YEHEZKIEL 4 - KITAB NU TUMPU ALLA LELE MA'IMAI'

I Yehezkiel nompoponyihingmo pa' mosia na montumbuhi Yerusalem

¹ Tumpu Allah notatae, “O, manusia anu madi' tumuu' batu, soba ala na batu sa'angu' ka' potimpas atina' hi ahop nu beleyum ka' gohit i aita' gambalan nu kota' Yerusalem.

² Lantas soba gamban na tampat pontumbuhian kota' aijo', tiba gotnyo anu okeke, tiba tambunan nu tano' anu lewa' opotambun, ka' anu pombauan kemah ka' pakakas anu opake pohobo'akon pagan mesen duhu-duhuk.

³ Soba ala na kuhon besak; ka' pokoko na kuhon besak aijo' i olot nu beleyum tiba kota' Yerusalem, o'anggap au' aitu kuhon besak aijo' sa'angu' na pimpi' besak. Lapas aijo' ahopimo na kota' aijo' au'aitu beleyumo ahi' na montumbuhi. Aijo'mo na timbali sa'angu' na ibalat kona hi aha bansa Israel.

^4-5 Lantas male'mo maninsohipi' sasu kewe' ka' Ku pokonamo na kasala'an nu bansa Israel hi beleyum. Kopinnyo 390 na sinaa, na beleyum matimale' susumo atina' ka' mongoa'i kasansala'an kalana kasala'an nu aha. Sansinaa na beleyum matimale' susumo atina' mongibalatakon sataun na hukuman nu aha bansa Israel.

⁶ Lapas atina' male'mo maninsohipi' sasu koanan ka' oa'imo pa' mosia na hukuman anu opokana ikasala'an nu aha Yehuda patompulu' na sinaa na kopinnyo, sansinaa mongibalatakon sataun na hukuman nu aha.

⁷ Tonto'i pa' mosia na montumbuhi Yerusalem. Tangkakon sasu mokiijo' ikota' aijo' na pajagun nu beleyum, ka' poto'imo na potuunon-Ku aijo'mo hukuman anu opokonamo hi aha.

⁸ Beleyum Ku pungumo sahingga madi'mo moko ala mombalik butong na beleyum lengkat ikewe' mo uukamae ikoanan kabai lengkat ikoanan mokiijo' ikewee' sampe Yerusalem madi'mo otumbuhi.

⁹ Uuka aiya alamo na gandum, jelai, kacang merah, kacang polong, sekoi tiba gandum anu binaumo labu. Pogalo'mo na aijo' iwi-iwi' ka' baumo roti. Aijo'mo na anu nu kaan 390 na sinaa na kopinnyo na beleyum matimale' maninsohipi' sasu kewe atina'.

¹⁰ Roti aijo' tionyo ahi' nu bagi ima-ima' sahingga toka nu sansinaa nu kaan ola 230 gram. Madi' timbali molabihi aijo'.

¹¹ Uee anu nu inum nu beleyum suele madi' timbali molabi' ola ohua' na sasangkin sansinaa.

¹² Posun na sengkun nu manusia bau tongapuan. Tunu na roti nu beleyum i apu aijo' ka' kaanmo na roti aijo' i ahop nu mian iwi-iwi'.”

¹³ Tumpu notatae, “Sumo aijo'mo na balu-balu'nyo na aha mian nu Israel saidi' mae mongkaanmo kaanon anu otewa' madi' timbali okaan susumo koonyo nu atulan i Musa, salatan aha Ku boamo ka' opojoongmo ilipu' nu mian anu isalipu'an.”

¹⁴ Panyo tinaamankumo, “Ebeh Tumpu Anu Matangkas Na Kuasanyo! Daagi' pe'e ise-ise' sampe tempo uuka aiya na aku ma'isa toho' nohumimi'i butongku pa' nongkaanmo binatang anu nosipate kabai tuha' nu anu kinaanmo nu binatang anu mahangas Ma'isa toho' aku nongkaan kaanon anu o'anggap madi' toho' okaan.”

¹⁵ Sahingga notataemo na Tumpu Allah, “Ma'ima'mo, salaku pombolosi sengkun nu manusia beleyum timbali mompake sengkun nu sapi' da bau pontunuan roti nu beleyum.”

¹⁶ Lapas aijo' Ia po ule' mule' notatae, “O, manusia anu madi' tumuu' batu, Aku nohansunimo palasadia'an anu okaan i Yerusalem. Sahingga bata-batamo na to mia-mian ka' mombatasimo anu okaan nu aha tiba uee anu nu inum nu aha.

¹⁷ Aha madi'mo ko halapan kalana madi'mo ko anu okaan na roti tiba uee anu o'inum, ka' ahennyo aha silakamo nu saduakon nu dosa' nu aha iwi-iwi'.”