YEHEZKIEL 2 - KITAB NU TUMPU ALLA LELE MA'IMAI'

¹ nontaloakon, “O, manusia anu madi' tumuu' pati tinjomo. Aku kahanda'mo motatae hi beleyum.”

² Salatan potatae aijo' ihongongkumo ninsoopmo na Roh nu Tumpu hi belengku, ka' binulaakonnyomo na aku. Lapas aijo' po ule' mule' ihongongku na potatae nontaloakon,

³ “O, manusia anu madi' tumuu' batu, beleyum Ku saimo mamba hi aha mian nu Israel anu notomuhukmo madi'mo montuluti mae Aku. Aha aijo saja' ahi' motomuhuk madi' sala' susumo ahi' mompolee' mae nu aha.

⁴ Aha panggaga hondo ka' mule' madi'mo mae moholomati Aku. Beleyum Ku saimo mamba hi aha da mompotokakon apaa na anu kahanda' Ku poto'i aiya, Aku, Tumpu Anu matangkas na Kuasanyo mompoto'i hi aha,

⁵ pa' ka oho' nu hongo nu aha kabai madi'; asan nu sumbu'mo nu aha taalu' daagi' ko nabi aijo' hi aha.

⁶ Panyo beleyum, o, manusia anu madi' tumuu' batu boli mabuhuk hi aha anu sosola' motomuhuk aijo' kabai apaa na anu nu taloakon nu aha. Aha saidi' mae mongewamo ka' mompopo ambangmo beleyum, sahingga beleyum sumomo ahi' tumuu' galo-galo' hi beyua'. Panyo maumo ahi' sumo aijo', boli mabuhuk.

⁷ Poto'i ahi' iwi-iwi' na potuunon-Ku hi aha pa' nu hongo nu aha kabai madi'. Boli okolilimi saba' aha aijo' mian anu saja' motomuhuk.

⁸ O, manusia anu madi' tumuu' batu, potombihing mae apaa na anu Ku poto'i hi beleyum. Boli mule' ahi' montiho aha motomuhuk. Po anga' mae na nganga' nu beleyum ka' kaan apaa na anu Ku bee' hi beleyum.”

⁹ Lapas aijo' aku nontoamo lima anu inguluakonmo mae hi belengku. Totoong ilima aijo' kitab anu ilulunmo,

¹⁰ anu tinulisan sambiha' ka' sambiha'. Lantas binuka'nyomo na lulunan aijo' ka' ikiijo' tinulis lewa' humang, lewa'mo nompele-pele', ka' lewa'mo nongoa'i kasusa'an.