YEHEZKIEL 22 - KITAB NU TUMPU ALLA LELE MA'IMAI'

Palabuatan ma'idek nu aha Yerusalem

¹ Tumpu notataemo mae hi belengku, Ia notatae,

² “O, manusia anu madi' tumuu' batu. Sinadiamo na beleyum mombee'i kaputusan hukuman i kota' anu kahomo mian anu sola' mompatei. Poto'i hi aha iwi-iwi' na palabuatan nu aha anu talalo hondo okahegati.”

^3-4 Tumpu Anu Matangkas na Kuasanyo nompokaumo aku da mompoto'i potuunon sumo uuka hi aha Yerusalem, “Beleyum sinala'mo kalana nosi pateimo mian nu belemiu anu jojoong itina' manjoo' hondo ka' nohumimi'imo butong nu belemiu nononsombahmo to pilo-pilogot anu pinosi bau nu belemiu. Kalana aijo' sinaa pomputusianmo hukuman anu onabu'akon hi beleyum ohanimo mae ka' silitanyo nu beleyum mingkotmo. Beleyum Ku pojohokmo da timbali anu saja' oleetakon ka' saja' okokojoi nu to bansa-bansa ka' mule' songko-songko na lipu'.

⁵ Beleyum sola'mo oleetakon nu aha lipu' anu toto jo'o-jo'on ka' anu toto oha-ohani kalana beleyum me saja' molanggai atulan tiba palentah.

⁶ Iwi-iwi' na to pola-polaya' nu aha Israel ola saja' mongkatabunakon posi kahosonan nu aha ka' saja' mompatei.

⁷ Madi'mo daagi' ko samiannyo na anu jojoong atina' hi beleyum na moholomati tu'anyo nu aha. Beleyum nongakalimo mian anu lengkat mae isalipu'an ka' nongalamo ka'untungan hi mian anu binalumo ka' mule' anu madi'mo ko tuumanyo tiba tinanyo sisingkapmo sinusa' aijo'.

⁸ Tampat-tampat anu biasa ponsomban mae Aku ihumimi'anmo nu beleyum ka' sinaa nu Sabat madi'mo daagi' pinasangkila nu beleyum.

⁹ Daagi' ko anu atina' jojoong hi beleyum na sola' mombebee'i sisik anu ma'idek ka' saja' monsisik anu madi' totu'u mian sangga'at da obee'i hukuman mate. Daagi' mule' ko mian anu mongka'ima'i mongkan ponoha' anu kinolobanakonmo hi pilogot. Daagi' mule' ko mian anu mongka'ima'masala'.

¹⁰ Daagi' ko mian anu monggoda ka' mompatiduhusi tinanyo te silabo'nyo, ka' mule' boune anu hau-haunyo tinokamo na adat nu aha boune.

¹¹ Bengkele' nu mian sangga'at kabai moniannyo boune, kabai utusnyo ise' anak nu tuumanyo hi bengkele' sangga'at.

¹² Daagi' mule' ko anu tinimbalimo mian topo patei sola-sola' obayan, mian anu talalo ahi' molio kantungan ka' saja' mongkelo aha mian anu bubuu' sangko bansanyo. Aha iwi-iwi' nongkolilimimo mae Aku. Aku, Tumpu Anu Matangkas na Kuasanyo notataemo.

¹³ Panyo uuka aiya Ku pateimo na to tolo-tololang tiba anu saja' mompatei.

¹⁴ Daagi' ahi' baani kabai daagi' ahi' mahoson na beleyum montangkakon lima nu beleyum de Ku poko hukumo na beleyum? Aku, Tumpu Anu Matangkas na Kuasanyo notataemo ka' Aku mule' momposidamo apaa na anu pinoto'ing-Kumo.

¹⁵ Ku ga'a-ga'atakonmo na mian anu atina' jojoong hi beleyum mamba hi iwi-iwi' na lipu' ka' bansa ka Ku pobelentimo na palabuatan nu beleyum ma'i-ma'idek atina'.

¹⁶ Beleyum nu alumo nu bansa-bansa sangga'at, sahingga nu sumbu'je nu beleyum na Aku, taalu' Akumo ahi' na Tumpu.”

Apu anu momposusi'

¹⁷ Tumpu notataemo mae hi belengku,

¹⁸ “O, manusia anu madi' tumuu' batu, aha to mia-mian nu Israel haha aijo' madi'mo kinogunanyo hi beleng-Ku. Aha sumomo ahi' atak nu logam anu nogogalo'anmo lapangnyo tambaga, timah, besak tiba timah mo'i-mo'itom anu tinontuha' salatan salaka sinuangmo i apu.

^19-20 Sahingga uuka aiya, Aku Tumpu Anu Matangkas na Kuasanyo mompoto'imo hi aha saba' aha sumomo ahi' logam anu madi'mo daagi' kinogunanyo aijo'. Susumo batu nu salaka, tambaga, besak, timah mo'i-mo'itom tiba timah mopu-mopute' oposoopmo i apu ponsuangan, sumo aijo'mo na aha Ku posihukmo ka' Ku boamo i Yerusalem. Tambuha'-Ku anu taha-tahahumo na mompohansunimo aha, sumo apu mohansunimo iwi-iwi na batu nu logam.

²¹ Memang Ku posihukmo na aha i Yerusalem ka' Ku tutungimo na apu tambuha'-Ku aijo' i aluk nu aha sahingga aha hansunmo ahi' totu-totu'u.

²² Susumo salaka ohansunimo i uno nu ponsuangan, sumo aijo'mo na aha ohansunimo kiijo' i Yerusalem. Sahingga nu sumbu'je nu aha taalu' Akumo ahi' na Tumpu anu nompotudunmo tambuha'-Ku hi aha.”

Dosa' nu to pola-polaya' nu aha Israel

²³ Tumpu notatae mule' mae hi belengku, Ia notatae,

²⁴ “O, manusia anu madi' tumuu' batu, poto'imo hi aha mian nu Israel, taalu' tano' nu aha nahumimi'imo kalana aijo' anu notambuha'mo ka' mohukumo aha.

²⁵ To pola-polaya' nu aha sumomo ahi' singa molohu'mo salatan nonsa'umo kaanonnyo. Aha nompateimo mian da'isan, nongagoimo iwi-iwi' na halata' tiba kakaya'an anu nu humpak nu aha ka' nonsaduakonmo manjoo' na to bou-boune anu binalumo.

²⁶ Aha to ima-imam nu Israel nolanggaimo iwi-iwi na atulan-Ku ka' nohumimi'imo santo bala-balang anu opake samata-mata monsombah Aku. Aha madi'mo mombedakon iya na anu timbali okaan tiba iya na anu madi' timbali okaan. Ka' mule' aha madi'mo nongajan mian da'isan da monsumbu' mombedakon iya na anu belesi' ka' iya na anu mahumimi' susumo koonyo nu atulan nu agama. Aha madi'mo mompajuli sinaa nu Sabat. Tiba jalan anu sumo aijo' na Aku ingambanganmo nu bansa Israel.

²⁷ To pama-pamalentahnyo sumomo ahi' serigala anu nombente-bentekmo kaanonnyo. Aha sola'mo nompatei mian ola kalana da molio ka untungan.

²⁸ To nabi-nabi nu aha ola ahi' mompohowini dosa' haha aijo'; aha sumomo ahi mian anu monset mesen anu ihogangmo, sinetmo nu tilon. Apa-apaa na anu tinoamo nu aha madi' totu'u, sumo aijo'mo suele na anu sola'mo kinila-kila nu aha. Aha mongakui tukoonyo nu aha potuunon anu pinoto'imo nu aha, aijo' anu tinalima nu aha lengkat mae hi Tumpu Anu Matangkas na Kuasanyo padahal Aku madi' ahi' hondo-hondo nompoto'i hi aha.

²⁹ To mia-mian kaya lewa' mongakali ka' mompahuhuakon halata' nu mian. Aha sola' monsuka-sukai na mompalentah mian kasiasi ka' sola mongala ka untungan hi mian nu aha salipu'an.

³⁰ Aijo' hi aha mian nu Israel haha aijo' Ku lio na mian anu timbali mompotinjo pagan mesen kabai tuminjo itampat-tampat anu ko anumo nohobo' na pagan nyo mesen da timbali montinjohakon lipu' aijo' de aku mohansunimo kalana Aku talalomo notambuha'; panyo mau samian madi' ahi' ko anu kinabot-Ku.

³¹ Kalana aijo' uuka aiya Ku potudunmo na tambuha'-Ku hi aha, ka' susumo apu Ku toyo'imo na aha kalana iwi-iwi' na palabuatan nu aha Aku, Tumpu Anu Matangkas na Kuasanyo notataemo.”