YEHEZKIEL 44 - KITAB NU TUMPU ALLA LELE MA'IMAI'

Montului sabatan daka' sasu kabete'an

¹ Lapas mule' mo'ane aijo' nomboamo aku mule' isabatan daka' anu isambiha'nyo sasu kabete'an anu aijo' i Laigan nu Tumpu. Sabatan daka' aijo' tumba-tumban,

² Tumpu notataemo mae hi belengku, “Sabatan daka' aiya tataap otumban ka' madi' timbali otuhea'akon. Madi' timbali kosamian anu montuhea'akon ka' mompinsoopi, kalana Aku, Tumpu Allah nu Israel, ninsoopmo i Laigan-Ku nontulumo sabatan daka' aiya. Jadi sabatan daka' aiya tionyo ahi' tataap otumban.

³ Panyo pamalentah anu balakuasa timbali mokiijo' isabatan daka' aijo' da mongkaan kaanon anu susi' i ahop-Ku. Ia tionyo ahi' minsoop montulu dasanyo ka' mule' de minsusule'mo po ule' ahi' montulu jalan aijo'.”

Anu madi' opobee' minsoop i Laigan nu Tumpu

⁴ Lapas mule' mo'ane aijo' nomboamo aku i sabatan daka' sasu utara anu mompaha ahop tiba Laigan nu Tumpu. Aku nompalahatikanmo ka' tinoangkumo na Laigan nu Tumpu aijo' jiningkanmo nu jingka anu jongkilaban salaku tandanyo tinokamo na Tumpu. Lantas aku tinolodadupumo ka' nonsombahmo,

⁵ ka' Tumpu notataemo mae hi belengku, “O manusia anu madi' tumuu' batu, palahatikan ima-ima' apaa na anu tinoamo nu beleyum ka' ihongomo nu beleyum. Ku poto'imo hi beleyum iwi-iwi' na palentah tiba atulan mongkona Laigan-Ku aiya. Tulis ima-ima' ihehe na anu timbali opobee' minsoop i Laigan-Ku ka' mule' ihehe na anu madi' opobee'.

⁶ Poto'i hi aha mian nu Israel anu saja' motomuhuk taalu' Aku, Tumpu Anu Matangkas na Kuasanyo, madi'mo daagi' mompojohok aha mombau anu mahumimi'.

⁷ Aha nohumimi'imo Laigan-Ku, kalana hau-haunyo lompo'nyo tiba baso'nyo nu koloban osombahkonmo hi beleng-Ku aha mompobee'mo to mia-mian anu isalipu'an mae minsoopmo i unonyo padahan madi' sinunat ka' anu madi' montuluti Aku. Kalana palabuatan-palabuatan nu aha anu okahenyui aijo', aha nolanggaimo palajanjian-Ku tiba aha.

⁸ Misa'mo posi aha na mokalaja pakalaja'an anu susi' iuno nu Laigan-Ku, panyo mianmo anu isalipu'an mae na nu pokalaja nu aha mombau palakaja'an aijo'.

⁹ Aku, Tumpu Anu Matangkas na Kuasanyo, mombebakonmo taalu' mian anu isalipu'an mae ka' mule' madi' sinunat ka' mian anu madi' montuluti Aku, madi' timbali opobee' minsoop i Laigan-Ku. Aijo' opake suele hi aha mian anu isalipu'an mae anu jojoongmo tataap itotonga' nu aha bansang Israel.”

Aha mian nu Lewi sinabatakonmo i pangkat imam

¹⁰ Tumpu notataemo mae hi belengku, “Ku hukumo na aha mian nu Lewi anu nosangaja'mo aha mian nu Israel sangga'at, aha nohikumo Aku ka' nonsombahmo pilogot.

¹¹ I unonu Laigan-Ku, aha ola timbali mombau anu Ku palentahkon salaku pangalaja ka' ponjagai sabatan daka'. Aha timbali mongkolot binatang-binatang anu okolobanaopopo tunu tiba palasombahan, ka' aha tionyo ahi' saja' molayani mian.

¹² Panyo kalana aha nombaumo pakalaja'an monsombah pilogot hi aha bansa Israel, ka' tiba jalan aijo' sahingga nonsaduakonmo bansang aijo' binaladosa'mo, sahingga Aku, Tumpu Anu Matangkas na Kuasanyo binasumpa'mo saba' aha aijo' tionyo ahi' ohukumo.

¹³ Aha madi'mo daagi' timbali mombau anu Ku palentahkon salaku imam kabai mongkanyang apaa na anu pinosusi'mo ka' osombahkonmo mae hi beleng-Ku, kabai minsoop itampat Anu Susi' hondo. Aijo'mo na hukuman nu palabuatan-palabuatan anu mahumimi' bibinaumo nu aha.

¹⁴ Uuka aiya aha Ku bee'imo pakalaja'an da mombau pakalaja'an anu maboat anu palalu ahi' obau i Laigan-Ku.”

To ima-imam

¹⁵ Tumpu Anu Matangkas na Kuasanyo notatae, “Tempo'nyo bansang Israel nohikumo mae Aku, aha to ima-imam Lewi anu lee' mae i Zadok na tinataap ahi' nontuluti apaa na anu pinalentahkon-Ku okalaja i Laigan-Ku. Kalana aijo' aha ahi' na tionyo mombau anu Ku palentahkon ka' toka mae i ahop-Ku monsombahkon lompo'nyo tiba baso' nu sinin na koloban.

¹⁶ Ola aha na timbali minsoop i uno nu Laigan-Ku mombau anu Ku palentahkon okalaja kiijo' i mezbah-Ku ka' mompimpin anu monsombah mae i Laigan-Ku.

¹⁷ De aha minsoopmo isabatan daka' mokiijo'mo ipopasannyo sasu unonyo, anu nu pusok nu aha tionyo ahi' baju' hude lenan. Madi' timbali aha mompusok hude laken de mombaumo pakalaja'an ipopasan kiijo' i unonyo, kabai i uno nu Laigan-Ku.

¹⁸ Da madi' malisongu ka' liasa'on, aha tionyo ahi' mompusok saluan hude lenan boli mompake pombutu' ka' mule' mompake sigut te hude lenan.

¹⁹ De aha mambamo ipopasan anu isambiha'nyo anu kasihukan nu mian, to ima-imam haha aijo' tionyo ahi' mongukatakon baju' pokalaja nu aha i uno nu suo'nyo haha aijo' anu susi' i Laigan-Ku, lantas mompusokmo baju' sangga'at, da baju anu samata-mata opusok mokalaja aijo' madi' monsilakai mian.

²⁰ To ima-imam madi' timbali mongkis sampe lenggeng ubak nu aha, kabai mompotuu' ubaknyo da mantan hondo. Ubak aijo' tionyo ahi' ogunting kodo-kodo' susumo koonyo nu atulan anu tinantukanmo.

²¹ Aha madi' timbali monginum anggur de kahanda'mo minsoop ipopasan anu i unonyo.

²² To ima-imam ola timbali mongosoai to lalangkoyang nu mian Israel anu ma'isa toho' no osoa kabai samian na balu nu samian na imam. Aha madi' timbali mongosoai boune anu gina'atakonmo nu langkai'nyo.

²³ To ima-imam tionyo ahi' mongajanakon hi mian anu palesayamo hi belengku da osumbu' na bedanyo iya na anu samata-mata osombahkon hi beleng-Ku ka' iya na anu madi' timbali, iya na anu belesi' susumo koonyo nu agama ka' iya na anu mahumimi'.

²⁴ De daagi' ko palakala mompahasala'mo i atulan, tionyo ahi' nu ulus nu aha susumo koonyo nu atulan-Ku ka' mule' mongadati ahi' sinaa nu Sabat salaku sinaa anu samata-mata baumo ponsomban Aku.

²⁵ Samian na imam madi' timbali mohumimi'i butongnyo kalana mongkanyangmo mian anu sinilakamo, panyo de tu'anyonyo na anu silakamo na timbali ahi', ka' mule' anaknyo, utusnyo mo'ane kabai utusnyo boune anu ma'isa no osoa.

²⁶ De ia po ule'mo belesi', ia tionyo daagi' po ule' montanda'i pitunsinaa,

²⁷ lantas mambamo ipopasan sasu unonyo nu Laigan-Ku ka' monsombahkonmo koloban bau pompobelesi' butongnyo da ia timbali mule' mokalaja i Laigan-Ku. Aku, Tumpu Anu Matangkas na Kuasanyo notataemo.

²⁸ To ima-imam montalima pakalaja'an aijo' salakumo bagian nu aha i uno nu pombagian apaa na anu Ku bee'mo hi aha Israel molundu-lundu na tulunan. Aha madi' timbali mohumpak apa-apaa itano' nu Israel: Akumo na halata' nu aha.

²⁹ Anu pontumuu' nu aha gandum anu opalasombahkon, tiba koloban anu bau pohapusi dosa' ka' mule' koloban anu bau pombolosi lugi'; ka' mule' sinin na apaa na anu tinungka'akonmo hi beleng-Ku aijo' tionyo ahi' obee'mo hi aha.

³⁰ To ima-imam tionyo ahi' obee'i bagian anu ma'ima' hondo anu o ala i iwi-iwi na ngahannyo nu anu o ala iale' palatamanyo, ka' suele anu o ala i apaa na anu sinombahkonmo hi beleng-Ku. De aha mian nu Israel mombaumo roti, saba' roti anu momona obau aijo' bau bagian nu to ima-imam. Sahingga Ku balakatije na laigan nu aha bansa Israel iwi-iwi'.

³¹ Tomonsi' tiba binatang sangga'at anu mosi pate, kabai anu nu sa'u nu binatang anu mahangas madi' timbali nu kaan nu to ima-imam.”