YEHEZKIEL 48 - KITAB NU TUMPU ALLA LELE MA'IMAI'

Pembagian tano' anu obee' hi aha tulunan nu bansa Israel

^1-7 Potempasan nu tano' anu isasu utara komantannyo mamba sasu kabete'an lengkat pe'e mae i Ambai anu i Totonga'nyo lantas mompatuimo kota' Hetlon, jalan mamba i Hamat, kota' Hazar-Enan, toka-toka ipotempasan olot nu kota' Damsyik tiba kota' Hamat. Tulunan nu bansa haha aiya tionyo ahi' bubu' mohumpak tano' bola-bola aijo' lengkat ipotempasan sasu kabete'an lambakonnyo toka-toka i Ambai anu i Totonga'nyo, otampu'uni lengkat mae i utara lau-laus mamba isasu salatan. Dan Asyer Naftali Manase Efraim Ruben Yehuda

Daerah anu pinosadiamo ipuso nu lipu' aijo'

⁸ Bahagian aiya anu ingala itano' aijo' bolimo opotuang itano' sangga'at da baumo posadiaon. Komantannyo tionyo ahi' 12,5 kilometen lengkat ipotempasan sasu utara toka-toka isasu salatan. Potempasannyo sasu kabete'an tiba kinsoban tionyo ahai' pokakana na komantannyo tiba bahagian-bahagian anu binee'mo hi tulunan nu bansa Israel. Laigan nu Tumpu saidi' mae aijo'mo na pombauan ibahagian aijo'.

⁹ Sambahagian na daerah aijo' oposadiamo bau bagi nu Tumpu, aijo'mo tano' anu ibahagian pusonyo, komantannyo 12,5 kilometen ka' mule' kobolanyo 10 kilometen.

¹⁰ Ibahagian totonga'nyo na tano' aijo' pombauanmo Laigan nu Tumpu. Aha to ima-imam tionyo ahi' mohumpak tano' i daerah anu susi' aijo'. Bahagian nu aha aijo'mo 12,5 kilometen lengkat mae isasu kabete'an lamba-lamba sasu kinsoban ka' olima' na kilometen lengkat mae isasu utara lamba-lamba isasu salatan.

¹¹ Daerah anu pinosadiamo aijo' ahamo to ima-imam na tumpunyo anu tulunan mae i Zadok. Aha tinulu-tulutanmo na nombau apaa na anu pinalentahkon nu Tumpu ka' madi' susumo aha mian nu Lewi anu bubu' mae sa'a-sa'angu' na tulunan, nonombaumo dosa' suele tiba aha mian nu Israel sangga'atannyo.

¹² Kalana aijo' kona hi lee' mae i Zadok aijo' tionyo ahi' obee'i tano' anu pinosadiamo isohipi' nu tano' anu saidi' mae obee'mo hi aha mian nu Lewi. Ka' tano' anu pinosadiamo aijo' susi' hondo.

¹³ Tano' nu aha mian nu Lewi haha aijo' komantannyo 12,5 kilometen lengkat mae isasu kabete'an lamba-lamba sasu kinsoban, ka' kobolanyo 5 kilometen lengkat mae isasu utara lamba-lamba isasu salatan ka' mompahaduhus tiba tano' nu aha to ima-imam.

¹⁴ Maumo ola sanjangan na tano' aijo' madi' timbali nu pobaluk nu aha kabai nu potolos nu aha; bahagian anu ma'ima' hondo na tano' nu aha Israel madi' timbali molalin hi lima nu mian sangga'at, kalana tano' aijo' pinosadiamo bau bagi nu Tumpu ka' iamo na tumpu-Nyo.

¹⁵ Isasu salatan na tano' anu pinosadiamo aijo', daagi' ko labinyo ko mantannyo 12,5 kilometen ka' ko bolanyo ohua' ka' mintonga' na kilometen. Bahagian aijo' madi' susi' ka' timbali nu pake nu mian da'isan bau kajojoongan ka' bau tampat tumuu'an nu hemput, ka' ibahagian totonga'nyo na pombauanmo ahi' kota' sa'angu'.

¹⁶ Kota' aijo' obau sulapa' opat, toto sa'angu' na sulapa'nyo ukulannyo ohua' ka' seperempat na kilometen.

¹⁷ Titikup i kota' aijo' iwi-iwi' tionyo ahi' daagi' ko tano' anu loas ka' ko ewanyo 125 na meten.

¹⁸ Isasu kabete'an ka' kinsoban ikota' aijo' daagi' ko tano' anu loas anu ukulannyo toto sa'angu' lima kali dua setenga' kilometen. Ohu-ohua' na tano' loas ai-aijo' tionyo ahi' opake bau pongale'an nu aha mian anu jojoong i kota'.

¹⁹ Aha mian iwi-iwi' tulunan nu Israel anu jojoong i kota' aijo' timbali mongale'i tano' aijo'.

²⁰ Jadi songko-songko na daerah aiya tibamo tano' anu pinosadia tiba tano' pombauan kota' kobolanyo sulapa' opat ka' ukulannyo 12,5 kilometen toto sa'angu' na sulapa'nyo.

^21-22 Tano' anu isasu kinsoban ka' anu ikabete'an i daerah anu pinosadiamo pombauan Laigan nu Tumpu, ka' to ima-imam ka' aha mian nu Lewi ka' mule' kota' aijo', aijo' bagi nu anu balakuasa mompalentah. Isasu kabete'an nu tano' aijo' ko loasnyo toka-toka ipotempasan sasu kabete'an ka' isasu kinsoban toka-toka i Ambai anu i Totonga'nyo i olot nu tano' Yehuda tiba tano' nu Benyamin.

Tano' bau bagi nu tulunan nu bansa sangga'at

^23-27 Tano' anu isasu salatan daerah anu pinosadiamo aijo' baumo bagi nu to tulu-tulunan nu bansa sangga'at. Ko loasnyo nu tano' aijo' lengkat pe'e mae i potempasan sasu kabete'an lau-laus isasu kinsoban toka-toka i Ambai anu i Totonga'nyo, ka' binagimo lengkat mae isasu utara namba isasu salatan sumo uuka na lundu-lunduannyo: Benyamin Simeon Isakhar Zebulon Gad

²⁸ Isasu salatan tano' nu Gad ko potempasan anu lengkat mae isasu barat daya Tamar montulu mata nu uee Kades-Meriba, lantas mompatuimo mamba isasu barat laut iyamo ahi' komantannyo tiba potempasan ka' Mesir toka-toka i Ambai anu i Totonga'nyo.

²⁹ Tumpu Anu Matangkas na Kuasanyo notatae, “Sumo aijo' na tionyo ahi' mombagi tano' aijo' hi aha to tulu-tulunan nu bansa Israel.”

Sabatan toto daka-daka' nu Yerusalem

^30-34 Sabatan pinsoopan i kota' Yerusalem iwi-iwi'mo sampulu' ka' ohua'. Opa-opat na pagannyo mesen toto sa'angu' ukulannyo ohua ka seperempat na kilometen, ka' ko sabatannyo daka' totolu'. Toto sa'angu' na sabatan daka' haha aijo' sinanggohan susumo sanggo nu sala'sa'angu' na sanggo nu tulunan nu bansa Israel. Sabatan toto daka-daka isasu utara sinanggohan Ruben, Yehuda, tiba Lewi; sabatan toto daka-daka i pagan mesen sasu kabete'an sinanggohan Yusuf, Benyamin, tiba Dan; anu i pagan mesen sasu salatan daagi'ko to sanggo-sanggo Simeon, Isakhar, tiba Zebulon; panyo anu i pagan mesen sasu kinsoban sinanggohan Gad, Asyer, tiba Naftali.

³⁵ Songko-songko na pagan mesen aijo' komantannyo osio' na kilometen. Ka' lengkat itempo' aiya mian nonsanggohimo kota' aijo': “DAAGI' KO TUMPU IKIIJO'!”