YEHEZKIEL 36 - KITAB NU TUMPU ALLA LELE MA'IMAI'

Balakat nu Tumpu anu obee' hi Israel

¹ Tumpu notatae, “O manusia anu madi' tumuu' batu, potataemo hi bungkutnyo haha aita' i Israel ka' pokau na aha da mompotombing palentah nu Tumpu Anu Matangkas na Kuasanyo,

^2-6 ‘Salatan to bansa-bansa anu haha aitu mae montumbuhimo mae ka' montololangimo belemiu, saba' aijo' sumo-sumomo aha nompopo'ambangmo Israel. Lame'mo na aha montaloakon, puge'nyo haha aita' anu salatanmo pe'e dunia aiya uuka aiya aha mo na tumpunyo. Mokonyo aijo' o, to bungku-bungkutnyo ka' mule' puge'nyo-puge'nyo, to panga-panga'nyo nu kaunyo tiba bangka'nyo, o, kota-kota' anu ihansunmo ka' anu pinala'ianmo nu miannyo ka' mule' tinololanganmo ka' mule pinopo'ambangmo nu bansa-bansa anu haha aitu mae, soba potombihing mae apaa na anu pinoto'imo nu Tumpu Anu Matangkas na Kuasanyo hi beleyum: I uno nu tambuha'-Ku anu taha-tahahumo aiya Ku pisala'imo hondo na bansa-bansa anu haha aitu mae hi belemiu, lebe-lebe Edom, kalana aha sinanangmo na mompopo'ambang ka' nongalamo ka' mule' nongalamo tano'-Ku ka' nongagoimo iwi-iwi na padang anu ko hemputnyo. Uuka aiya Aku motambuha'mo ka' mule' mongamu'mo kalana bansa haha aijo' talalomo ahi' na nompopo'ambang ka' madi'mo nompajuli belemiu.

⁷ Aku, Tumpu Anu Matangkas na Kuasanyo binasumpa'mo da bansa-bansa anu aitu mae mompaha ohani belemiu sueleje ahi' opopo'ambang.

⁸ Panyo kona hi belemiu Ku poto'i o, to bungku-bungkutnyo i Israel, ka' mule' iwi-iwi na kau' nu belemiu minsumpeje ka' mimbua' mule' da nu kaan nu mian Israel anu palesayamo hi beleng-Ku anu malia'mo mae minsusule'.

⁹ Aku na montinjohi belemiu Israel, ka' Ku tantukanmo saba' tano' nu belemiu po ule'mo opason ka' osauimo bine'.

¹⁰ Po ule'mo Ku tuangi na konjoo'mo nu mian Israel anu palesayamo hi beleng-Ku. Aha jojoongmo i iwi-iwi na kota' ka' po ule'mo mombau anu ihansunmo.

¹¹ Miannyo ka' potuu'on nu belemiu Ku tuangimo sahingga majoo'mo hondo lebe'mo manjoo' na anu u'utu mae ka' mule' aha mohumpakmo lee' manjoo'. Aha po ule' tumuu' kiijo' mae susumo u'utu mae ka' Ku pojadimo sanang na kantumuu'an nu aha susumo anu ma'isa toho' tina'up nu belemiu. Sahingga nu sumbu'je nu aha taalu' Akumo ahi' na Tumpu.

¹² Mian nu Israel anu palesayamo hi belengku po ule'mo Ku sule'akon da jojoongmo ilipu'nyo. Tano' aijo' timbalimo anu nu aha ka' saja'mo ko hasinnyo sahingga to ana-anak nu aha madi'mo daagi' silaka nu ohop.’

¹³ Aku Tumpu Anu Matangkas na Kuasanyo notataemo: ‘Memang totu'u tano' aiya sinanggohanmo saja' mongkaan manusia ka' saja' mongagoi to ana-anak – nu bansa anu monjojoongi ia.

¹⁴ Panyo otampu'uni uuka aiya tano' aiya madi'mo daagi' mongkaan manusia kabai mongagoi to ana-anak nu aha. Aku Tumpu Anu Matangkas na Kuasanyo notataemo.

¹⁵ Madi'mo daagi' na tano' aiya mohongo alu nu to bansa-bansa kabai sola' monta'up pompopo'ambang nu mian. Tano' aiya madi'mo daagi' mompatei bansa anu monjojoongi. Aku, Tumpu Anu Matangkas na Kuasanyo notataemo'.’ ”

Obali'mo na Israel

¹⁶ Tumpu notataemo mae hi belengku,

¹⁷ “O manusia anu madi' tumuu' batu, tempo'nyo aha mian Israel jonojoongmo ilipu' nu aha, palabuatan nu aha nohumimi'imo butong nu aha. Ku anggap na palabuatan nu aha aijo' anu ahi' madi' pantas obau pokakanamo sumo boune anu hau-haunyo tinokamo na adat nu aha boune.

¹⁸ Pinotudun-Kumo na tambuha'-Ku hi aha kalana aha nombaumo kalakuan anu ma'idek manjoo' hondo aijo'mo aha sola'mo nompatei mian itano' aijo' ka' mule' nohumimi'imo butong nu aha nu pilogot nu aha haha aijo'.

¹⁹ Aha Kuhukumo sitimbang tiba kalakuan nu kantumuu'an nu aha, ka' aha Ku ga'a-ga'atakonmo mamba ilipu-lipu' nu mian anu isali'an.

²⁰ Maumo ahi' pa' moya na aha mamba, aha saja' ahi' mohumimi'i sanggong-Ku anu susi'. Mokonyo aijo' nu taloakon nu to mia-mian sumo uuka, ‘Bansa aiya te mian anu palesayamo hi Tumpu, panyo aha tionyo ahi' mompala'imo tano' anu binee'mo nu Tumpu hi aha.’

²¹ Aku talalo hondo monginau' sanggong-Ku anu susi' ihumimi'anmo nu aha mian Israel maumo ahi' pa' moya na aha mamba.

²² Kalana aijo' poto'iakon apaa na anu Kupoto'i nu Aku Tumpu Anu Matangkas na Kuasanyo hi aha bansa Israel, ‘Apaa na anu saidi' mae Kubau misa' kalana belemiu o to mia-mian nu Israel, panyo kalana ahi' sanggong-Ku anu susi', anu ihumimi'ianmo nu belemiu iyaya mae na kalambanan nu belemiu.

²³ Ku potoamo na kasusi'an nu sanggong-Ku anu balakuasa aijo', sanggo anu ihumimi'anmo nu belemiu hi aha to bansa-bansa, sahingga nu sumbu'je nu aha taalu' Akumo ahi' na Tumpu. Aku, Tumpu Anu Matangkas na Kuasanyo notataemo. Ku pakemo na belemiu da momponyata' hi aha bansa-bansa taalu' Aku aiya susi'. Tumpu anu Susi' hondo.

²⁴ Ku posihukmo na belemiu lengkat mae i batu-batu bansa tiba lipu' Ka' Ku sule'akonmo itano' nu belemiu.

²⁵ Lapas aijo' belemiu Ku pipi'mo nu uee anu molino hondo da belemiu belesi'mo madi'mo ko pilogotnyo ka' mule' iwi-iwi' anu nohumimi'imo belemiu.

²⁶ Jadi belemiu Ku bee'imo kinyonyoa anu bu'ou ka' mule' pikilan anu bu'ou. Kinyonyoa nu beleyum anu nokutmo susumo batu aijo' Ku bolosimo nu kinyonyoa anu tulu-tulutan.

²⁷ Roh-Ku, Ku dudu'akonmo i uno nu kinyonyoa nu beleyum ka' belemiu Ku jagaimo da tumuu'mo montuluti iwi-iwi na atulan-Ku ka' mule' montulutimo iwi-iwi' na palentang-Ku.

²⁸ Jadi belemiu jojoongmo itano' anu binee'-Kumo hi mompolee' nu belemiu. Belemiu timbalimo mian anu palesayamo hi beleng-Ku ka' Aku mule' timbalimo Tumpu nu belemiu.

²⁹ Belemiu Ku pobebasmo madi'mo daagi' mahumimi' na belemiu. Ku palentahmo na gandum da tumuu'mo molumba' sahingga belemiu madi'mo daagi monta'up kasusa'an i anu okaan.

³⁰ Kutuangimo na kalumba'an nu kau' anu bua'nyo nu kaan nu belemiu ka' hasin nu ale' nu belemiu iwi-iwi' sahingga belemiu madi'mo mongoa'i kasusa'an i anu okaan anu mombusikimo sanggo nu belemiu hi aha bansa-bansa.

³¹ Belemiu tonginau'mo anu u'utu mae i kalakuan nu belemiu anu ma'i-ma'idek ka' palabuatan nu belemiu anu madi' pantas aijo', lantas oposi kahegatimo nu belemiu na butong nu belemiu kalana nu saduakon nu dosa-dosa' ka' palabuatan anu ma'idek nu belemiu aijo'.

³² Tutugi o, Israel kalana iwi-iwi' aijo' Ku bau misa' kalana belemiu. Belemiu tionyo ahi' mongoa'imo ambang ka' madi'mo tinalakana' kalana kalakuan nu belemiu. Aku, Tumpu Anu Matangkas na Kuasanyo notataemo.’ ”

³³ Tumpu Anu Matangkas na Kuasanyo notatae, “Salatan belemiu Ku pobelesi'mo sahingga madi'mo baladosa'na belemiu, Belemiu Ku pobee'mo mule' jojoong isinin na kota' nu belemiu ka' po ule'mo mombau apaa na anu ihansunmo.

³⁴ Nai puan mae to mia-mian mamba motulu i padang-pang tampat nu belemiu nontoamo talalo ahi' kun na tano'nyo panyo belemiu timbali po ule'je mule' mongkalaja tano' aijo'.

³⁵ Sahingga iwi-iwi' na mian jadimo bangang kalana tano' anu u'utu mae kinunmo uuka aiya nongabali'mo tinimbalimo taman Eden, ka' mule' kota-kota' anu naipuan mae iliingmo hondo, ihansunmo ka' memo kinahansunanyo na aijo' uuka aiya jinadimo kota-kota' anu mahoson palatahanannyo ka' nanjoo'mo hondo na miannyo anu jojoong ikiijo'.

³⁶ Sahingga bansa-bansa anu mompaha ohani tiba aha anu daagi' kiijo' monsumbu'je taalu' Akumo ahi' na Tumpu, anu po ule'mo nombau to kota-kota' anu ihansunmo, ka' po ule'mo nongkalaja ale' anu singkapmo kinun. Aku, Tumpu notataemo, ka' memang ahi' mompojadimo.”

³⁷ Tumpu Anu Matangkas na Kuasanyo notataemo, “O bansa Israel, belemiu Ku pobee'mo mule' momoita tulung hi beleng-Ku; Ku tuangimo na konjoo'nyo nu belemiu susumo gombuan nu domba.

³⁸ Iwi-iwi' na kota' anu uuka aiya ihansunmo saidi' mae imihinyo manjoo'mo na anu monjojoongi susumo Yerusalem de kakonamo sinaa nu lamean tempo'nyo nai puan mae, kahomo domba anu osombahkon. Sahingga nu sumbu'je nu belemiu taalu' Akumo ahi' na Tumpu.”