YEHEZKIEL 24 - KITAB NU TUMPU ALLA LELE MA'IMAI'

Kuhon anu ingatakonmo

¹ I tanggan sampulu', bitu'on kinosampulu'nyomo kakonamo i taun kino osio'nyomo tempo'nyo kami ihakopmo ka' binoamo, Tumpu notataemo mae hi belengku,

² “O, manusia anu madi' tumuu' batu, tulis na tanggan sinaa aiya, kalana sinaa aiya i tomundo' Babel mambamo mae montumbuhi Yerusalem.

³ Aku, Tumpu daagi' ko sa'angu' na kantuangan da opoto'i hi aha mian anu palesayamo hi beleng-Ku anu mongka'oho'mo motomuhuk mae: Isii nu uee na kuhon ka' pokokomo i apu.

⁴ Po isi na antok nu binatang anu ma'ima' hondo; antok nu binatang anu ibekoangnyo ka' mule' antoknyo anu i pa'anyo ka' mule' bukunyo anu manjoo' na touaknyo.

⁵ Anu o, ala antok nu binatang domba anu molompo' ka' anu daagi' bata'nyo paka tuangi na kau'nyo anu bau pomposuni. Bakas da kumelebuak na ia lumua' kulua'i na antok nu binatang aijo' tiba bukunyo iwi-iwi'.”

⁶ Tumpu Anu Matangkas na Kuasanyo notatae, “Silakamo na kota' anu nobuke'mo nu mian anu saja'mo nompatei aijo'! Kota' aijo' sumomo ahi' kuhon anu ingatakonmo anu madi'mo toho' ginegesan. Antok nu binatang anu aijo' i unonyo toto sampadot na osangku' mae sampe mingkotmo iwi-iwi' madi'mo daagi' ko anu kiijo' i unonyo.

⁷ I kota' aijo' ko anumo pinatean, panyo baso' nu anu pinateanmo aijo' madi' nobubus i tano' panyo ola nobubus i batu anu mokuut hondo sahingga madi' opoko ala otabuhi.

⁸ Baso' aijo' pinojohok-Kumo ikiijo' sahingga timbali otoa ka' montuntutmo bau pombalosi.”

⁹ Tumpu Anu Matangkas na Kuasanyo notatae, “Silakamo na kota' anu nobuke'mo nu mian anu saja'mo nompatei aijo! Posi Akumo na momposun kau' bau pompapui ia.

¹⁰ Paka tuangi na kau'nyo! Pepehi na apunyo! Kulua'i na antoknyo nu binatang! Bubusakonmo na kulua'ian. Papuai na bukunyo iwi-iwi'!

¹¹ Uuka aiya pokoko na kuhon tambaga' anu madi'mo ko isinyo aijo' i apu ka' pojohok na ia sampe momea'mo susumo oba. De ataknyo motoyo'mo, kuhon aijo' po ule'mo belesi' susumo koonyo nu atulan nu agama.

¹² Panyo madi' iwi-iwi'mo na ataknyo nu toyo'imo nu apu.

¹³ O, Yerusalem palabuatan nu beleyum pala-palaganta aijo' nohumimi'imo butong nu beleyum. Aku, nompisobamo nompobelesi' beleyum panyo madi' ahi' kinogunanyo, kalana bele nu tataap ahi' mahumimi'. Beleyum madi'mo po ule' belesi' sahingga Ku potudunmo na tambuha'Ku hi beleyum.

¹⁴ Aku, Tumpu Anu Matangkas na Kuasanyo notataemo. Tinokamo na tempo'nyo na Aku mohukumo. Madi' Ku kolilimi' na dosa' nu beleyum ka' madi'mo daagi' mongampuni kabai mongkalibosi beleyum. Beleyum ohukumo sitimbang tiba palabuatan nu beleyum iwi-iwi'. Aku, Tumpu Anu Matangkas na Kuasanyo notataemo.”

Sinilakamo na bengkele' nu nabi

¹⁵ Tumpu notataemo mae hi belengku,

¹⁶ “O, manusia anu madi' tumuu' batu, monti-montiik ahi' Ku alamo na mian anu talalo hondo nu kanonongi. Panyo beleyum madi' timbali montando'i kabai mohangi kabai mompojuju lolu' nu beleyum.

¹⁷ Boli sampe hohunsuk nu beleyum ohongomo. Boli lumajang lantas madi' mingkukumbung kabai madi' mompai pisolop salaku mian anu sinusa'mo kalana ko anumo sinilaka.”

¹⁸ Daagi' subu-subu aku notataemo hi bansa aijo' ka' salatan pinihimo bengkele'ku sinilakamo. Dodododopnyo binaungkumo apaa na anu pinalentahkonmo mae hi belengku.

¹⁹ Mian da'isan nompokilawamo mae, “Kadaka' kita Tuuma nombaumo sumo aiya? Apaa na alati'nyo aijo' hi kami?”

²⁰ Lantas pinoto'ingkumo hi aha, “Tumpu na nompalentah mae aku

²¹ da mompoto'i potuunon aiya hi belemiu: Belemiu montakabunakonmo Kahosonan nu Laigan nu Tumpu. Belemiu mongka'ima'i montonto'i ia ka' sola' mamba hi ia, panyo nu pohumimi'mo na Laigan-Nyo. Ka' belemiu salaigan anu daagi olitau ka' daagi langkoyang daagi' jinojoong mae i Yerusalem, opateimo i uno nu pahampatean.

²² Lantas belemiu mombaumo susumo anu binaungkumo uuka aiya. Belemiu madi'mo daagi' mongkukumbungi ohup nu belemiu kabai mongkaan roti anu binau tempo'nyo ko anumo sinilaka.

²³ Belemiu madi' lumajang de madi' mingkukumbung kabai madi' minsolop kabai madi' tumando' kabai madi' humang. Belemiu ko susa-susa'nyomo kalana dosa-dosa' nu belemiu atina'; belemiu mompaha soso-sosolimo samian ka' samian.

²⁴ Sahingga aku i Yehezkiel baumo sonto hi belemiu; belemiu mombaumo susumo apaa na anu binaungkumo tempo' uuka aiya. Tumpu nompoto'imo mae, de han aijo' jadimo osumbu'je nu belemiu taalu' Iamo ahi' na Tumpu Anu Matangkas na Kuasanyo.”

²⁵ Tumpu notataemo mae hi belengku, “Jadi manusia anu madi' tumuu' batu, Ku alamo na Laigan-Ku anu maho-mahoson hondo aijo' hi aha nu takabunakon nu aha ka' anu tiimbalimo kasanangan nu aha ka' lewa' nu tonto'i nu aha ka' mule' sanang na kinyonyoa nu aha mamba mokiijo'. Lantas suele Ku alamo ahi' na to ana-anak nu aha.

²⁶ Toka isinaa aijo' Ku baumo na han aijo', ka' samian na anu moko ala mopalai da madi' silaka tokamo mae, ka' mompoto'imo lele aijo' hi beleyum.

²⁷ Toka isinaa aijo' beleyum suele moko alamo po ule' motatae ka' madi'mo momo'. Lantas beleyum motataemo hi mian aijo'. Sumo aijo'mo na beleyum timbali salaku tanda hi aha; sahingga nusumbu'je nu aha taalu' Akumo ahi' na Tumpu.”