YEHEZKIEL 21 - KITAB NU TUMPU ALLA LELE MA'IMAI'

Bajak nu Tumpu

¹ Tumpu notataemo mae hi belengku, koo-Nyo,

² “O, manusia anu madi' tumuu' batu, kutukimo na Yerusalem. Kutukimo na tampat-tampat ponsomban nu aha kiijo' mae. Pokinde'imo na tano' nu Israel,

³ taalu' Aku, Tumpu nompoto'imo mae sumo uuka, ‘Aku aiya sampobali' nu beleyum. Ku keatmo na bajak-Ku ka' mompateimo belemiu iwi-iwi' mau anu ma'ima' na kinyonyoanyo kabai anu manonong.

⁴ Bajak-Kumo aiya na bau pongewang-Ku iwi-iwi' na mian anu lengkat mae isasu utara toka-toka isasu salatan.

⁵ Sahingga nu sumbu'je nu aha mian iwi-iwi' taalu' Akumo ahi' na Tumpu anu nongkeatmo bajak-Ku ka' madi'mo daagi' po ule' oposalung.’

⁶ O, manusia anu madi' tumuu' batu, polotando'mo ka' pososonmo i ahop nu to mia-mian Israel, susumo au'aitu beleyum madi'mo ko halapan.

⁷ De aha mompokilawa kadaka' beleyum nososonmo saba' poto'i taalu' beleyum sinusa'mo na kinyonyoa kalana lele nu balaa' anu saidi' mae toka. Lele aijo' mompolangkakatanmo kinyonyoa nu aha, lima nu aha lundengmo, ka' ike-ike' nu aha suele langkakatanmo ahi', aha madi'mo daagi' bilak. Memang sinaanyo aijo' tokamo mae, ka' iwi-iwi' aijo' tionyo ahi' jadimo. Aku, Tumpu Anu Matangkas na Kuasanyo notataemo.”

⁸ Tumpu notataemo mae hi belengku,

⁹ “O, manusia anu madi' tumuu' batu, soba sola'mo pongkila-kilamo! Poto'imo hi aha to mia-mian taalu' Aku, Tumpu notataemo sumo uuka, ‘Daagi' ko samata na bajak bajak anu ginegesanmo ka' pinotajomo.

¹⁰ Ia pinotajomo da timbali mompatei, pinolonde'mo da jongkilaban. Hi aha mian anu palesayamo hi belengku madi'mo daagi' kokalame'an kalana iwi-iwi' na pokinde' tiba hukuman anu pinoto'imo madi' na pajuli nu aha.

¹¹ Bajak aijo' binoitmo da me kokogia' opake lantas obee'mo hi samian anu tukang kolot.

¹² O, manusia anu madi' tumuu' batu, haangmo ka' polotando'mo! Kalana bajak aijo' mongewamo mian anu palesayamo hi beleng-Ku. To pola-polaya' nu aha Israel tiba songko-songko na bansa otabasmo nubajak aijo' sampe aha silakamo. Jadi hapa' na saha'an nu beleyum kalana nolibosmo,

¹³ kalana Aku hau-haunyomo monguji' mian anu palesayamo hi beleng-Ku, de aha madi' mongka'oho' mompoko ima'i kalakuan nu aha saba' iwi-iwi' aijo' jadimo ahi' hi aha'.’

¹⁴ Jadi, o, manusia anu madi' tumuu' batu, pongkila-kilamo. Hapa'i na lima nu beleyum da bau salaku tanda bajak aijo' montampu'unimo mongkolot. Bajak aijo' talalo ahi' okabuhuk.

¹⁵ Ia nompojadimo bansang-Ku da madi'mo binaani ka' nohumpakmo kasusa'an. Pinopobuhuk-Kumo na kota' nu aha nu bajak anu jijinongkilabanmo aijo' susumo kilat ka' me kogia'nyo mompatei.

¹⁶ O, bajak tajo-tajom tabasakonmo mokiijo' ikoanan ka' mo uutu ikewe' ka' mule' pa' moya na anu nu kahanda'i.

¹⁷ Aku suele mohapa'imo lima lantas madi'mo Aku motambuha'. Aku, Tumpu notataemo.”

Bajak i tomundo' Babel

¹⁸ Tumpu notataemo mae hi belengku, koo-Nyo,

^19-20 “O, manusia anu madi' tumuu' batu, soba gamban ohua' na jalan anu timbali nu tului i tomundo' Babel, nonomboamo bajaknyo. Ohu-ohua' na jalan aijo' tionyo ahi' nolengkat mae i sa'angu' na lipu'; jalan sa'angu' mamba i Raba kota' Amon; jalan sa'angu' mule' mamba i Yerusalem, kota' anu ko bentengnyo i daerah Yehuda. Pokonai dopi' da bau pompotiju' popanga'anmo nu jalan.

²¹ Tomundo' nu Babel tinuminjomo koko dopi' anu bau pompotiju jalan aijo'. Da osumbu' pa' iya na jalan anu nu tului ia nomoitamo hi to pilo-pilogotnyo da opotiju' mae na jalan, ia nolengku-lengkutmo pana'nyo ka' nompalesamo ate nu binatang anu salaje kinolobanakon.

²² Atina'je ka' sinumbu'nyo taalu' pana' anu totoong ilimanyo koanan ko tulisannyo Yerusalem! Aijo' alati'nyo itomundo' tionyo ahi' montumbuhimo kota' Yerusalem, ka' tolo aismo salaku tanda mahampatemo ka' mompalentahmo suludadunyo mongatun bau pohobo'akon ka' aijo' opokona isabatan daka' nu Yerusalem ka' montambuni nu tano' da bau jalan pontumbuhian ka' mongkekekmo got.

²³ Mian anu jojoong i Yerusalem madi' palesaya na aha aijo' otumbuhimo kalana aha nombaumo palajanjian tiba Babel. Panyo kila-kila'an aijo' ola ahi' da bau pompo ingat aha saba' aha aijo' ohakopmo kalana dosa-dosa' nu aha.

²⁴ Aku, Tumpu Anu Matangkas na Kuasanyo nompoto'imo aha, ‘Dosa-dosa' nu belemiu sinumbu'mo ka' iwi-iwi' na mian nonsumbu'mo kasala'an nu belemiu. Ka'idekan nu kinyonyoa nu belemiu atina' tinoamo ipalabuatan nu belemiu. Uuka aiya tinokamo na tempo'nyo belemiu ohukumo ka' belemiu Ku bee'mo hi sampobali' nu belemiu.’

²⁵ Ka' hi tomundo' nu Israel Ku poto'i, ‘O, tomundo' anu ma'idek na kinyonyoanyo ka' palaganta! Sinaa anu pupusnyomo na beleyum ohukum malia'mo mae toka.

²⁶ Aku, Tumpu Anu Matangkas na Kuasanyo motataemo. Ukatakonmo na mahkota' nu beleyum ka' mule' singgan nu beleyum pulasakomo. Uuka aiya ka'ada'an madi'mo susumo u'utu mae. Bangonakon na kantumuu'an nu aha mian anu kasiasi ka' bee'i na aha kakuasa'an! Tau'akon na kantumuu' nu aha to mia-mian anu balakuasa!

²⁷ Kota' aiya Ku hansunimo ingko-ingkot sahingga iyaya mae daagi' ko anu ihansunmo. Panyo han aijo' jadije ahi' de mian anu pinile'an-Kumo mohukum kota' aiya tokamo mae. Hi iamo ahi' na pombee'an-Ku kota' aiya'.’ ”

Bajak ka' aha mian nu Amon

²⁸ “O, manusia anu madi' tumuu' batu, pongkila-kilamo! Poto'i hi aha mian nu Amon anu sola'mo nongalu mian nu Israel, taalu' Aku, Tumpu Anu Matangkas na Kuasanyo notataemo, ‘Samata na bajak binoitmo sampe jinongkilaban susumo kilat da me kokogia' baumo pompatei.

²⁹ Apaa na anu tinoamo nu belemiu madi' totu'u ka' mule' apaa na anu kinila-kilamo nu belemiu atina' pipinoto'imo nu belemiu suele ahi' baleko'. Kinyonyoa nu belemiu ma'idek ka' mule' palaganta, ka' sinaa anu pohukumanmo belemiu atina' anu pupusnyomo malia'mo mae toka. Bajak aijo' mongkolongmo gogohong nu belemiu.

³⁰ O, mian nu Amon, po ule' posalung na bajak nu beleyum! Belemiu Ku bee'imo hukuman itampat belemiu pinotimbali ka' pinohampe.

³¹ Ku potudunmo na tambuha'Ku anu inoakmo susumo apu hi belemiu. Ka' belemiu Ku bee'mo hi to mia-mian anu talalo buhingison anu memang ahi' ingajanmo na mompatei.

³² Belemiu nu kaanmo nu apu ingko-ingkot. Baso' nu belemiu mobubusmo iposi lipu' nu belemiu ka' madi'mo daagi kosamian na anu daagi monginau belemiu. Aku, Tumpu notataemo'.’ ”