YEHEZKIEL 20 - KITAB NU TUMPU ALLA LELE MA'IMAI'

Anu nu kahanda'i nu Tumpu ka' palabuatan ma'idek nu manusia

¹ Kakona itangganmo sampulu' bitu'on ko olima'nyomo i taun anu ko popitu'nyomo tempo'nyo kami ihakop ka' binoamo, daagi' kinoto pia-piangkuka na aha polaya' nu Israel tinokamo mae hi belengku da momoita pokinde hi Tumpu. Salatan aha sinumuhangmo i ahopku,

² ihongongkumo na Tumpu notatae mae hi belengku,

³ “O, manusia anu madi' tumuu' batu, potatae hi aha to pola-polaya' haha aijo' ka' poto'i hi aha saba' Aku, Tumpu Anu Matangkas na Kuasanyo notatae mae sumo uuka, ‘Baani hondo mae na belemiu momoita pokinde' hi belengku! Atas sanggong-Ku, Aku Tumpu Allah anu tumuu', Aku madi'mo halala' na pomoitan mae pokinde' nu belemiu! Aku, Tumpu Anu Matangkas na Kuasanyo notataemo'.’

⁴ O, manusia anu madi' tumuu' batu, binalasadiamo na beleyum momputusi hukuman nu aha? Dongan sampamo bau! Po ingat hi aha na anu okahegati iwi-iwi' bina-binaumo nu mompolee' nu aha.

⁵ Poto'i apaa na anu tinaloakon-Kumo aiya. Aku nompile'imo Israel ka' binauakon sumpah hi aha. Tempo'nyo i Mesir Aku nanintoamo hi aha ka' nompoto'imo, ‘Akumo na Tumpu nu belemiu.’

⁶ Tempo'nyo aijo' Aku nompohosonmo nu sumpa' na momboa aha mosabat lengkat i Mesir mamba ilipu' anu pinile'an-Kumo da bau kajojoongan nu aha. Lipu' aijo' kaya ka' mule' ma'omuk, tano' anu ma'ma hondo isongko-songko na dunia.

⁷ Pinalentah-ngKumo na aha da mongalin iwi-iwi na patong anu okahegati anu nu ka'ima'i nu aha aijo', ka' tinewa'-Kumo na aha mohumimi'i butong nu aha nu palabuatan sola' monsombah to pilo-pilogot anu lengkat mae i Mesir, kalana Akumo ahi' na Tumpu Allah nu aha.

⁸ Panyo aha madi' montuluti Aku ka' madi' mongka'oho' mohongo Aku. Aha madi' mongka'oho' mongalin iwi-iwi na patong nu aha anu okahegati aijo' ka' mule' madi' ahi mongka'oho' belenti na monsombah pilogot haha aijo' anu lengkat mae i Mesir. Tempo'nyo aha daagi' kiijo' mae, Aku sabenannyo mompotudunmo ahi' tambuha'-Ku hi aha.

⁹ Panyo aijo' madi' binaung-Ku da sanggong-Ku boli mae o'alu nu to bansa-bansa itampat kajojoongan nu aha. Kalana i ahop nu bansa haha aijo' Aku nombebakonmo tukoong-Ku bansa Israel Ku sabatakonmo lengkat i Mesir.

¹⁰ Lantas binoang-Kumo na aha lengkat i Mesir, da mambamo padang tampat anu kaho bone'nyo.

¹¹ Ikiijo' mae Ku bee'mo na palentah-ngKu hi aha ka' Ku ajanakonmo na atulan-Ku anu tionyo ahi' nu tuluti nu aha kalana mian anu montuluti aijo' na tataap ahi' tumuu'.

¹² Ku palentahmo na aha da moholomati ahi' sinaa nu Sabat salaku tanda palajanjian anu binee'-Kumo hi aha saba' Akumo ahi' na Tumpu, anu nompo iwi'mo aha salaku mian anu palesayamo hi beleng-Ku.

¹³ Panyo ipadang tampat anu kaho bone'nyo aijo' suele ahi' aha madi' mohongo-hongo mae Aku. Aha nolanggaimo iwi-iwi na palentah-Ku ka' madi'mo daagi' nontalima atulan-Ku, anu nompatikolomo tukoonyo mian anu montuluti aijo' tataap tumuu'. Aha talalomo nohumimi'i sinaa nu Sabat. Kalana aijo' ipadang tampat anu kaho bone'nyo Aku sabenannyo mompotudunmo ahi' tambuha'-Ku hi aha ka' monsilakaimo aha.

¹⁴ Panyo aijo' madi' binaung-Ku kalana monginau' kaholomatan nu sanggong-Ku, da sanggong-Ku boli mae o'alu nu to bansa-bansa anu nontoa mae Aku nomboa mae aha Israel nosabat lengkat mae i Mesir.

¹⁵ I padang tampat anu kaho bone'nyo aijo' suele Aku nontambuha'imo tukoong-Ku bansa Israel madi'mo daagi' Ku boa minsoop itano' anu pinotoukakonmo hi aha aijo'mo tano' anu kaya ka' mule' ma'omuk ka' mule' anu ma'ima' hondo isongko-songko na dunia.

¹⁶ Tambuha' anu tinaloakon-Kumo aijo' kalana aha madi' montuluti palentah-ngKu ka' mule' nolanggaimo na atulan-Ku ka' nohumimi'imo sinaa nu Sabat. Aha lebe mongka'ima'i monsombah pilogot nu aha haha aijo.

¹⁷ Panyo lapas aijo' Aku po ule'mo nolibos hi aha sahingga aha madi'mo tinotu'uan-ku pinatean ipadang tampat anu kaho bone'nyo aijo'.

¹⁸ Ka' mule' to ana-anak nu aha anu daagi' to oli-olitau ka' to lalangkoyang aijo' hi aha pinokinde'an-Kumo sumo uuka, ‘Bolimo daagi' montuluti atulan-atulan anu binau nu mompolee' nu belemiu. Bolimo daagi' mombau kabiasa'an nu aha ka' suele bolimo daagi' mohumimi'i butong nu belemiu monsombahmo pilogot nu aha haha aijo'.

¹⁹ Akumo ahi' na Tumpu nu belemiu. Saboleh-boleh otuluti na atulan-atulan tiba iwi-iwi na palentah-ngKu.

²⁰ Oholomati na sinaa nu Sabat da timbali bau salaku tanda palajanjian hi belengku tiba hi belemiu salaku bau pompotuka hi belemiu saba' Akumo ahi' na Tumpu nu belemiu'.’

²¹ Panyo aha salapisan mae to oli-olitau tiba to lalangkoyang haha aijo' suele ahi' madi' montapali mae Aku. Aha nolanggaimo ahi atulan-Ku ka' mule' madi'mo nontuluti iwi-iwi na palentah-ngKu anu nompatikolomo tukoonyo mian anu montuluti aijo' tataap tumuu'. Aha nohumimi'imo sinaa nu Sabat. Kalana aijo' Aku sabenannyo mompotudunmo ahi' tambuha'-Ku hi aha ipadang tampat anu kaho bone'nyo aijo' ka' mompateimo aha iwi-iwi'.

²² Panyo aijo' madi' binaung-Ku kalana monginau' da sanggong-Ku boli mae o'alu nu to bansang-bansang anu nontoa mae Aku nomboa mae aha Israel nosabat lengkat mae i Mesir.

²³ I padang tampat anu kaho bone'nyo aijo', suele Aku nompohosonmo nu sumpa' tukoong-Ku, Ku ga'a-ga'atakonmo na aha mamba isongko-songko na dunia,

²⁴ kalana aha madi'mo nontuluti iwi-iwi na palentah-ngKu ka' mule' nolanggaimo atulan-Ku, ka' mule' nohumimi'imo sinaa nu Sabat ka' tataap monsombah to pilo-pilogot anu saja' nu sombah nu mompolee' nu aha.

²⁵ Lapas aijo' binee'-Kumo hi aha na atulan-Ku iwi-iwi' anu madi' ma'ima' tiba iwi-iwi na palentah-ngKu anu madi' mombee'i kantumuu'an.

²⁶ Pinojohok-Kumo na aha nohumimi'imo butong nu aha sola-sola'mo nongkolobanakonmo anu posi kinolobanakonmo nu aha ka' mule' to ana-anak mo'ane nu aha anu tumpenyo kinolobanakonmo nu aha. Tiba jalan anu sumo aijo' na bau pohukum-Ku aha da nu sumbu' nu aha taalu' Akumo ahi' na Tumpu.

²⁷ Jadi o, manusia anu madi' tumuu' batu, poto'i hi aha mian nu Israel apaa na anu pinoto'ing-Kumo hi aha, Aku, Tumpu Anu Matangkas na Kuasanyo; Aiya na sonto' sangga'at anu momponyata' mosia na mompolee' nu belemiu sola'mo mae nongalu Aku ka' madi'mo nontuluti Aku.

²⁸ Aku nombomo mae aha itano' anu jinanji'-Kumo hi aha. Salatan aha nontoamo puge'nyo haha aita' anu toto tangka-tangkas ka' mule' kau' anu toto tambo-tambok na honnyo aha nomsombahkonmo koloban itampat haha aijo'. Aha nonsaduakonmo da Aku notambuha' kalana koloban-koloban anu opotunu ka' mule' aha nonsombahkonmo anggur nu aha.

²⁹ Aku nompokilawamo hi aha, ‘Tampat-tampat anu toto tangka-tangkas apaa na anu ilambananmo nu belemiu aijo'?’ Sahingga salatanmo pe'e aitu tampat-tampat haha aijo' sinanggohanmo ‘Tampat-tampat matangkas’.

³⁰ Jadi poto'imo hi aha mian nu Israel apaa na anu pinoto'ing-Kumo hi aha, Aku, Tumpu Anu Matangkas na Kuasanyo. ‘Kadaka' belemiu nombaumo dosa' haha atina' susumo anu binaumo nu mompolee' nu belemiu? Susumo aha, belemiu suele nontulutimo ahi' pilogot haha aijo' anu okahegati.

³¹ Ka' mule' sampe sinaa uuka aiya belemiu suele ahi' mohumimi'i butong nu belemiu momomboamo palasombahan ka' mompapuimo to ana-anak nu belemiu salaku koloban hi to pilo-pilogot. Lantas daagi' mule' ahi' na belemiu momoita mae pokinde' hi beleng-Ku? Atas sanggong-Ku, Tumpu anu tumuu', Tumpu Anu Matangkas na Kuasanyo, belemiu madi'mo Ku pobee' momoita mae pokinde' hi beleng-Ku.

³² Belemiu kahanda' mongkakanai bansa-bansa sangga'at ka' mule' mian anu jojoong ilipu' sangga'at anu monsombah kau' tiba batu. Panyo apaan anu nu kahanda'i nu belemiu atina' madi' nu humpak nu belemiu'.’ ”

Tumpu mohukum ka' mongampuni

^33-34 “Atas sanggong-Ku, Aku, Tumpu anu tumuu', Tumpu Anu Matangkas na Kuasanyo, Ku pokinde'i na belemiu saba' kalana Aku notambuha'mo, belemiu Ku kensengimo na mompalentah sahingga nu oa'imo nu belemiu na kuasang-Ku. Belemiu ku posihukmo ka' po ule'mo Ku boa mae lengkat mae isinin na lipu' tampat pipinongga'a-ga'atakonanmo belemiu.

³⁵ Lantas belemiu Ku boamo i tampat anu ‘Mateges nu Bansa-bansa’. Ikiijo' mae belemiu Ku putusimo na hukuman nu belemiu, Aku tiba belemiu mompaha ahopmo,

³⁶ susumo anu binaung-Kumo hi mompolee' nu belemiu itampat anu Mateges Sinai. Aku, Tumpu Anu Matangkas na Kuasanyo notataemo.

³⁷ Belemiu Ku kensengimo na mompalentah da otulutimo nu belemiu na palajanjian-Ku.

³⁸ To mia-mian anu saja' motomuhuk tiba anu saja' mombau palabuatan anu ma'idek madi'mo Ku pogalum atina' hi belemiu. Aha Ku boamo mosabat lengkat lipu' iwi-iwi', tampat nu aha tempo uuka aiya ka' madi'mo Ku pobee' minsusule' itano' nu Israel. Sahingga nu sumbu'je nu belemiu taalu' Akumo ahi' na Tumpu.”

³⁹ Tumpu Anu Matangkas na Kuasanyo notataemo, “O, to mia-mian nu Israel, uuka aiya yayamo belemiu. Saboleh-bolehmo ahi' pombau dosa' monsombahmo pilogot nu belemiu haha atina'! Panyo jaga lapas mae na atina' belemiu tionyo ahi' montulutimo Aku ka' madi'mo ahi' daagi' mohumimi'i sanggong-Ku anu susi' kalana momboamo palasombahan hi pilogot nu belemiu haha atina'.

⁴⁰ Kalana itano' nu Israel anu aita' ibawo nu bungkutnyo anu susi' anu Aku na tumpunyo belemiu iwi-iwi' bansa Israel saidi' mae monsombahmo Aku. Ikiita' mae Aku sanangje hi belemiu ka' timbalimo montalima koloban-koloban nu belemiu, ka' palasombahan-palasombahan nu belemiu anu lebe ma'ima' ka' mule' iwi-iwi' na anu obee' nu belemiu anu memang pinosi po iwi'mo.

⁴¹ Salatan belemiu Ku boamo mosabat lengkat mae i songko-songko na lipu' itampat pipinongga'a-ga'atakonanmo belemiu, Aku po ule'mo momposihuk belemiu ka' montalimamo iwi-iwi na koloban anu opotunu nu belemiu. Sahingga songko-songko na bansa monsumbu'je taalu' Akumo ahi aiya na Tumpu Anu Susi' hondo.

⁴² Bisuanyo belemiu Ku boamo minsusule' itano' nu Israel, tano' anu jinanji'Kumo hi mompolee' nu belemiu, sahingga nu sumbu'je nu belemiu taalu' Akumo ahi' na Tumpu.

⁴³ Ikiijo' mae belemiu tonginau'je iwi-iwi' na palabuatan anu okahegati anu nohumimi'imo butong nu belemiu. Sahingga bubunje na belemiu de tonginau'mo ipalabuatan aijo' iwi-iwi'.

⁴⁴ De belemiu Ku baumo susumo aijo' da sanggong-Ku oholomati, ka' madi' ahi' sitimbang tiba kalakuan nu belemiu mai-madi' talakana ka' mule' palabuatan ma'idek nu belemiu, atina'je ka' nu sumbu' nu belemiu mian nu Israel taalu' Akumo ahi' na Tumpu Anu Matangkas na Kuasanyo notataemo.”

Apu anu isasu salatan

⁴⁵ Tumpu notataemo mae hi belengku, sumo uuka,

⁴⁶ “O, manusia anu madi' tumuu' batu, soba toa isasu salatan. Soba taeakon hi tano' sasu salatan ka' tambuha'i na alas anu kiijo' mae.

⁴⁷ Soba palentah na alas aijo' da mompotombihing mae apaa na anu Ku taloakon hi aha, Aku, Tumpu Anu Matangkas na Kuasanyo, notataemo hi aha, ‘Soba potombihing mae! Aku momposunmo apu da pompapuimo sampe mingkot na to kau-kau' anu itina' hi beleyum, mau anu inanggasmo kabai anu daagi' mata'. Apu anu timbuhukanmo aijo' madi'mo daagi' opoko ala opatei. Ia mokaanmo lengkat mae isasu salatan ka' mambamo isasu utara ka' iwi-iwi' na mian mongoa'imo panasnyo.

⁴⁸ Aha saidi' mae sinsumbu'je taalu' Akumo ahi' na Tumpu anu nomposunmo apu aijo' ka' madi' ko samian pe'e na anu moko ala mompatei apu aijo'.’ ”

⁴⁹ Panyo aku i Yehezkiel nompoto'imo kabalatanku ka' notataemo, “O, Tumpu Anu Matangkas na Kuasanyo, boli mae mompalentah aku mompoto'i han aijo'! Iwi-iwi' na mian notusa'mo kalana aku saja' mompake ibalat sahingga susa' na opoko ala opangalati'i.”