YAKOBUS 2 - KITAB NU TUMPU ALLA LELE MA'IMAI'

Pokinde' kona i anu lewa' mongihohopi

¹ To Utu-utusku! Salaku mian anu pinalesayamo hi Tumpu Yesus Kristus, Tumpu Anu Talasanggo hondo, boli ola komiu montoa ohup nu mian kalana hahan anu i dunia.

² Kalana de daagi' ko samian anu kaya, anu mompusok sinsing mosoni' ka' baju'nyo ma'ima' toka i kasintomuan, lantas toka suele na samian anu kasiasi, anu nibaju' mae mogea-geat,

³ saba' komiu lebe mongadati mian anu nipake mae ma'ima' aijo'. Komiu motatae hi ia, “Aiyamae na suhangan Tuan, i kadela anu ma'ima' hondo aiya.” Panyo hi mian anu kasiasi komiu motatae, “Tinjo aijo' mae,” kabai “Suhangmo i salo aiya.”

⁴ Desumo aijo' na mombau, komiu madi'mo mompokakanakon samian ka' samian, ka' montoa mian ko pikilan anu madi' ma'ima'.

⁵ O inau', to Utu-utus anu okanonongi! Mian anu kasiasi i dunia aiya, pinile'anmo nu Tumpu da timbali mian anu kaya i uno nu iman. Mian haha aijo' pinosoopmo da timbalimo mian anu palesayamo hi Tumpu, sumo anu jinanji'mo nu Tumpu hi mian anu mongkalibosi Ia.

⁶ Panyo komiu ola mule' mompopo'ambang mian anu kasiasi, padahan to mia-mianmo anu kaya na mongkabisa'i komiu ka' momboa komiu hi mian kopian!

⁷ Ahamo na anu nompopo'ambang sanggo anu o adati, anu tinalimamo miu hi Tumpu!

⁸ Komiu nombaumo anu totu'u, de komiu nontulutimo atulan nu Kalaja'an anu tuli-tulis i uno nu ayat nu Kitab nu Tumpu aiya, “Okalibosi na sangko mian, sumo komiu mongkalibosi posi butong miu.”

⁹ Panyo de komiu madi' mompokakanakon mian, ka' ola mule' mombatuki adat nu dunia, komiu nombaumo dosa' ka' atulan nu Tumpu Allah momponyata'mo saba' komiu atina' nolanggaimo atulan.

¹⁰ Mian anu nolanggaimo sala'sa'angu' na to atu-atulan nu Tumpu, sumo-sumomo nolanggaimo iwi-iwi'.

¹¹ Kalana anu nonontaloakon, “Boli masala',” ia-iamo ahi' suele na notatae, “Boli mompatei.” Jadi, de komiu madi' masala', panyo mompatei, makia' komiu suele nolanggaimo ahi' atulan.

¹² Potatae ka' pombaumo anu obau, sumo mian anu oputusimo nu atulan nu Tumpu anu nompobebasmo mian.

¹³ Kalana Tumpu madi' mompotoa kalibosan-Nyo hi mian anu madi' monsumbu' kalibosan. Panyo kalibosan lebe mahoson molingkudui hukuman!

Iman ka' palabuatan

¹⁴ To Utu-utus! Apaa na gunanyo mian motatae, “Aku mian anu pinalesayamo,” padahan ia madi' momponyata' i uno nu kantumuu'annyo? Timbali na iman anu sumo aijo' momposalamat?

¹⁵ Bisuannyo komiu mo'ane kabai boune mompalalui baju' ka' madi' ko kaanon sukup sansina-sinaa.

¹⁶ Apaa na gunanyo komiu motatae hi ia, “Higahi na mompusok baju' anu mamut ka' higahi na mongkaan!” – de komiu madi' mombee'i ia kapalaluan bau pontumuu'nyo?

¹⁷ Sumo aitumo suele na iman, de madi' oponyata' i han anu obau, saba' iman aijo' madi' ko gunanyo.

¹⁸ Ugaat daagi' ko anu motatae, “Daagi' ko mian anu montaha'imani imannyo, ka' daagi' mule' ko anu montaha'imani bukuti' nu anu obau.” Ku taamije, “Potiju'akon mae hi belengku mosia na mian mohumpak iman padahan madi' ko bukuti'nyo i han anu obau, ka' ku potoaje na bukuti'nyo nu anu binaumo da bau pomponyata' saba' aku ko iman.”

¹⁹ Te madi' opalesaya miu Tumpu ola sa'angu'? Jadi to roh-roh ma'idek suele palesaya ka' nulakat nu kabuhukan na aha!

²⁰ Komiu ponga' hondo! Pa' palalu opobukuti' hi komiu na iman anu madi' ko gunanyo, aijo'mo iman anu madi' kopalabuan.

²¹ Toamo na i Abraham mompolee'to. Ia pinototu'u nu Tumpu kalana han anu binaunyomo tempo'nyo ia nonsombahkon i Ishak anaknyo, hi Tumpu i mezbah.

²² Aiya nanasamo taalu' iman tionyo ahi' oponyata' i han anu obau da timbali sukup ka' ma'ima'.

²³ Aijo' sosok tiba ayat nu Kitab nu Tumpu aiya, “I Abraham palesaya hi Tumpu, ka' kalana imannyo aijo', Tumpu Allah nontalima ia salaku mian anu montuluti pongka'oho' nu Tumpu Allah.” Mokonyo aijo' i Abraham osanggohi, “Bella' nu Tumpu Allah.”

²⁴ Nanasamo uuka aiya, saba' mian nu pototu'u nu Tumpu, kalana apaa na anu binaumo nu mian aijo', ka' misa' ola kalana imannyo.

²⁵ Toa suele na i Rahab, boune anu lewa' masala' aijo'. Ia pinototu'umo nu Tumpu kalana apaa na anu binaunyomo tempo'nyo ia nomposoop i uno nu laigannyo anu namba nondoyoni bansa Israel ka' nontulungimo aha nopalai nontului jalan sangga'at.

²⁶ Yo, susumo butong madi'mo ko rohnyo atina' butong anu i sinilakamo, sumo aitumo suele na iman de madi' ko bukuti'nyo i han anu ma'ima', atina' iman anu sinilakamo.