YEHEZKIEL 11 - KITAB NU TUMPU ALLA LELE MA'IMAI'

Yerusalem ohukumo

¹ Lantas aku ihangkatmo nu Roh nu Tumpu ka' binoamo isabatan daka' Timur i Laigan nu Tumpu, sabatan anu mo'ahop sasu kabete'an. Ikiijo' tinoangku 25 na mian, galu-galumo ikiijo' ua'aha na polaya' nu bansa aijo'mo i Yaazanya anak i Azur tiba Pelaca anak i Benaya.

² Tumpu notataemo mae hi belengku, “O, manusia anu madi' tumuu' batu, aiyamo na to mia-mian anu ko tanga'anmo mombau anu ma'idek ikota' aiya ka' anu sola' mombee'i pokinde' toto ide-idek ikota' aiya.

^3-4 Kalana aijo' potokakon na potuunon-Ku aha obee'imo hukuman, o, manusia anu madi' tumuu' batu. Kalana aha nontaloakonmo, ‘Madi'mo daagi pin na laigan haha aiya po ule'mo obaunto. Kota'mo aiya na kuhon ka' kitamo na antok nu binatang i unonyo. Kita madi'mo nu poposia nu panas nu apu kalana kiijo' i unonyo nu kuhon.’ ”

⁵ Lapas aijo' Roh nu Tumpu nongkuasaimo mae aku ka' aku pinokaumo nu Tumpu da motatae hi aha mian nu Israel, “O, bansang Israel, Ku sumbu' apaa na anu nu taloakon nu belemiu ka' anu nu tanga'i nu belemiu.

⁶ Talalomo hondo nanjoo' na mian anu pinateanmo nu belemiu sahingga jalan iwi-iwi' i uno nu kota' kahomo bangke' nu manusia.

⁷ Mokonyo aijo' Aku, Tumpu Anu Matangkas na Kuasanyo, mompoto'imo hi beleyum; memang, kota' aiya timbalimo kuhon panyo antok nu binatang misa' ahi' belemiu, bangke' ahi' nu to mia-mian anu pinateanmo nu belemiu! Ka' belemiu na Ku laa'mo ahi' da mosabatmo mompala'i kota'aiya!

⁸ Te belemiu mongkabuhuk bajak! Ku potokamo mae na to mia-mian anu momboa mae bajak da montumbuhimo belemiu.

⁹ Belemiu Ku sabatakonmo mompala'i kota' aiya ka' Ku bee'mo hi mian anu i salipu'an mae. Aku mombee'imo hukuman mate hi belemiu.

¹⁰ Belemiu silakamo i uno nu pahampatean iposi lipu' nu belemiu sahingga nu sumbu'je nu belemiu taalu Akumo ahi' na Tumpu.

¹¹ Jadi, madi' ahi' susumo koonyo nu belemiu, belemiu madi' ko anu mompoposia ikota' aiya, madi' ahi' susumo antok nu binatang i uno nu kuhon. Ku loloi'mo na belemiu ka' Ku hukumo na belemiu maumo pa' iya mae na kajojoongan nu belemiu ilipu' nu Israel.

¹² Sahingga nu sumbu'je nu belemiu taalu' Akumo ahi' na Tumpu, ka'belemiu Ku hukumo kalana nolanggaimo iwi-iwi na atulan-Ku ka' madi'mo nontuluti iwi-iwi' na palentah-ngKu panyo nontulutimo iwi-iwi na atulan nu bansa-bansa anu mompaha ohani belemiu.”

¹³ Hau-haunyo aku montaloakon potatae aijo', monti-montiik ahi' i Pelaca notua'mo ka' sinilakamo. Sahingga aku mule' tinolodadupumo nonsombah ka' notatae daka-daka', “Ibeh Tumpu Anu Matangkas na Kuasanyo! Pa' iwi-iwi' na Israel anu tinon tuha' aiya nu pateimo nu Belento?”

Palajanjian nu Tumpu hi to mia-mian anu binoamo ka' pinojoong itano' nu mian

¹⁴ Tumpu notatae mule' mae hi belengku,

¹⁵ “O, manusia anu madi' tumuu' batu, beleyum tiba to sanga-sangalu nu beleyum anu kiijo' mae pinomboan ka' pinompojoongan aha binisalakonmo nu aha mian jojoong i Yerusalem. Koonyo nu aha, ‘To mia-mian anu binoamo ka' pinojoongmo kiijo' mae najo'onmo hondo i Yerusalem, madi'mo daagi' moko ala monsombah Tumpu. Tano' nu Israel binee'mo nu Tumpu hi kita.’

¹⁶ Mokonyo aijo' poto'iakon na potuunon-Ku aiya hi to sanga-sangalu nu belemiu anu binoamo ka' pinojoongmo kiijo' mae, koonyo nu potuunon-Ku, Akumo na nomboa aha jo'o-jo'on hi aha bansa-bansa ka' nombagi-bagimo aha iwi-iwi na lipu' anu kiijo' mae. Panyo hau-haunyo kiijo' mae na aha Aku saja' ahi' montoa aha.

¹⁷ Aku, Tumpu Anu Matangkas na Kuasanyo mompoto'imo taalu' Aku momposihukmo aha anu kiijo' mae nobagi-bagimo itampat nu aha lantas po ule'mo monsule'akon tano' nu Israel hi aha.

¹⁸ De aha minsusule'mo mae, iwi-iwi' na pilogot anu mahumimi' ka' okahegati tionyo ahi' nu alin nu aha na anu ingalamo nu aha.

¹⁹ Aha Ku bee'ije kinyonyoa anu sangalasan ka' mule' pikilan anu sangalasan, madi'mo pokakana sumo anu ihikuhakonmo. Kinyonyoa nu aha anu nokuutmo susumo batu Ku alamo ka' Ku bolosimo nu kinyonyoa anu tulu-tulutan hi beleng-Ku.

²⁰ Sahingga aha montulutimo iwi-iwi na atulan-Ku ka' mule' tulu-tulutanmo ipalentang-Ku iwi-iwi'. Aha timbalimo mian anu palesayamo hi beleng-Ku ka' mule' Aku timbalimo Tumpu nu aha.

²¹ Panyo aha to mia-mian anu saja' mongka'ima'i monsombah pilogot anu mahumimi' ka' okahegati Ku hukumo kalana kalakuan nu aha anu ma'idek aijo'.” Sumo uuka na potatae nu Tumpu Anu Matangkas na Kuasanyo.

Tumpu nompala'imo Yerusalem

²² Malaekat haha aijo' ilumahapmo ka' bola nu loda haha aijo' suele ahi' nombatukimo. Jingka anu majingka hondo salaku tanda Tumpu nu aha Israel tinokamo, aita' mae ibuan nu aha.

²³ Lapas aijo' jingka anu majingka hondo aijo' nompala'imo Yerusalem ka' nolalinmo aita' ibungkutnyo isasu kabete'an nu kota' aijo'.

²⁴ Hau-haunyo nontoa aijo' Roh nu Tumpu nohangkatmo aku ka' nonsule'akonmo aku namba hi aha mian anu binoamo ka' pinojoongmo kiijo' mae i Babel. Lapas aijo' anu tinoangku aijo' madi'mo ko anu tinoangku.

²⁵ Lantas sinisikkumo hi aha mian anu binoa ka' pinojoongmo kiijo' mae iwi-iwi' na anu pinotoa'mo nu Tumpu hi belengku.