YEHEZKIEL 32 - KITAB NU TUMPU ALLA LELE MA'IMAI'

Tomundo' nu Mesir molambangakon bua'

¹ Itanggan sa'angu' bitu'on kinosampulu'nyomo ka' ohua' kakonamo i taun kinosampulu'nyomo na kami ihakop ka' binoa, Tumpu notataemo mae hi belengku,

² “O manusia anu madi' tumuu' batu, pokinde'i totu-totu'u na itomundo' Mesir. Potokakon na potuunon-Ku aiya hi ia, ‘Beleyum montihomo susumo singa anu daagi' bata'nyo aijo hi aha to bansa-bansa, panyo beleyum lebe montiho susumo bua' anu jojoong i uno nu uee. Tengke nu beleyum mompohibu ka' mongkotoni iwi-iwi' na kaunyo.

³ De to bansa-bansa sihukmo, Ku hakopmo na beleyum nu buani'-Ku ka' mompojohok bansa haha aijo' mohela' beleyum mokiita' ikatano'an.

⁴ Beleyum Ku pobandangmo itano' ka' iwi-iwi' na tomonsi' ka' mule' binatang lengkat mae isongko-songko na dunia Ku palentahmo mae da mongkaan beleyum.

⁵ Lantas to bungku-bungkutnyo ka' mule' to bangka-bangka'nyo Ku pobuke'imo nu bangke' nu beleyum anu nabusikmo aijo'.

⁶ Baso' nu beleyum Ku bubusakonmo sahingga mohumpisimo to bungku-bungkutnyo ka' mule mompobuke'imo sinin na kaunyo.

⁷ Salatan Aku monsilakaimo beleyum, langit Ku kukumbungimo ka' mule' to manda-mandala' madi'mo talalo Ku pojingka. Batu nu sinaa Ku posulukmo isambiha' nu kundom ka' mule' bitu'on madi'mo daagi' majingka.

⁸ Memang totu'u iwi-iwi' na anu majingka aita' i langit Ku poho'mo ka' mule' tano' Ku popikatmo hondo-hondo. Aku, Tumpu Anu Matangkas na Kuasanyo notataemo.

⁹ Tempo'nyo Aku nombebakonmo lele kahansunan nu beleyum hi lipu-lipu' anu ma'isa nu sumbu' nu beleyum, manjoo' na bansa bata-batamo.

¹⁰ Memang totu'u, Ku tabasakonmo na bajak-Ku ka' mompatundu'mo beleyum. To tomu-tomundo' tiba to bansa-bansa montoamo palabuatan-Ku aijo' hi beleyum. Tempo'nyo aijo' aha langkakatanmo kalana mabuhukmo ka' mule' nu lakatmo kalana mabuhuk silaka.’ ”

¹¹ Tumpu Anu Matangkas na Kuasanyo motataemo, hi tomundo' nu aha Mesir, “Bajak i tomundo' Babel otangkakonmo moitina' hi beleyum.

¹² To sulu-suludadu nu bansa-bansa anu talalo buhingison Ku palentahmo da mongkeatmo bajak nu aha da mompateimo iwi-iwi' na aha mian da'isan nu beleyum. Mian da'isan nu beleyum ka' iwi-iwi' apaa na anu nu kabubunakon hansunmo ingko-ingkot.

¹³ Potuu'on nu beleyum Ku kolotmo isonibi nu kaunyo haha itina' tempat ponginuman nu aha. Maumo manusia kabai binatang madi'mo daagi' mompohibu uee nu kaunyo ititina'.

¹⁴ Sahingga sinin na kaunyo ilipu' nu beleyum Ku polinomo ka' mule' Ku pojadimo da mo ili madi' masolok. Aku, Tumpu Anu Matangkas na Kuasanyo notataemo.

¹⁵ De Mesir Ku potimbalimo padang tampat anu mateges anu liingmo hondo ka' mule' Ku pateimo iwi-iwi na anu jojoong ikiijo', nu sumbu'je nu aha taalu' Akumo ahi' na Tumpu.

¹⁶ Pokinde' anu makenseng hondo aiya saidi' mae timbalimo nyanyian anu onyanyi de ko anumo silaka. To bou-boune nu bansa-bansa sangga'at saidi' mae monyanyiakonje salaku tanda ko anumo sinilaka hi aha Mesir ka' iwi-iwi' na mian da'isan nu aha. Aku, Tumpu Anu Matangkas na Kuasanyo notataemo.”

Dunia nu mian anu sinilakamo

¹⁷ Itanggan kinosampulu'nyomo ka' olima' bitu'on sa'angu' itaun kinosampulu'nyomo ka' ohua' tempo'nyo kami ihakopmo ka' binoamo. Tumpu notataemo mae hi belengku,

¹⁸ “O manusia anu madi' tumuu' batu, haangmo kalana ko anumo sinilaka na aha mian da'isan nu Mesir. Pakatumo na aha da mambamo i dunia nu mian anu sinilakamo hingga-hinggat tiba lipu-lipu' sangga'at anu mahoson.

¹⁹ Poto'i hi aha, ‘Belemiu monsangka saba' belemiumo na anu talalo handa? Belemiu mintatau'mo i dunia nu mian anu sinilakamo, ka' opomale'mo hi aha to mia-mian anu madi' monsumbu' Tumpu.’

²⁰ Bansa Mesir silakamo hingga-hinggat tiba aha anu sinilakamo i uno nu pahampatean. Samata na bajak sinadiamo mompatei aha iwi-iwi'.

²¹ To tale-talenga' anu toto babaani ka' mule' aha to mia-mian nu Mesir anu nahampate nolabotmo mian nu Mesir tahahumo na kinolame'nyo i dunia nu mian anu sinilakamo. Aha nontaligalaimo sumo uuka, ‘To mia-mian anu madi' monsumbu' Tumpu Allah aijo' sinilakamo i uno nu pahampatean. Uuka aiya aha tinokamo mae i aiya ka' matimale'mo i aiya!’

^22-23 Asyur natimale'mo aijo' mae, tinikubanmo nu kubulan nu to sulu-suludadunyo. Aha iwi-iwi' sinilakamo i uno nu pahampatean. Kubulan nu aha kaiyong mae itampat anu talalo hondo maleeng i dunia nu aha mian anu sinilakamo. Tempo'nyo aha daagi' tutuu' saja' mompolubat mae kabuhukan i dunia.

^24-25 Elam suele kiijo' mae tiba kubulan nu to sulu-suludadunyo montikubi ia. Madi' pinai sunat, aha sinilakamo iwi-iwi' i uno nu pahampatean lantas nintatau'mo i dunia nu mian anu sinilakamo. Tempo'nyo daagi' tutuu' aha saja' mompolubat mae kabuhukan panyo uuka aiya aha sinilakamo ka' tionyo ahi' montanggung ambang hingga-hinggat tiba aha to mia-mian anu sinilakamo i uno nu pahampatean.

²⁶ Mesekh ka' i Tubal suele kiijo' mae tinikuban nu kubulan nu to sulu-suludadu nu aha. Madi pinai sunat, aha sinilakamo iwi-iwi' i uno nu pahampatean. Tempo'nyo daagi' tutuu' aha saja' mompolubat mae kabuhukan i dunia.

²⁷ Aha madi' nohumpak pinongkubulan salaku bau poholomati susumo to tale-talenga' naipuan mae, anu nintatau'mo i dunia nu mian anu sinilakamo tiba toongon nu aha anu bau pahampate. Talenga' haha aijo' ilamun tiba bajak nu aha pinolangon i ubak nu aha ka' mule' kanta pinotudu isaha'an nu aha. Tempo'nyo aha daagi' tutuu' talenga' haha aijo' baani hondo sahingga iwi-iwi' na mian mongkabuhuk aha.

²⁸ Sumo aijo' na aha mian nu Mesir olamun ka' opomale' itotonga' nu aha anu madi' monsumbu' Tumpu ka' silakamo saidi' mae i uno nu pahampatean.

²⁹ Edom suele kiijo' mae tiba iwi-iwi' na tomundo' tiba anu balakuasa. Naipuan mae ahamo aijo' na to sulu-suludadu anu toto hoso-hoson, panyo uuka aiya aha pinomale'mo i dunia nu mian anu sinilakamo hingga-hinggat tiba to mia-mian sangga'at anu sinilakamo, anu madi' monsumbu' Tumpu.

³⁰ Iwi-iwi' na anak nu tomundo' anu lengkat mae sasu utara daagi' ko anu kiijo' mae, sumo aijo' mule' aha mian nu Sidon. Naipuan mae kakuasa'an nu aha saja' mompolubat mae kabuhukan, panyo tempo' uuka aiya aha pinopo ambangmo ka' madi' pilenje sinunat aha nintatau'mo i dunia nu mian anu sinilakamo hingga-hinggat tiba aha to mia-mian anu sinilakamo i uno nu pahampatean. Ikaiyong mae aha natimale'mo ka' nontanggungmo kasala'an hingga-hinggat tiba to mia-mian anu nintatau'mo i dunia nu mian anu sinilakamo.

³¹ De i tomundo' Mesir tiba suludadunyo tokamo kaiyong i dunia nu mian anu sinilakamo ka' montoamo mian haha aijo' iwi-iwi' anu sinilakamo i uno nu pahampatean sanangmo na kinyonyoa na nu oa'i nu aha. Aku, Tumpu Anu Matangkas na Kuasanyo notataemo.

³² Akumo na nonsabapi i tomundo' Mesir saja' mompolubat mae kabuhukan hi aha to mia-mian anu daagi' tutuu', panyo ia tiba suludadunyo saidi' mae silakamo ka' opomale'mo hingga-hinggat tiba mian iwi-iwi' anu madi' monsumbu' Tumpu Allah ka' mule' anu sinilakamo i uno nu pahampatean. Aku, Tumpu Anu Matangkas na Kuasanyo notataemo.”