YEHEZKIEL 18 - KITAB NU TUMPU ALLA LELE MA'IMAI'

¹ Tumpu notataemo mae hi belengku,

² “Kadaka' potatae aijo' me saja' osanggo ilipu' Israel? ‘To tu'a-tu'anyo mongkaan bua' nu anggur anu malosing, panyo to ana-anakmo ahi' na mangilu' na bese'nyo.’

³ Atas sanggong-Ku, Tumpu anu tumuu', Tumpu Anu Matangkas na Kuasanyo, potatae aijo'madi'mo daagi' otaloakon i Israel.

⁴ Nyawa nu mian Aku na tumpunyo, mau nyawa nu anu tu'anyomo kabai nyawa nu anaknyo. Mian anu baladosa' aijo' ahi' na silaka.

⁵ Bisuanyo daagi' ko mian anu manonong, adin ka' mule' hodi' na kinyonyoanyo.

⁶ Ia madi' monsombah pilogot nu aha Israel kabai mongkaan koloban palasombahan itampat-tampat ponsomban to pilo-pilogot. Ia madi' toho' monggoda bengkele' nu mian sangga'at kabai moduhusmo boune anu tinokamo na adat nu aha boune.

⁷ Ia madi' toho' mongakali kabai mombuling. Bala-balang nu mian anu pinogade mae nu mian hi ia kalana ko samaya nu aha hi ia saja' nu sule'akon. Mian anu mo'ohopmo nu bee'i mongkaan ka' mian anu madi'mo ko baju' nu bee'i baju'.

⁸ Ia madi' toho' momposaboli mian opakeakon bunganyo. Ia madi' mongka'oho' mombau palabuatan anu ma'idek ka' de painggagamo tiba mian sangga'at ia mombee'i kaputusan anu madi' tageo'.

⁹ Ia montuluti hondo palentah-ngKu ka' mule' tulu-tulutan hondo i atulan-Ku. Mian anu sumo aijo' na osanggohi hodi' na kinyonyoanyo ka' tataap tumuu'. Aku, Tumpu Anu matangkas na Kuasanyo notataemo.

¹⁰ Panyo bisuanyo mian aijo' ko anak anu saja' mombuling, mompatei, ka' saja' mombau palabuatan anu ma'idek sangga'at,

¹¹ anu madi' toho' binau nu tuumanyo. Ia mongkaan koloban anu sinombahkonmo itampat-tampat ponsomban to pilo-pilogot. Ia monggoda ka' mompatiduhusimo bengkele' nu mian.

¹² Ia saja' mongakali mian anu kasiasi, mombuling, mongalamo pinonggadei nu mian anu ko samaya' hi ia. Ia mambamo itampat-tampat ponsomban nu mian pilogot anu madi' monsumbu' Tumpu ka' monsombahmo pilogot anu okahegati.

¹³ Ia momposaboli mian panyo mongala bunganyo Pa' mian anu sumo aijo' opotumuu'? Tantu madi'! Kalana ia nombaumo iwi-iwi' na palabuatan anu ma'idek ka' anu okahegati aijo' jadi ia tionyo silaka! Ia silaka kalana posi palabuatannyo ahi'.

¹⁴ Bisuanyo mian anu nanjoo'mo na nombau palabuatan anu ma'idek ko anaknyo, ka' anak aijo' sola'mo nontoa iwi-iwi' na palabuatan nu tuumanyo panyo madi' tinihonyo.

¹⁵ Anak aijo' madi' mongka'oho' monsombah pilogot nu aha Israel, kabai mongkaan koloban anu sinombahkonmo itampat-tampat anu lewa' ponsomban pilogot. Ia madi toho' nonggoda bengkele' nu mian,

¹⁶ kabai sola' mompakisa mian, kabai sola' mombulingi mian maumo pa' ihe. Balang-balang anu bau ponggadei nu mian anu ko samaya' hi ia saja' ahi' nu sule'akon. Mian anu mo'ohopmo nu bee'i mongkaan ka' mian anu madi'mo ko baju'nu bee'i baju'.

¹⁷ Ia madi' toho' mombau palabuatan anu ma'idek kabai monsaboli lantas mompake bunganyo. Ia tulu-tulutan hondo hi atulan-Ku ka' motuluti hondo palentah-ngKu. Anak aijo' madi' mate kalana nu saduakon nu dosa' nu tuumanyo panyo tataap ahi' tumuu'.

¹⁸ Panyo mule' ahi' tuumanyo anu saja' mongakali, mombuling, ka' mombau palabuatan ma'idek sangga'at na mate ahi' kalana iwi-iwi na dosa' anu posi ia ahi' na nombau.

¹⁹ Panyo ugaat ahi' daagi' ko mian anu mompokilawa, kadaka' anak aijo' madi' suele ahi' montanggung hukuman nu dosa' iwi-iwi' anu binaumo nu tuumanyo. Bau pontaami aijo'mo, kalana anak aijo' manonong ka' madi' tageo' na kinyonyoanyo. Ia tulu-tulutan hi atulan-Ku iwi-iwi' ka' nu bau na aijo' ijalannyo anu sahondo-hondonyo, sahingga ia tataap ahi' tumuu'.

²⁰ Mian anu mombau dosa' ia ahi' na silaka. Anak na madi' ahi' tionyo montanggung hukuman anu binaumo nu tuumanyo na kasala'an, ka' suele tuuma madi' ahi montanggung hukuman kalana dosa' iwi-iwi' anu binaumo nu anaknyo. Mian anu manonong na mohumpak ahi' hukuman anu ma'ma' kalana palabuatannyo ma'ima'. Ka' mian anu palabuatannyo ma'idek na monta'up ahi' hukuman kalana palabuatannyo anu ma'i-ma'idek.

²¹ De mian anu ma'idek na kinyonyoanyo madi'mo daagi' mombau dosa' ka' sola'mo montuluti iwi-iwi' na atulan-Ku ka' mombaumo palabuatan anu ma'ima' ka' anumo ahi' sahondo-hondonyo ia na madi' ahi' silaka.

²² Iwi-iwi' na dosa'nyo o'ampunimo; ia na tumuu' ahi', kalana nombaumo anu sahondo-hondonyo.

²³ Te nututugi nu beleyum Aku, Tumpu Anu Matangkas na Kuasanyo sanang de mian anu ma'idek na kinyonyoanyo silakamo? Madi' ahi' sahondo-hondonyo! Ku pai indi ahi' da nu pala'imo na dosa'nyo iwi-iwi' da ia tataap ahi' tumuu'.

²⁴ Panyo de mian anu manonong madi'mo daagi' mombau palabuatan anu ma'ima' ka' mule' mombaumo palabuatan mule' anu ma'idek ka' iwi-iwi' na palabuatannyo okahegati susumo anu saja' obau nu mian anu ma'idek na kinyonyoanyo, te ia tataap mule' tumuu'? Tantu madi'! Palabuatannyo anu toto ima-ima' haha aijo' madi'mo daagi' ko sa'angu' na daagi' o'inau'. Ia silakamo kalana palabuatan dosa' ka' madi'mo nontuluti Aku.

²⁵ Ugaat daagi' ko anu motatae sumo uuka, ‘Hukuman nu Tumpu aijo' madi' totu'u.’ Potombihing mae, o, mian nu Israel! Te madi' mule' totu'u na hukuman anu binee'-Kumo aijo'? Belemiu ahi' na anu madi' totu'u.

²⁶ De mian anu manonong madi'mo daagi' mombau palabuatan anu ma'ima', pakalaus mombau mule' ahi' palabuatan anu ma'idek, ia saidi' mae silakamo, kalana ia nombaumo palabuatan anu ma'idek.

²⁷ Panyo de mian anu ma'idek na kinyonyoanyo madi' daagi' mombau dosa' panyo lewa'mo mombau palabuatan anu sahondo-hondonyo ka' anu ma'ima', saba' nyawanyo salamatmo.

²⁸ Ia nongakuimo kasala'annyo ipalabuatannyo anu ihukuhakonmo lantas madi'mo sola' mombau dosa'. Tiba jalan anu sumo aijo' ia madi'mo silaka, panyo tataapmo tumuu'.

²⁹ Ka' mule' belemiu o, mian nu Israel! Belemiu notatae, koonyo nu belemiu hukuman anu binee'mo nu Tumpu aijo' madi' totu'u. Te madi' mule' totu'u na hukuman anu binee'-Kumo aijo', o, mian nu Israel? Tantu madi'! Belemiu ahi' na anu madi' totu'u!”

³⁰ Tumpu Anu Matangkas na Kuasanyo notataemo, “O, to mia-mian nu Israel, Aku mombee'imo kaputusan hi toto samian sitimbang tiba palabuatannyo. Bolimo daagi' mombau iwi-iwi na dosa' nu beleyum. Boli opojohok na dosa' nu beleyum mohansunimo butong nu beleyum.

³¹ Bolimo daagi' mombau iwi-iwi' na palabuatan ma'idek anu sola'mo binau nu belemiu, ka' sahanyo kinyonyoa tiba pikilan nu beleyum timbalimo ahi bu'ou. Kadaka' belemiu tionyo ahi' silaka?

³² Aku madi' sanang de ko samian anu silaka. Pala'imo na dosa-dosa' nu beleyum da belemiu tataap tumuu'. Aku Tumpu Anu Matangkas na Kuasanyo notataemo.”