YEHEZKIEL 28 - KITAB NU TUMPU ALLA LELE MA'IMAI'

Tomundo' nu Tirus ihukumo

¹ Tumpu notatae hi belengku,

² “O manusia anu madi' tumuu' batu, poto'i hi tomundo' Tirus apaa na anu pinoto'ing-Ku nu Aku Tumpu Anu Matangkas na Kuasanyo notataemo hi ia. ‘Kinobubuunmo na beleyum monsangka butong nu beleyum te pilogot anu jojoong i totonga' nu ambai. Timbali na beleyum mimbalu-balu susumo pilogot panyo jaga beleyum ola ahi' manusia biasa.

³ Beleyum monsangka au'aitu beleyum lebe pande molingkudui i Daniel sahingga madi'mo ko lahasia anu bisa opohowini hi beleyum.

⁴ Nu pake nu beleyum na kapandean tiba pangalati'an nu beleyum bau pomposihuk halata', mosoni', tiba salaka.

⁵ Memang beleyum pande na badagang ka' uuka aiya kinayamo hondo, ka' kakaya'an nu beleyum atina' nonsaduakonmo beleyum da kinobubuunmo!’ ”

^6-7 Tumpu Anu Matangkas na Kuasanyo notatae, “O Tirus kalana beleyum monsangka butong nu beleyum pokakana sumo Tumpu, Ku saimo na suludadu nu aha anu isalipu'an mae anu talalo hondo buhingison da montumbuhimo mae beleyum. Nu hansunimo nu aha iwi-iwi' na kakaya'an nu beleyum anu ihumpakmo nu beleyum kalana kapandean tiba pangalati'an nu beleyum.

⁸ Beleyum opateimo ka' olamunmo i uno nu ambai.

⁹ Jadi de tokamo na tempo'nyo aijo' daagi' moko ala na beleyum montaloakon tukooyum beleyum Tumpu? I ahop nu aha anu nompateimo beleyum atina'je ka' nyata' taalu' beleyum ola ahi' manusia biasa.

¹⁰ Beleyum saidi' mae matemo susumo mian anu madi' ko angga'nyo kalana pinatean nu aha anu isalipu'an mae anu madi' monsumbu' Tumpu. Aku, Tumpu Anu Matangkas na Kuasanyo notataemo.”

Tirus pinatundu'mo

¹¹ Tumpu notatae mule' hi belengku, Ia notatae,

¹² “O manusia anu madi' tumuu' batu hangimo na i tomundo' Tirus. Poto'imo apaa na anu pinoto'ing-Ku nu Aku Tumpu Anu Matangkas na Kuasanyo notataemo hi ia, ‘Beleyum toho'mo tinimbali tanda nu kasukupan; naipuan mae beleyum pande hondo ka' ontinganan!

¹³ Tampat kajojoongan nu beleyum i Eden taman nu Tumpu. Pakean nu beleyum binunga-bungan nu ngangahan na mainan; batu dalima tiba intan, topas, batu pirus, batu yakut, ratna, cempaka, batu nilam, zamrud, tiba batu alkali anu momea'. Palahiasan mosoni' nu beleyum suele ahi' manjoo'. Balang haha aijo' binaumo ka' binee' hi beleyum tempo'nyo beleyum pinojadimo.

¹⁴ Malaekat anu okabuhuk hondo pinojoong-Kumo atina' da monjagai beleyum. Beleyum jinojoongmo aita' ibawo nu bungkutnyo anu susi' anu Aku na tumpu nyo ka' ilumajangmo itotonga' nu batu palamata anu lonyingkaban hondo.

¹⁵ Kalakuan nu beleyum ma'ima' hondo salatanmo pe'e beleyum pinojadi sampe beleyum nombaumo palabuatan anu ma'idek.

¹⁶ Beleyum talalo tasiaga badagang ka' aijo'mo na nonsaduakon beleyum da binuhingison ka' binaladosa'mo. Sahingga Ku laa'mo na beleyum da bolimo jojoong atina' ibungkutnyo anu susi' anu Aku na tumpunyo ka' malaekat anu monjagai beleyum molaa'mo beleyum da madi'mo jojoong atina' itotonga' nu palamata anu lonyingkaban hondo atina'.

¹⁷ Ohup nu beleyum anu ontinganan atina' nonsaduakonmo beleyum sahingga kinobubuunmo ka' kalana beleyum tinalasanggomo atina'mo na nonsaduakon beleyum sahingga pinonga'mo na binalatanga'. Mokonyo aijo' beleyum Ku sapahakonmo itano' ka' Ku pojadimo salaku sonto' hi aha to tomu-tomundo' sangga'at'.’ ”

¹⁸ Tumpu notatae, “O Tirus, beleyum nohumimi'imo iwi-iwi na tampat ponsomban mae nu beleyum kalana iwi-iwi na kasala'an ka' madi' adinan tempo'nyo binadagang. Kalana aijo' Ku papuaimo na beleyum sahingga jadimo mahata susumo tano'. Iwi-iwi' mian anu montoa beleyum memo montoa abu'.

¹⁹ Beleyum madi'mo daagi' otoa sampe toka sidu-sidutu'. Iwi-iwi' na bansa anu monsumbu' beleyum tinolokengkengmo na nohongo beleyum ka' mule' nabuhukmo de monta'up nasip anu susumo aijo'.”

Potate mongkona hukuman kona hi Sidon

²⁰ Tumpu notataemo mae hi belengku,

²¹ “O manusia anu madi' tumuu' batu kutukimo na kota' Sidon.

²² Poto'i hi aha anu jojoong ikiijo' taalu' Aku Tumpu Anu Matangkas na Kuasanyo notataemo hi aha, ‘Aku aiya sampobali' nu belemiu, o Sidon. Aha to mia-mian mompuji'mo Aku kalana palabuatan-Ku hi beleyum. Salatan Aku mohukumo mian anu jojoong atina' hi beleyum nu sumbu'je nu aha taalu' Akumo ahi' na Tumpu anu susi'.

²³ Ku potokamo mae na panyakit anu molele ka' mompojohokmo baso' mo ili atina' i iwi-iwi na jalan nu beleyum. Beleyum nu tumbuhimo nu sampobali' isongko-songko na tampat ka' miannyo anu jojoong itina' opateimo. Sahingga nu sumbu'je nu beleyum taalu' Akumo ahi' na Tumpu.’ ”

Israel obalakatimo

²⁴ Tumpu notatae, “Iwi-iwi na lipu' anu mompaha ohani anu madi' toho' nompopo ise' Israel madi'mo daagi' sumo unok tiba hii' anu monsakiti Israel. Aha mangalati'mo taalu' Akumo ahi' na Tumpu Anu Matangkas na Kuasanyo.”

²⁵ Tumpu Anu Matangkas na Kuasanyo notatae, “Ku posihukmo na to mia-mian Israel lengkat mae i iwi-iwi na lipu' anu toto jo'o-jo'on i tampat nu aha pipinongga'a-ga'atakonan-Kumo aha tiba iwi-iwi' na bansa saidi' mae monsumbu'je taalu' Aku susi'. Bansa Israel po ule' mule' jojoong i tano' nu aha, tano' anu binee'-Kumo hi posaihon-Ku i Yakub.

²⁶ Aha tumuu' madi'mo ko anu sola' mompoposia ikiijo' ka' mombaumo laigan, ka' mule' mombaumo ale' nu anggur. Ku hukumo na aha iwi-iwi' anu mompaha ohani tina aha sola-sola'mo nompopo ise' aha sahingga Israel jadimo sanang madi'mo ko anu sola' mompoposia. Sahingga nu sumbu'je nu aha taalu' Akumo ahi' na Tumpu nu aha.”