YEHEZKIEL 45 - KITAB NU TUMPU ALLA LELE MA'IMAI'

Lipu' anu oposadia samata-mata bau bagi nu Tumpu

¹ Ma'isa pe'e tano' aijo' obagi-bagiakon da timbalimo tano' pusaka' nu totosa'angu' na tulunan nu bansang, tionyo ahi' oposi po iwi'mo sa'angu' na bahagian da bau bagi nu Tumpu. Tano' aijo' tionyo ahai' komantannyo 12,5 kilometen ka' mule' kobolanyo 10 kilometen. Songko-songko na daerah aijo' otantukanmo tano' anu sinusi'mo.

² Da bau pombauan Laigan nu Tumpu oposadiamo itano' aijo' sambahagian anu sulapa' opat, ukulannyo 250 meten toto sambiha' na sulapa'nyo ka' nu tikubi nu lapangan kobolanyo 25 meten, ka' ikiijo'mo na tionyo ahi' pombauan Laigan nu Tumpu.

³ Sambahagian na tano' aijo' anu komantannyo 12,5 kilometen ka' kobolanyo 5 kilometen aijo'mo na oposadia pombauan Laigan nu Tumpu, aijo'mo daerah anu susi' hondo.

⁴ Tano' aijo' susi', ka' pinosadiamo bau bahagian nu to ima-imam anu obee'imo pakalaja'an mongatur palasombahan i Laigan nu Tumpu. Sambahagian na tano' aijo' pombauanmo laigan nu aha ka' sambahagian mule' pombauanmo Laigan nu Tumpu.

⁵ Sambahagian mule' na tano' aijo' anu ko ewanyo 12,5 kilometen okali 5 kilometen aijo'mo na oposadia bau bagi nu aha mian Lewi anu mokalaja i uno nu Laigan nu Tumpu. Ikiijo'mo na pombauan kota' anu bau kajojoongan nu aha.

⁶ Isohipi' nu tano' anu susi' aijo' tionyo ahi' oposadia na tano' anu komantannyo sampulu'ka' ohua' mintonga' na kilometen ka' kobolanyo ohua' ka' mintonga' na kilometen, da bau pombauan kota' anu timbali nu jojoongi nu bansa Israel maumo pa' ihe.

Tano' nu anu balakuasa mompalentah

⁷ Bahagian nu aha anu balakuasa mompalentah tionyo ahi' suele oposadiai tano'. Tano' aijo' lengkat mae ipotempasan sasu kinsoban daerah anu pinosadiamo samata-mata anu nu Tumpu toka-toka i Ambai anu i Totonga'nyo, ka' lengkat mae ipotempasan sasu kabete'an daerah anu pinosadiamo samata-mata anu nu Tumpu, toka-toka ipotempasan sasu kabete'an ilipu' aijo'. Jadi komantannyo pokakanamo susumo komantannyo nu sala'sa'angu' na tano' bahagian anu binee'mo hi aha tulunan nu bansa Israel.

⁸ Tano aijo' baumo bahagian nu aha nu balakuasa mompalentah itano' nu Israel, da ia bolimo daagi' mompalentah taha-tahahu singgi mian anu palesayamo hi beleng-Ku, panyo ahi' da ia mombee'mo daerah labinyo sangga'at aijo' da baumo bagi nu aha tulunan nu bansa Israel.

Anu pantas nu bau nu aha anu balakuasa mompalentah

⁹ Tumpu Anu Matangkas na Kuasanyo notatae, “Sukupmo na dosa' nu beleyum haha atina', o to mia-mian anu balakuasa i Israel! Bolimo daagi' belemiu talalo mongkabisa'i mian da'isan haha aijo'. Soba bau apaa na anu ma'ima' ka' mule' anu adin. Bolimo daagi' hondo-hondo molaa' aha anu palesayamo hi belengku mompala'i tano' nu aha. Aku, Tumpu Anu Matangkas na Kuasanyo nompalentahkonmo aijo' hi beleyum.

¹⁰ Opake na timbangan tiba takalan anu totu'u.

¹¹ Sa'angu' na efa bau pontakan bahan anu manggas tionyo ahi' pokakana na isinyo tiba sa'angu' na bat na montakan bahan anu mingue. Anu bau sonto' pongukulan tionyo ahi' sa'angu' na homer. Jadi takalannyo haha aijo' tionyo sumo uuka: 1 homer=10 efa=10 bat.

¹² Timbangan nu beleyum tionyo ahi' sumo uuka: 1 syikal=20 gera 1 mina=60 syikal.

^13-15 Aiya na bau pongukulan bau pontantukan palasombahan-palasombahan: gandum: 1/60 bagian na anu ihumpak i ale' nu beleyum jawawut: 1/60 bagian na anu ihumpak i ale' nu beleyum lanya' nu zaitun: 1/100 bagian na anu ihumpak isinin na kau' (Ukunmo susumo ukulan nu bat; 10 bat=1 homer=1 kor) domba: sa'angu' na domba o'ala i 200 na konjoo'nyo na domba. Belemiu tionyo ahi' monsombahkon koloban gandum, koloban anu opotunu, tiba koloban paladamean da dosa' nu belemiu o'ampuni. Aku, Tumpu Anu Matangkas na Kuasanyo anu nombee'imo palentah iajo'.

¹⁶ Iwi-iwi' na anu jojoong ilipu' tionyo ahi' momboa palasombahan-palasombahan haha aijo' hi anu balakuasa mompalentah i Israel.

¹⁷ Ia na halus mongoli potuu'on da bau koloban anu opotunu tiba koloban gandum tiba koloban anggur nu aha iwi-iwi' bansa Israel de tokamo isinaa anu olame'akonmo. Molame'akon Bitu'on Bu'ou sinaa nu Sabat tiba sinaa anu olame'akon sangga'at. Ia tionyo ahi' momposadia koloban bau pongampuni dosa', koloban gandum, koloban anu opotunu, tiba koloban paladamean bau pompoita ka'ampunan nu aha bansa Israel.”

Sinaa anu olame'akon

¹⁸ Tumpu Anu Matangkas na Kuasanyo notataemo hi mian anu palesayamo hi belenyo, “Kona itanggan sa'angu' bitu'on sa'angu' belemiu tionyo ahi' momposusi'mo Laigan-Ku monsombahkonmo sa'angu'na sapi' lakinyo anu daagi' bata'nyo ka' mule' anu madi' kokulangnyo apa-apaa.

¹⁹ Imam tionyo ahi' mongala baso'nyo nu koloban anu bau-bau pohapusi dosa' lantas osapuakonmo i iwi-iwi' na ohi' nu Sabatan nu Laigan-Ku, ka' mule hi opa-opat na pasu'nyo nu mezbah ka' mule' i iwi-iwi' na ohi' nu sabatan daka' anu bau kalambanan mokiijo' ipopasan sasu unonyo.

²⁰ Bau mule' sumo aijo' kakona itanggan popitu' bitu'onmo ai-aijo' kona hi batu-batu mian anu binaladosa'mo maumo anu madi' tinotonggolakon kabai kalana anu madi' sinumbu'. Tiba jalan anu sumo aijo' na belemiu monjagaimo kasusian nu Laigan-Ku.

²¹ Kakona itanggan sampulu'mo ka' opat bitu'on sa'angu', belemiu tionyo ahi' molame'akonmo Lamean nu Paskah. Pitunsinaa na kopinnyo iwi-iwi' na mian tionyo ahi' mongkaan roti anu madi' koraginyo.

²² Kakona isinaa anu momonanyo, anu balakuasa mompalentah tionyo ahi' monsombahkon sa'angu' na sapi' lakinyo bau koloban pohapusi dosa' nu butongnyo ka' mule' dosa' nu iwi-iwi' na mian da'isan.

²³ Kopinnyo molame'akon pitunsinaa aijo', saba' sansinaa toka sansinaa ia tionyo ahi' monsombahkon hi Tumpu popitu' na sapi' lakinyo ka' mule popitu' na domba lakinyo anu madi' kokulangnyo apa-apaa lantas opotunumo i angu-angu'annyo. Sansinaa toka sansinaa ia suele ahi' tionyo monsombahkon sa'angu' na mee' lakinyo bau koloban pongampuni dosa'.

²⁴ Ka' mule' sangga'at tionyo ahi' osombahkon gandum konjoo'nyo 17,5 liter bau ponggampai sa'angu' na sapi' lakinyo ka' totolu' na liter na lanya' nu zaitun bau ponggampai sa'angu' na domba lakinyo.

²⁵ Kakona i Lamean Tahop o'atopi nu Hon nu kau' anu otampu'unimo itanggan sampulu' ka' olima' bitu'on kopopitu'nyomo, sansina toka sansinaa kopinnyo pitunsinaa anu balakuasa tionyo ahi' monsombahkon koloban-koloban anu pokakana, aijo'mo koloban pongampuni dosa', koloban anu opotunu, tiba koloban gandum tiba lanya' nu zaitun.”