YEHEZKIEL 26 - KITAB NU TUMPU ALLA LELE MA'IMAI'

I nubuatakonmo na hukuman nu Tirus

¹ I tanggan sa'angu' ka'kinonamo ahi' memang i bitu'onnyo i uno nu taun kino sampulu'nyomo ka' sa'angu' tempo'nyo kami ihakop ka' binoamo i tampat pinompojoongan, Tumpu notataemo mae hi belengku, Ia notatae koo-Nyo,

² “O, manusia anu madi' tumuu' batu, aha mian anu jojoong i Tirus sola'mo nontaligalai ka' nontaloakon, ‘Yerusalem ihansunmo! Kamajuan nu aha baladagang imadi'anmo! Ia madi'mo moko ala mongkakanai mae kita!’ ”

³ Tumpu Anu Matangkas na Kuasanyo notataemo, “Aku aiya sampobali' nu beleyum o, Tirus! Aku momboamo mae manjoo' na bansa da montumbuhimo beleyum, ka' aha toka mae sumomo ahi' bokon nu ambai.

⁴ Aha mohansunimo iwi-iwi' na pagan mesen nu belemiu ka' mule' mohobo'akonmo laigan toto tangka-tangkas anu bau pontanggalakonan sampobali'. Iwi-iwi na tano' anu kiijo' mae Ku sautimo sahingga anu daagi' tontuha' memo ahi' batu sa'angu' anu madi'mo ko anu montumuu'i itotonga' nu ambai.

⁵ Aha anu sola mompagala ikan montimpa'imo buani nu aha i batu ai-aijo'. Aku Tumpu Anu Matangkas na Kuasanyo notataemo. Tirus timbalimo pongkanan nu aha manjoo' na bansa.

⁶ Nu pahuhuakonmo nu aha ka' mule' nu pateimo nu aha na mian anu jojoong i iwi-iwi na kota' itano' nu Tirus. Sahingga nu sumbu'je nu aha mian anu jojoong i Tirus taalu' Akumo ahi' na Tumpu.”

⁷ Tumpu Anu Matangkas na Kuasanyo notataemo, “Ku boamo na i Tomundo' Nebukadnezar lengkat mae i Babel da montumbuhimo beleyum, o, Tirus. Tomundo' anu mahoson hondo aijo' tokamo mae lengkat isasu utara tiba suludadunyo anu manjoo' hondo, ka' mule' ajahan nu aha manjoo' tiba kareta-kareta anu bau pahampate ka' mule' gombuan nu suludadu anu monsake'i mae ajahan.

⁸ To mia-mian anu jojoong i iwi-iwi na kota' opateimo i uno nu pahampatean aijo'. Sampobali' mongkekemo got bau palatahanan ka' mule' nontabuhimo pagan mesen haha aijo' da bau pontumbuhian ka' mule' nontambunmo kanta toto daka-daka' anu nu pake nu aha salaku benteng mongewa beleyum.

⁹ Nu hobo'akonmo nu aha napagan mesen nu pakakas anu bau pohobo'akon ka' mule' laigan toto tangka-tangkas anu pontanggalakonan sampobali' nu hobo'akonmo nu aha nu pakuen.

¹⁰ Ajahan nu aha manjoo' hondo sahingga galupaknyo aijo'mo na monsibung abu' kona hi belemiu. Daladak nu kareta anu taha-tahahumo na onyi'nyo aijo'mo kareta anu nu sake' mae nu suludadu anu mongato mae mantu tiba kareta anu bau pahampate, montananggahimo pagan mesen nu belemiu de aha motulumo isabatan daka' haha aijo' ka' minsoopmo i kota' anu ihansunmo aijo'.

¹¹ Gombuan nu suludadu anu monsake'i mae ajahan montumbuhimo iwi-iwi na jalan nu belemiu ka' nu tabasmo na belemiu nu bajak nu aha na mian anu atina' jojoong ikota'nu belemiu. Tugu nu belemiu anu toto ima-ima' ka' mahoson ohobo'akonmo.

¹² Sampobali' nu belemiu haha aijo' mompahuhuakonmo iwi-iwi na kakaya'an ka' bala-balang anu opodagang nu belemiu. Nu hobo'akonmo nu aha na pagan mesen iwi-iwi' ka' mule' laigan nu belemiu iwi-iwi' anu toto ima-ima'. Nu alamo nu aha na batunyo iwi-iwi', pagan ka' mule' tano'nyo, lantas nu lumbu'akonmo nu aha i ambai.

¹³ Ku pobelentimo na nyanyian nu belemiu tiba kasapi' nu belemiu bolimo sola' onyanyi ka' okuti'.

¹⁴ Anu Ku potuha' memo ahi' sa'angu' na batu anu madi'mo ko anu montumuu'i, tampat pontimpa'an buani' nu aha mian anu mompagala ikan. Kota' aijo' madi'mo daagi' po ule' obau. Aku Tumpu Anu Matangkas na Kuasanyo notataemo.”

¹⁵ Tumpu Anu Matangkas na Kuasanyo notataemo hi kota' Tirus, “Mian anu jojoong i daerah sonibi nu ambai langkakatanmo bau nu buhuk kalana mohongomo kihis nu belemiu pipinatundu'mo atina' ka' mule' tando' nu mian anu singkapmo pinatean.

¹⁶ Montoa uki' nu beleyum anu sinumo atina'mo, sahingga to tomu-tomundo' nu bansa-bansa anu isonibi nu ambai tuminjomo madi'mo sumuhang i tahtanyo ka' nu ukatmo nu aha na baju' pesalin tiba baju' nu aha anu sinujian, lantas sumuhangmo panyo nu lakatmo aijo' itano'. Aha mabuhukmo ahi' hondo sahingga madi'mo tenda na nu oa'i nu aha.

¹⁷ Lapas aijo' aha monyanyimo anu bau ponyanyiakon belemiu de olamunmo sumo uuka: Ihansunmo na kota' anu saja' opuji'! Iwi-iwi' na kapannyo sinapuanmo madi'mo daagi' ko anu indalangon. Mian anu jojoong aijo' hi ia binalakuasamo i ambai kinabuhukmo nu to mia-mian anu jojoong isonibi nu ambai.

¹⁸ Uuka aiya salatan beleyum pinatundu'mo mian anu jojoong itogong haha aijo' ilangkakatanmo. Tinolokengkengmo na aha iwi-iwi' nontoa beleyum ihansunmo susumo atina' anu madi' sinangka-sangka”

¹⁹ Tumpu Anu Matangkas na Kuasanyo, “Ku pojadimo liing hondo na beleyum susumo kota' anu madi'mo ko miannyo anu nonjojoongi. Ku lombongimo na beleyum nu uee anu lengkat mae ilananyo nu ndalangon.

²⁰ Lantas beleyum Ku boamo i dunia nu mian anu sinilakamo da sola'mo humang tiba aha mian anu sinilakamo salatanmo pe'e naipuan mae. Ku pojohokmo na beleyum da tataapmo i dunia nu mian anu sinilakamo aijo' itotonga' nu anu singkapmo na'idek sampe toka sidu-sidutu', tiba mian anu sinilakamo. Sahingga tano' nu beleyum madi'mo daagi' ojojoongi ka' beleyum mule' madi'mo daagi' oposoop ilekengan nu mian anu daagi tutuu'.

²¹ Beleyum Ku pojadimo sonto' anu okabuhuk hondo, ka' aijo'mo na puusnyo nu kantumuu'an nu beleyum. To mia-mian moliomo beleyum panyo beleyum madi'mo daagi' okabot. Aku Tumpu Anu Matangkas na Kuasanyo notataemo.”