YEHEZKIEL 35 - KITAB NU TUMPU ALLA LELE MA'IMAI'

Hukuman anu obee' nu Tumpu hi Edom

¹ Tumpu notatae mae hi belengku,

² “O manusia anu madi' tumuu' batu, kutukimo na lipu' Edom.

^3-4 Poto'i hi aha mian anu jojoong ikiijo' apaa na anu tinaloakon-Kumo hi aha nu Aku Tumpu Anu Matangkas na Kuasanyo, ‘Aku aiya sampobali' nu belemiu, o, mian anu jojoong aita' mae i bungkutnyo nu Edom! Tano' nu belemiu Ku pojadimo liing hondo madi'mo ko anu monjojoongi, ka' sinin na kota' nu belemiu hansunmo. Sahingga nu sumbu'je nu belemiu taalu' Akumo ahi' na Tumpu.

⁵ Salatanmo pe'e naipuan mae na belemiu monsampobali' Israel ka' mompojohok aha opatei tempo'nyo aha nu tokaimo nu balaa' salaku hukuman mo nu aha kalana dosa' nu aha.

⁶ Mokonyo aijo' atas sanggong-Ku, Tumpu anu tumuu', Tumpu Anu Matangkas na Kuasanyo, kapatean aijo'mo na uki' nu belemiu, ka' belemiu madi'mo daagi' moko ala da bebas. Belemiu sinala'mo kalana nompateimo, ka' palabuatan nompatei aijo' mule' ahi' na mololoi' belemiu.

⁷ Kota' nu belemiu iwi-iwi' i bungkutnyo nu Edom Ku pojadimo liing ka' batu-batu mian anu motulu ikiijo' Ku pateimo.

⁸ Bungkutnyo haha aita' ku paha potimpasimo bangke' nu belemiu, puge'nyo tiba bangka'nyo Ku pobuke'imo nu anu sinilakamo i uno nu pahampatean.

⁹ Lipu' nu belemiu Ku pojadimo tampat padang anu ewa sampe toka sidu-sidutu', ka' iwi-iwi na kota' nu beleyum madi'mo daagi' nu jojoongi nu mian. Sahingga nu sumbu'je nu belemiu taalu' Akumo ahi' na Tumpu.

¹⁰ Belemiu nontaloakonmo koonyo nu belemiu mau Yehuda kabai Israel tibamo tano'nyo belemiumo na mohaki ka' mule' belemiumo na jadi tumpunyo maumo ahi' Aku, Tumpu, na Tumpu nu aha.

¹¹ Mokonyo aijo' atas sanggong-Ku, Tumpu anu tumuu', Tumpu Anu Matangkas na Kuasanyo, mombalosakonmo kasala'an nu beleyum, kalana belemiu notambuha'mo, madi'mo sinanang na kinyonyoa, nongka'idekimo aha mian anu palesayamo hi belengku. Nusumbu'je nu aha taalu' belemiu Ku hukumo kalana palabuatan nu belemiu hi aha.

¹² Sahingga nu sumbu'je nu belemiu taalu' Akumo ahi' na Tumpu anu nohongomo belemiu nongalu tempo'nyo belemiu notatae: Iwi-iwi na bungkutnyo nu Israel iliingmo hondo ka' binee'mo da baumo kaanonto.

¹³ O bansa Edom, belemiu manjoo' na potatae, ka' motatae buulon hi beleng-Ku. Iwi-iwi' aijo' ihongong-Kumo.

¹⁴ Aku, Tumpu Anu Matangkas na Kuasanyo notataemo: Songko-songko na dunia sanangmo de songko-songko na lipu' nu belemiu Ku pojadimo padang tampat anu liing hondo,

¹⁵ pokakanamo susumo belemiu sinanangmo tempo'nyo nontoamo Israel anu Aku na tumpunyo iliingmo hondo. Iwi-iwi na bungkutnyo nu Seir ka' mule' songko-songko na tano' nu Edom timbalimo liing hondo. Sahingga nu sumbu'je nu mian iwi-iwi' taalu' Akumo ahi' na Tumpu.’ ”