YAKOBUS 4 - KITAB NU TUMPU ALLA LELE MA'IMAI'

Mosangalu tiba dunia

¹ Lengkat mae iya na pinolengkatan nu iwi-iwi na pahantuda'an ka' painggagan itina' hi komiu? Te misa' aijo' nolengkat mae i pongka'oho' miu anu saja' mahampate i uno nu butong miu da bau pohumpakan kasanangan nu dunia!

² Komiu mongkamilui, panyo madi' mohumpak, sahingga komiu mongka'oho'mo mompatei! Komiu bala usaha hondo-hondo panyo madi' mohumpak apaa na anu olio miu, sahingga komiu painggaga ka' mahantuda'. Komiu madi' mohumpak apa-apaa, kalana komiu madi' momoita hi Tumpu.

³ Ka' mau mule' komiu nomoitamo, komiu madi' ahi' mohumpak, kalana anu okahanda'i miu opoita sala'; apaa na anu opoita miu atina' ola bau kasanangan nu posi butong.

⁴ Komiu atina' mian anu madi' mohongo-hongo! Madi' osumbu' miu, de komiu mosangalumo tiba dunia, makia' komiu timbalimo sampo bali' nu Tumpu?

⁵ Boli monsangka Kitab nu Tumpu notatae madi' ko sababnyo, “I uno nu butongto Tumpu nompojoongmo roh anu madi' opoko gagakon na pongka'oho'nyo.”

⁶ Mau mule' sumo aijo', balakat nu Tumpu anu binee'nyomo hi kita lebe daka' molingkudui pongka'oho' nu rohto aijo'. Mokonyo aijo' i uno nu Kitab nu Tumpu tinulis mule', “Tumpu mompisala'i anu ko bubuun, panyo mule' Ia mongkalibosi mian anu kinyonyoanyo mati aluk.”

⁷ Mokonyo aijo' pati'aluk hi Tumpu ka' ewa na Ibilis, sahingga Ibilis mopadeka' mompala'i komiu.

⁸ O'ohani na Tumpu, da Tumpu suele mongohanije komiu. Obaso'i na lima miu, komiu anu baladosa'! Ka' opolino na kinyonyoa miu, komiu anu mopanga' na kinyonyoa!

⁹ Tionyo ahi' komiu totu-totu'u na mompele-pele' ka' humaang, ka' montando'i; tionyo ahi' kojoo miu timbali haang ka' lame' miu timbali kasusa'an!

¹⁰ Tionyo ahi' komiu mompati'alukakon butong hi ahop nu Tumpu, sahingga nu hangkatje nu Tumpu na komiu.

Pokinde' da boli mongalu mian

¹¹ To Utu-utus, boli mompaha alu-alu kabai mompaha pisa-pisala'i. Mian anu mongalu kabai mompisala'i utusnyo anu bubu' Kristen, ia mongalu kabai mompisala'i atulan nu Tumpu. Ka' de komiu mompisala'i atulan nu Tumpu, aijo' alati'nyo komiu madi' mombatuki atulan haha aijo', panyo mongatunmo atulannyo.

¹² Padahan ola sa'angu' na anu ko hak mombee'i atulan hi mian ka' momputusi mian. Aijo'mo Tumpu anu ko kuasa momposalamat ka' monsilakai. Jadi, ihe na komiu, sahingga komiu mongka'oho'mo mompisala'i sangko mian.

Pokinde' da boli buulon

¹³ To Utu-utus anu motatae, “Sinaa aiya kabai dodop kami molengkatmo mamba i kota sa'angu' ka' jojoongmo kiijo' mae sataun na kopinnyo da badagang ka' molio doi,” – potombihing mae na pokinde'ku aiya.

¹⁴ Apaa na anu timbali i kantumuu'an nu belemiu dodop, posi komiu pe'e madi' monsumbu'! Komiu ola sumo tibuk ola sasaingoni' na kantoan, lapas mae lanyapmo.

¹⁵ Sabenannyo ahi' komiu motatae sumo uuka, “De nupobee' nu Tumpu na kami tumuu', ka' mombau aiya kabai aijo'.”

¹⁶ Panyo uuka aiya komiu ko tige-tige ka' buulon. Iwi-iwi' anu okabubuulakon sumo aijo' sala'.

¹⁷ Kalana aijo', mian anu monsumbu' apaa na anu ma'ima', anu tionyo obau panyo madi' obau, aijo' baladosa'.