU ALLA LELE MA'IMAI'

I Yehezkiel nongkiismo ubaknyo

¹ Tumpu notatae, “O, manusia anu madi' tumuu' batu, ala na bajak anu matajom hondo da bau pongkiis ingko-ingkot na jangkut nu beleyum ka' ubak nu beleyum. Lapas aijo' timbangmo na bulu haha aijo' itimbangan lantas obagimo totolu' na bagian.

² Sambagian tionyo ahi' nu papui itotonga' nu kota' aijo' de lapasmo na otumbuhi. Ka' sambagian mule' tionyo ahi' nu posusuk i bajak nu beleyum lantas nu lajangakonmo titikup ikota' aijo'. Ka' mule' sambagian anu imihi-mihinyo tionyo ahi' nu sambuangakon mokiita' ilanga, lantas Ku loloi'mo nu bajak-Ku.

³ Po'una' sangkiding na ubak aijo' ka' opo isi i uno nu lipatan nu juba' nu beleyum.

⁴ Lapas aijo' ala sangkiding mule' na bulu haha aijo' ka' lumbu'akon i apu ka' pojohokmo da ia mopapu. Lengkat ikiijo' apu aijo' molelemo mamba i songko-songko na bansa Israel.”

⁵ Tumpu Anu Matangkas na Kuasanyo notatae, “Soba toa aiyamo na Yerusalem. Kota' aiya Ku po una'mo i puso nu dunia tiba nega-negara sangga'at anu mompaha ohani.

⁶ Panyo Yerusalem madi'mo nontalima palentah-ngKu ka' lebemo na'idek ilingkuduannyomo na bansa-bansa sangga'at, ka' mule' lebemo madi' tulu-tulutan ilingkuduannyomo na nega-negara anu mompaha ohani. Yerusalem nolanggimo sinin na palentang-Ku ka' mule' madi'mo nontuluti sinin na atulan-Ku.”

⁷ Tumpu Anu Matangkas na Kuasanyo notatae, “O, Yerusalem, potombihing mae! Beleyum madi'mo nontuluti iwi-iwi na palentang-Ku ka' mule' iwi-iwi na atulan-Ku: beleyum talalo hondo madi' mompajuli nu lingkuduimo na bansa-bansa sangga'at anu mompaha ohani beleyum ka' mule' nontulutimo adat nu bansang haha aijo'.

⁸ Sahingga Aku, Tumpu Anu Matangkas na Kuasanyo mompoto'imo saba' Akumo na sampobali' nu beleyum. Beleyum Ku hukumje i ahop nu to bansa-bansa sangga'at.

⁹ Kalana iwi-iwi' na palabuatan nu beleyum anu Ku ka'ideki sahingga anu jojoong atina' hi beleyum Ku hukumje tala-talalo nu hukuman anu ma'isa toho binaung-Ku ka' mule' madi'mo daagi' po ule' Ku bau.

¹⁰ Tuuma tiba tinanyo mongkaanmo posi anaknyo ka' mule' anak mongkaanmo tuuma tiba tinanyo. Sumo aijo' na aha Ku hukum, ka' anu daagi' tumuu' Ku ga'a-ga'atakonmo oboa i iwi-iwi na tampat.

¹¹ Aku aiyamo na Tumpu anu tumuu', Tumpu Anu Matangkas na Kuasanyo, ka' aiyamo na potataeng-Ku: Kalana beleyum nohumimi'imo Laigan-Ku nu palabuatan nu beleyum anu ma'idek ka' anu okahegati, Ku hansunimo na beleyum madi'mo ko ampunnyo.

¹² Obagi totolu' na mian anu jojoong atina' hi beleyum sambagian na silakamo kalana panyakit anu molele ka' kalana balaa' kasusa'anmo i anu okaan na toka mae ikota' atina'. Sambagian opateimo nu bajak isambiha'nyo nu kota' ka' sambagian mule' Ku taumo mamba i iwi-iwi na tampat ka' Ku loloi'mo nu bajak.

¹³ Beleyum mongoa'imo tambuha'-Ku anu taha-tahahumo ka' mule' Aku mangamu'mo sampe Aku puasmo. Salatan iwi-iwi' aijo' jadimo atina'je ka beleyum palesaya taalu' Akumo ahi' na Tumpu anu notataemo hi beleyum kalana Aku notambuha'imo beleyum madi' tulu-tulutan.

¹⁴ Beleyum timbalimo bakas nu kahansunan ka' to bansa-bansa anu mompaha ohani beleyum mongkokojoimo beleyum; mian anu motulu madi'mo mati ohani hi beleyum.

¹⁵ De Aku motambuha'mo ka' pusamo hi beleyum ka' mule' mohukumo beleyum, iwi-iwi na bansa anu mompaha ohani beleyum mabuhukmo. Aha saidi' mae mongkokojoimo beleyum ka' bubunmo na montoa beleyum.

¹⁶ Ku hansunimo na palasadia'an nu anu okaan nu beleyum ka' mule' mompojohokmo mian anu jojoong hi beleyum da susa'mo i anu okaan. Aha saidi' mae mongoa'imo mosia na kosakisanyo na mo'ohop sumomo ahi' hihis nu pana' anu matajom hondo na monsusuk ka' mompateimo beleyum.

¹⁷ Misa' ola kasusa'an i anu okaan panyo panyakit suele anu molele Ku potokamo mae, ka' mule' buhingison ka' pahampatean anu mompateimo mian anu jojoong atina' hi beleyum, tiba binatang anu toto maha-mahangas mompateimo to ana-anak nu aha. Akumo na Tumpu, anu notataemo.”