TO MIA-MIAN KOPIAN 3 - KITAB NU TUMPU ALLA LELE MA'IMAI'

Bansa-bansa anu tataap jojoong i lipu' Kana'an

¹ Bau ponguji' aha mian nu Israel anu madi' toho' nongoa'i pahampatean i Kana'an, Tumpu nompojohokmo tinopia-piangkuka na bansa jinojoong i lipu' aijo'.

² Tumpu nombau sumo aijo' ko kahanda' da mongajan aha mian anu i salapisan na bansa Israel mosia na mahampate, aijo'mo aha anu madi' toho' namba nahampate.

³ Aha bansa-bansa anu daagi' jinojoong i lipu' aijo', aijo'mo: bansa anu jojoong i olima' na kota Anu aha mian Filistin, iwi-iwi' na bansa Kana'an, bansa Sidon tiba bansa Hewi anu jojoong i bungkutnyo nu Libanon, lengkat pe'e mae i Bungkutnyo nu Baal-Hermon toka-toka i jalan anu mamba i Hamat.

⁴ Aha jojoong kiijo' mae da timbali batu bau ponguji' bansa Israel. Tiba jalan anu sumo aijo' timbalimo osumbu' pa' bansa Israel mombatuki iwi-iwi' palentah anu binee'mo nu Tumpu hi mompolee' nu aha susumo anu pinoto'imo i Musa.

⁵ Mokonyo aijo' aha mian nu Kana'an, Het, Amori, Feris, Hewi tiba Yebus tataap jojoong i lipu' aijo' hingga-hinggat tiba mian nu Israel.

⁶ Aha mian nu Israel nompaha oso-osoaimo bansa haha aijo' ka' suele nonsombahmo to pilo-pilogot nu aha.

I Otniel

⁷ Aha mian nu Israel binaladosa'mo hi Tumpu, Tumpu Allah nu aha. Aha nongkolilimimo Ia sahingga aha nonsombahmo to pilo-pilogot nu Baal tiba Asyera.

⁸ Sahingga Tumpu nontambuha'imo aha mian nu Israel, ka' nompojohokmo aha pinatundu' i Tomundo Kusyan-Risyataim anu nolengkat mae i Mesopotamia. Ualu' na taun na kinopinnyo na tomundo aijo' nompalentah aha.

⁹ Lapas aijo' aha mian nu Israel nomoitamo tulung hi Tumpu, lantas Tumpu nombee'mo i Otniel da mompobebasmo aha, (i Otniel anak i Kenas, utus ise' i Kaleb).

¹⁰ Roh nu Tumpu nongkuasaimo i Otniel sahingga ia tinimbalimo polaya' nu aha mian Israel. Ia nambamo nahampate, lantas binee'anmo nu Tumpu ka'untungan nahampate nongewa tomundo nu aha Mesopotamia.

¹¹ Sahingga na'ima'mo na lipu' aijo' madi'mo ko anu nompoposia pinatompulu' na taun na kinopinnyo. Lapas aijo' sinilakamo na i Otniel.

I Ehud

¹² Aha mian nu Israel po'ule' mule' binaladosa' hi Tumpu, sahingga pinohosonmo nu Tumpu na i Eglon tomundo nu aha Moab, nolingkuduimo Israel.

¹³ I Tomundo Eglon nosa'angu'mo tiba bansa Amon ka' Amalek, lantas nompatundu'mo aha mian nu Israel, ka' nompatundu'mo Yerikho, kota kurma aijo'.

¹⁴ Sampulu' ka' ualu' na taun na kinopinnyo aha mian nu Israel pinalentah i Eglon.

¹⁵ Panyo salatan aha mian nu Israel nomoitamo tulung hi Tumpu Ia nombee'mo i Ehud da mompobebas aha. I Ehud mian anu kewe'; ia anak i Gera tulunan mae nu bansa Benyamin, ka' iamo na saja' momboa hi Tomundo Eglon hasin anu tionyo ahi' o bayan nu mian Israel.

¹⁶ Daagi' kino sansinaan i Ehud nombaumo sa'angu' na bajak poti-potimbiha' ko matanyo ohani mintonga' na meten na komantannyo. Tinakosnyo na bajak aijo' i sasu koanannyo i uno nu baju'nyo,

¹⁷ lantas nambamo nombee' hasin anu nu aha mian Israel hi Tomundo Eglon. Tomundo aijo' molompo' hondo.

¹⁸ Salatan binee'nyomo na hasin aijo' i Ehud nonsaimo mian haha aijo' anu nongkolon mae doi mosoni' aijo' da minsusule'mo.

^19-20 Panyo i Ehud daagi' tinuminjo salatan tinokamo i batu anu pinaha botik koko Gilgal, lantas ninsusule'mo hi Eglon. Tempo'nyo aitu i Eglon kiijo' i uno nu salipi' anu ma'ima'an hondo aita' mae i bangkala'nyo. I Ehud notataemo hi Eglon, “Kita Tomundo Anu Opopodaka'! Posaihonto aiya momboa mae lele anu opohowini toka hi belento tuanku.” Sahingga i tomundo notatae, “Tanda'i pe'e,” lantas pinalentahnyomo na posaihonnyo iwi-iwi' da mosabat pe'e mompala'i ia ka' ola i Ehud sausa'nyo. Lapas aijo', i Ehud nongohanimo i tomundo anu hau-haunyo suha-suhang, lantas notataemo, “Daagi' ko lele lengkat mae hi Tumpu Allah toka hi belento tuanku!” Nohongo aijo', i tomundo tinuminjomo.

^21-22 Balomo i Ehud nongkeat bajaknyo nu limanyo kewe' anu i lampeokannyo koanan, lantas tinobok nyomo na kompong i tomundo. Pinupus na mata nu bajak aijo' ninsoop tinoka-toka i pulunyo nokiijo' i lompo' nu kompongnyo i tomundo aijo' lau-laus i lampasan i hikunyo Pinojohokmo i Ehud na bajaknyo aijo' ikiijo'.

²³ Lantas nosabatmo ka' tinumbannyomo ka' mule' ginunsingnyomo na tumban nu salipi' aijo'.

²⁴ Lapas aijo' nambamo. Salatan to posa-posaihon i tomundo tinokamo mae nontoamo sabatan nu salipi' haha aijo' ginunsingmo, koonyo nu aha ugaat i tomundo kiijo' i unonyo hau-haunyo mingkuhat.

²⁵ Salatan pininmo na nontanda'i ka' mule' i tomundo madi' ahi' nontuhea'akon sabatan, aha biningungmo lantas nongalamo gunsing ka' nontuheakon tumban aijo'. Tolopian taalu' tomundo nu aha aijo'mo timpa-timpas i salo sinilakamo.

²⁶ Hau-haunyo aha daagi' nontoa, i Ehud nalaimo namba i Seira notulu i batu haha aijo' anu ko botiknyo.

²⁷ Lia-lia' salatan tinokamo i bungkutnyo nu Efraim, ia nompuhimo tolompet bau polaga mian nu Israel da mambamo mahampate. Aha tinokamo lantas i laya'nyomo na aha nokaiyong lengkat mae i da'erah nu bungkutnyo aijo':

²⁸ “Batuki mae na aku”, na koonyo hi aha, “Tumpu nompatundu'mo aha mian nu Moab, sampobali' miu aijo' da bolimo mongewa belemiu.” Jadi i Ehud na nolaya', sahingga mian nu Israel haha aijo' nintatau'mo lengkat mae i bungkutnyo. Aha nompatundu'mo ka' nongalamo tampat potaapan nu mian Moab i Kaunyo nu Yordan. Mau pe'e samian na sampobali' haha aijo' madi' pinobee' motaap ka' pinotumuu'.

²⁹ I pahampatean aijo' aha nompateimo ohani 10.000 na suludadu nu Moab anu pande na mahampate; madi' ko anu tinumuu'.

³⁰ Sinaa aijo' Moab no hungku i mo i Israel, sahingga na'ima'mo ka' madi'mo ko anu nompoposia lipu' aijo' inguampulu' na taun na kinopinnyo.

I Samgar

³¹ Polaya' anu suele aiya mule', aijo'mo i Sangar anak i Anat. Ia suele nontinjohakonmo ka' nompobebasmo mian nu Israel. Tiba tokonnyo anu bau pola'i sapi' de olaya'mo, aijo'mo na bau pinompateinyo 600 na aha mian nu Filistin.