YEHEZKIEL 14 - KITAB NU TUMPU ALLA LELE MA'IMAI'

Tumpu mohukumo to mia-mian anu monsombah pilogot

¹ Pa' aha sangkuka na mian to pola-polaya' nu aha bansa Israel tinokamo mae hi belengku nompokilawa pa' mosia na tanga'an nu Tumpu.

² Lantas notataemo na Tumpu hi belengku,

³ “O, manusia anu madi' tumuu' batu, mian haha aiya nompopalesayamo butong nu aha hi pilogot sahingga aha nanabu'mo i dosa'. Te toho' mule' Aku pompokilawan mae nu aha?

⁴ Kalana aijo' poto'i hi aha taalu' Aku, Tumpu Anu Matangkas na Kuasanyo mompotuunmo sumo uuka, ‘Toto samian na aha Israel anu nompopalesayamo butong nu aha hi pilogot ka' nompobee'mo butongnyo nanabu' i dosa' lantas tokamo mae momoita pokinde' hi samian na nabi, Akumo ahi' na montaami nu pontaami anu sabenannyo ahi' kona hi topilo-pilogot nu aha aijo' manjo-manjoo'.

⁵ Iwi-iwi' na pilogot haha aijo' nompojo'onmo mian anu palesayamo hi beleng-Ku da madi'mo ingohani mae hi beleng-Ku, panyo o'amalakon da kalana pontaami aijo' mian anu palesayamo hi belengku po ule'mo mae toka hi beleng-Ku.’

⁶ Poto'i mule' ahi' hi aha mian nu Israel taalu' Aku, Tumpu Anu Matangkas na Kuasanyo mompoto'i hi aha, ‘Balatobatmo bolimo daagi' mombau dosa' nu belemiu ka' mule' pala'imo na pilogot nu belemiu haha atina anu mompobubun mae.’

⁷ Toto samian na aha Israel kabai mian anu isalipu'an mae anu jojoong itina' hi aha bansa Israel anu matijo'onmo madi'mo ohani mae hi belengku ka' mule' mompopalesayamo butong nu aha hi pilogot lantas momoita mule' pokinde' hi samian na nabi, akuje na montaami.

⁸ Akuje na mongewa ia, ka' mompojadimo ia salaku sonto' hi mian sangga'at. Ku sabatakonje na ia da bolimo maninggalum tiba mian da'isan, mian anu palesayamo hi beleng-Ku, sahingga nu sumbu'je nu aha na Aku taalu' Akumo ahi' na Tumpu.

⁹ De samian na nabi ingakalanmo sahingga montaami sala'mo. Akumo ahi' na nongakali. Aku, Tumpu Anu Matangkas na Kuasanyo monsabatakonje ia da bolimo maninggalum tiba aha to mia-mian nu Israel.

¹⁰ Maumo nabi aijo' kabai aha anu momoita pokinde'nyo saidi' mae mohumpakmo hukuman anu pokakana.

¹¹ Iwi-iwi' aijo' Ku baumo da aha mian nu Israel bolimo daagi' matikojo'on madi'mo mae ohani hi belengku, ka bolimo mule' ohumimi'i nu dosa' na butong nu belemiu. Tiba jalan anu sumo aijo' aha timbalimo mian anu palesayamo hi beleng-Ku, ka' Aku timbalimo Tumpu nu aha.” Aku, Tumpu Anu Matangkas na Kuasanyo notataemo.

I Nuh, I Danel tiba I Ayub

¹² Tumpu notataemo mae hi belengku, “O, manusia anu madi' tumuu' batu,

¹³ de sa'angu' na lipu' baladosa'mo ka' madi'mo tulu-tulutan mae hi beleng-Ku, Ku hukumo na lipu' aijo'. Ku hansunimo na palasadia'an nu anu okaan nu aha, ka' mule' mompotokamo mae balaa' kasusa'anmo i anu okaan ka' mule' mompateimo manusia kabai binatang.

¹⁴ Maumo ahi' i Nuh, i Danel tiba i Ayub jojoong itampat aijo' saba' kanonongan nu kinyonyoa nu aha totolu' aijo' ola ahi' timbali momposalamat posi nyawa nu aha. Aku Tumpu Anu Matangkas na Kuasanyo notataemo.

¹⁵ Sahingga Ku potokamo mae na binatang anu toto maha-mahangas da monsa'u mian anu jojoong ilipu' aijo' sahingga daerah aijo' okabuhukmo hondo ka' madi' ko mian anu baani motulu ikiijo'.

¹⁶ Maumo ahi' i Nuh, i Danel tiba i Ayub jojoong ikiijo' panyo atas sanggong-Ku Aku, Tumpu Allah Anu Matangkas na Kuasanyo, aha madi' moko ala momposalamat maumo pa' ihe, sadang posi anak nu aha suele madi'. Ola ahi' posi aha na salamat ka' lipu' aitu na timbalimo ahi' tano' anu mateges.

¹⁷ Sahingga Ku potokamo mae na pahampatean ilipu' aijo' ka' Ku pakatumo mae na toongon anu bau pahampate toto heba-hebat da bau pompatei manusia kabai binatang.

¹⁸ Ka' maumo ahi' aha totototolu'aijo' jojoong ikiijo' panyo atas sanggong-Ku Tumpu Anu tumuu', Tumpu Anu Matangkas na Kuasanyo, aha madi' ahi' moko ala momposalamat maumo pa' ihe, sadang posi anak nu aha suele madi'. Ola ahi' posi aha na salamat.

¹⁹ Sahingga Ku potokamo mae na panyakit anu molele ilipu' aijo', ka' Ku lubatakonmo mae na tambuha'-Ku hi aha, sahingga maumo ahi' binatang kabai manusia osilakaimo.

²⁰ Ka mau ahi' i Nuh, i Danel tiba i Ayub jojoong ikiijo' panyo atas sanggong-Ku, Tumpu anu tumuu', Tumpu Anu Matangkas na Kuasanyo aha madi' ahi' moko ala momposalamat maumo pa' ihe sadang posi anak nu aha suele madi'. Ola ahi' posi aha an salamat kalana kanonongan nu kinyonyoa nu aha.”

²¹ Tumpu Anu Matangkas na Kuasanyo notataemo mae, “Aku mompokonamo mae opa-opat na bau pohukum-Ku anu talalo opalias hondo kona hi aha Yerusalem da baumo pohopu'i manusia kabai binatang. Hukuman aijo', aijo'mo pahampatean, kasusa'anmo i anu okaan, binatang anu mahangas ka'mule' panyakit anu molele.

²² De bisuanyo ko anu moko ala mopalai ka' moko ala momposalamat to ana-anaknyo palahatikan na aha de maluanyo aha tokamo mae hi belemiu. Toa na ko ideknyo na palabuatan nu aha sahingga belemiu mangalti'je taalu' memang madi' ahi' sala' na Aku nohukumo Yerusalem.

²³ Lantas belemiu mangalati'je taalu' iwi-iwi' na anu pinohukum-Kumo aijo' ko sababnyo ahi'. Aku Tumpu Anu Matangkas na Kuasanyo notataemo.”