YEHEZKIEL 12 - KITAB NU TUMPU ALLA LELE MA'IMAI'

I Nabi Yehezkiel nimbalu-balu'mo susumo mian anu mopalaimo

¹ Tumpu po ule' mule notatae mae hi belengku, Ia notatae,

² “O, manusia anu madi' tumuu' batu, beleyum jinojoongmo hi aha mian anu saja' motomuhuk. Aha ko mata, panyo madi' montoa, ko bihing panyo madi' mohongo, kalana aha mongka'ima' i saja' motomuhuk.

^3-6 Kalana aijo' o, manusia anu madi' tumuu' batu. Bau na uuka, panyo obau sinaa potouka na bala-balang nu beleyum ka' obaluni isa'angu' na balunan susumo anu saja' nu bau nu aha anu oboamo ka' opojoongmo ilipu' sangga'at. Ka' ma'isa pe'e pihi pala'imo na laigan nu beleyum panyo boli ahi' matikohowini hi mian susumo ahi' mian anu oboamo itampat pompojoongan. Bolo'i na pimpi' nu laigan nu beleyum panyo nu toa ahi' nu mian anu sasaja' motomuhuk haha aijo', ka' boamo na balunan anu ko isinyo nu balang nu beleyum ka' posabatmo montulu bolo' ai-aijo'. Ka' simbumo na balunan atina ibekoang nu beleyum. Ka' lambamo panyo pihije ahi'; kukubi na mata nu beleyum sahingga madi' nu toa-toa na jalan anu nu tului. Pobakas da iwi-iwi' na bansa Israel montoa iwi-iwi' apaa na anu binaumo nu beleyum, da baumo salaku pokinde' hi aha. Da ihe na monsumbu' ugaat tiba jalan anu sumo aijo' aha mangalati'je taalu' aijo'mo aha na anu saja' motomuhuk.”

⁷ Lantas binaungkumo na palentah nu Tumpu anu binee'-Nyo hi belengku. Tempo'nyo aitu daagi' ahi' sinaa, pinosadiangkumo na to bala-balangku ka' binalunankumo susumo anu saja' nu bau nu aha mian anu mambamo ilipu' sangga'at. Salatan sinaa kahanda'mo malom binolo'ankumo nu limangku na pimpi' mesen nu laiganku lantas aku nosabatmo nontulu bolo' ai-aijo'. Ka' tinoa ahi' nu aha mian iwi-iwi, ka' balunan aijo' sinimbungkumo nu bekoangku lantas aku nambamo.

⁸ Dodododopnyo sina-sinaa Tumpu notataemo mae hi belengku, Ia notatae,

⁹ “O, manusia anu madi' tumuu' batu, bansa Israel aijo'mo na bansa anu saja'motomuhuk nompokilawamo hi beleyum apaa na anu binaumo nu beleyum.

¹⁰ Kalana aijo' poto'i hi aha apaa na anu pinoto'ing-Kumo, Aku Tumpu Anu Matangkas na Kuasanyo. Potuunon-Ku aiya opotoka hi tomundo' anu kiijo' i Yerusalem, ka' mule' hi songko-songko na mian anu jojoong ikota' aijo'.

¹¹ Otalangkanmo ahi' taalu' apaa na anu binaumo nu beleyum atina' salakumo bau tanda apaa na anu jadi saidi' mae hi aha, aijo'mo; aha saidi' mae timbalimo mian anu ohakopmo ka' oboamo pa' moya.

¹² I uno nu pikat tomundo' nu aha monsimbumo balunannyo ibekoannyo lantas mambamo. To mia-mian mombolo'imo pagan mesen da bau posabatannyo. Ia mongkukubimo matanyo sahingga madi'mo montoa-toa jalan anu nu tului.

¹³ Panyo buani'-Ku, Ku buani'akonmo bau pohakop ia. Lantas ku boamo na ia ikota' Babel ka' ikiijo' mae ia silakamo padahan madi' montoa kota' aijo'.

¹⁴ Iwi-iwi' na anu jojoong ilaigan nu tomundo', tibamo to mia-mian anu sola' mombee'i pokinde' i tomundo' ka' mule' anu monjagai itomundo' aijo' Ku ga'a-ga'atakonmo iyaya mae na tampat. Aha Ku loloi'mo ka' Ku pateimo.

¹⁵ De aha Ku ga'a-ga'atakonmo oboa hi aha bansa-bansa sangga'at i iwi-iwi na lipu' nu mian anu isalipu'an atina'je ka' nusumbu' nu aha taalu' Akumo ahi' na Tumpu.

¹⁶ Ola sangkiding na bagian na aha aijo' na Ku posalamat da madi' silaka i uno nu pahampatean, kabai silaka nu ohop, ka' panyakit anu molele, da kiijo' mae hi aha bansa-bansa nu mian anu isalipu'an aijo' aha sinsumbu'je taalu' aha nombaumo anu mahumimi' hondo. Sahingga aha mongakuije taalu' Akumo ahi' na Tumpu.”

Nabi anu langkakatan

¹⁷ Tumpu notataemo mae hi belengku,

¹⁸ “O, manusia anu madi' tumuu' batu, langkakatanmo de beleyum hau-haunyomo mongkaan, ka' langkakatanmo kalana mabuhukmo hau-haunyo beleyum monginumo.

¹⁹ Poto'iakonmo hi iwi-iwi' na bansang apaa na anu pinoto'ing-Kumo, Aku Tumpu Anu Matangkas na Kuasanyo, taloakon hi mian anu jojoong i Yerusalem anu daagi' jinojoong itano' nu aha. Aha saidi' mae langkakatanmo de hau-haunyomo mongkaan ka' mule' langkakatanmo de hau-haunyomo monginum. Tano' nu aha saidi' mae kunmo, kalana iwi-iwi' na mian anu jojoong ikiijo' me saja' molanggai atulan.

²⁰ Kota-kota' anu tempo uuka aiya kaho ko miannyo anu monjojoongi saidi' mae ohansunimo ka' mule' ale' nu aha iwi-iwi' mategesmo. Sahingga nu sumbu'je nu aha taalu' Akumo ahi' na Tumpu.”

Potatae anu oka'ima'i tiba potuunon anu madi' oka'ima'i

²¹ Tumpu notataemo mae hi belengku,

²² “O, manusia anu madi' tumuu' batu, kadaka' aha mian nu Israel mongka'ima'i sola' monsanggo potatae sumo uuka: ‘Tempo' na mobolo-bolos, panyo anu nu poto'i mae nu Tumpu madi' ko anu jadi'’?

²³ Jadi poto'imo hi aha mian nu Israel, taalu' Aku, Tumpu Anu Matangkas na Kuasanyo mombee'imo bau pontaami sumo uuka; Potatae aijo' Ku hapusimo sahingga madi'mo daagi' po ule' otaloakon nu aha Israel. Salaku bau pombolosi poto'i hi aha taalu' tempo'nyo tinokamo ka' apaa na anu pinoto'imo mae nu Tumpu tionyo ahi' jadimo.

²⁴ Hi aha Israel madi'mo daagi' ko anu opotoa, kabai kila-kila'an anu madi' totu'u,

²⁵ Aku Tumpu Anu Matangkas na Kuasanyo motataemo hi bansang Israel, ka' iwi-iwi' na anu Ku taloakon tionyo ahi' jadimo, mad'mo daagi' mongabali'. Potombihing mae o, belemiu mian anu sola' motomuhuk! Tempo'nyo beleyum daagi' tutuu' Ku baumo na iwi-iwi' anu pinoto'ing-Kumo hi beleyum. Aku, Tumpu Anu Matangkas na Kuasanyo notataemo.”

²⁶ Tumpu notataemo mae hi belengku,

²⁷ “O, manusia anu madi' tumuu' batu, aha to mia-mian nu Israel nontaloakonmo, tukoonyo nu aha apaa na anu pinotoamo nu Tumpu ka' anu pinoto'imo nu beleyum aijo' daagi' pin hondo jadije isinaa anu uutuje mae.

²⁸ Mokonyo aijo' poto'i hi aha taalu' Aku Tumpu Anu Matangkas na Kuasanyo nontaloakonmo: Iwi-iwi' na anu tinaloakon-Kumo tionyo ahi jadimo madi'mo daagi' mongabali'. Aku, Tumpu Anu Matangkas na Kuasanyo notataemo!”