YAKOBUS 3 - KITAB NU TUMPU ALLA LELE MA'IMAI'

Jila' nu mian

¹ To Utu-utus! Boli manjoo' na anu mongka'oho' timbali gulu' atina' hi komiu. Osumbu' miu saba' kita anu timbalimo gulu' de oputusimo lebe o pekangi molingkudui mian sangga'at.

² Kita iwi-iwi' toto minsan mombau kasala'an. Panyo mian anu madi' toho' mombau kasala'an de ia motatae, ia mian anu ma'ima', anu moko ala mongkuasai iwi-iwi na butongnyo.

³ De kita mompokona tambang i nganga' nu ajahan da ia montuluti pongka'oho'to, saba' kita timbali mongkamudi songko-songko na butong nu ajahan aijo'.

⁴ Ka' mule' kapan na bau sonto'. Mau mule' kapan atina' sala' sa'angu' na han anu daka' ka' nuboa nu baleba' anu makansang, panyo ia o atun nu kamudi anu ise' hondo mombatuki pongka'oho' nu topo kamudi.

⁵ Sumo aitu mule' na jila'to; mau mule' jila' aijo' ise', panyo ia timbali mombau butong buulon mongkona hahan anu toto daka-daka'. Sobatutugi na alas palias na kodaka'nyo timbali mopapu nu apu anu ise' hondo!

⁶ Jila' pokakanamo sumo apu. I butongto, ia timbali polengkatan nu ka'idekan anu mompolele ka'idekan i songko-songko na butongto. Sumo aitumo na apu anu molengkat mae i nalaka, ia montoyo'i songko-songko na kantumuu'anto.

⁷ Iwi-iwi' na ngahan nu binatang pangahas, tomonsi', binatang jumolo, tiba ikan timbali oponyaam, ka' pinonyamo ahi' nu mian.

⁸ Panyo jila' nu mian samian pe'e madi' moko ala momponyam. Jila' aijo' ma'idek ka' madi' opoko kuasaimo; buke' nu tua' anu mompatei.

⁹ Kita mompake ia da bau pontaloakon talima kase hi Tumpu ka' Tuumanto, panyo mule' bau pongkutuki sangko mian, anu pinotimbalimo sumo butong nu Tumpu.

¹⁰ Lengkat i nganga' anu sa'a-sa'angu'nyomo aijo' mosabat mae na potatae talima kase ka' mule' potatae mongkutuki. Sabenannyo madi' sumo aitu!

¹¹ Te daagi' ko mata nu uee anu molubatakon mae uee matawas ka' uee anu mapakat lengkat mae i matanyo anu sa'a-sa'angu'nyomo?

¹² Kau' ara, to Utu-utusku, madi' toho' mimbua' bua' nu zaitun, ka' kau' anggur madi' toho' mimbua' bua' nu ara. Mata nu uee mintimuson madi' toho' ahi' monsabatakon uee matawas.

Kapandean anu molengkat mae i kiita'

¹³ De itina' hi komiu daagi' ko mian anu pande ka' manonong, tionyo ahi' anu ma'ima' aijo' nu potoa i uno nu kantumuu'annyo, ka' mombau ahi' hahan anu ma'ima', anu ososapi'i nu kinyonyoa madi' ko bubuun ka' pande.

¹⁴ Panyo de komiu minsihip, mongka'ideki sangga'at, ka' mompentingkan posi butong, boli mombuulakon kapandean aijo', kalana tiba jalan anu sumo aijo' komiu monggeo-geo'akonmo lele anu nolengkat mae hi Tumpu.

¹⁵ Kapandean anu sumo aijo' madi' nolengkat mae i suluga'. Ia nolengkat mae i dunia, nolengkat mae i napisu nu mian, ka' lengkat mae i setan!

¹⁶ Iya na daagi' ko anu minsihip ka' tabiat mompentingkan posi butong, i kiijo' suele daagi' ko kahengge'an, ka' iwi-iwi na ngahan nu palabuatan anu ma'idek.

¹⁷ Panyo mian anu daagi' ko kapandean anu nolengkat mae kiita' i bawo, ia na anu momona hondo lomas, lapas mule' mongka'ima'i dame, ma'ima' na kinyonyoa hi sangko mian, mohongo-hongo. Ia saja' mongkalibosi ka' kalakuannyo saja' ma'ima'. Ia madi' montinjohi sangga'at ka' madi' mimpula-pula.

¹⁸ Memang ka'ima'an atina' bua' nu bine' nu dame anu sinau nu mian anu mongka'ima'i dame!