TO MIA-MIAN KOPIAN 2 - KITAB NU TUMPU ALLA LELE MA'IMAI'

Malaekat nu Tumpu kiijo' i Bokhim

¹ Malaekat nu Tumpu namba lengkat mae i Gilgal nokiijo' i Bokhim ka' notatae hi aha mian nu Israel, “Aku nonsabatakonmo belemiu lengkat mae i Mesir, ka' nomboamo mae belemiu i lipu' anu jinanji'-Kumo hi mompolee' nu belemiu. Ka' pinoto'ing-Kumo, 'Anu jinanji'-Kumo hi belemiu madi'mo Ku lapasakon.

² Kalana aijo' boli belemiu mobela' tiba tumpu nu lipu' i aiya. Mezbah nu aha haha aijo' tionyo ahi' o idei nu belemiu.' Panyo belemiu madi' nombau apaa na anu pinalentahkon-Kumo aijo'. Ola mule' ahi' belemiu nombaumo anu madi' pinalentahkon!

³ Jadi, uuka aiya potombihing! Aku madi' molaa' to mia-mian nu lipu' aiya de belemiu mahampate tiba aha. Aha timbalimo sampobali' nu belemiu, ka' belemiu mohongo-hongomo apaa na anu nupoto'i nu aha, sahingga belemiu monsombahmo suele to pilo-pilogot nu aha.”

⁴ Salatan malaekat aijo' noko poto'imo lele aijo', iwi-iwi' na bansa Israel nolotando'mo na i humang.

⁵ Mokonyo aitu tampat aijo' sinanggohanmo Bokhim. Lantas i tampat aijo' aha mian nu Israel nonsombahkonmo koloban hi Tumpu.

I Yosua sinilakamo

⁶ Nokolapas na i Yosua nompolamba mian nu Israel haha aijo', aha nambamo nonjojoongi tano' anu tinimbalimo bagi nu aha toto samian.

⁷ Tempo'nyo i Yosua daagi' tutuu' mian nu Israel palesaya ka' mohongo-hongo Tumpu. Maumo i Yosua sinilakamo aha tataap ahi' palesaya ka' mohongo-hongo Tumpu tempo'nyo aha daagi' pinalentah nu to mia-mian anu daagi' nontoa iwi-iwi' na anu okabangangi binau nu Tumpu hi aha mian nu Israel.

⁸ I Yosua anak i Nun-posaihon nu Tumpu aijo' – sinilakamo tempo'nyo aitu umunnyo sa'atumo ka' sampulu' na taun.

⁹ Ia i lambuno i posi tano'nyo, aijo'mo i Timnat – Serah i da'erah nu bungkutnyo Efraim sasu utara Bungkutnyo nu Gaas.

¹⁰ Lapas aijo' iwi-iwi' na aha salapisan aijo' sinilakamo ahi'. Ka' aha anu i salapisannyo mule' mae madi'mo monsumbu' Tumpu. Kalana aha madi'mo nontoa ka' nongoa'i apaa na anu binaumo nu Tumpu hi bansa Israel.

Israel madi'mo nonsombah Tumpu

^11-14 Lapas aijo' aha mian nu Israel binaladosa'mo hi Tumpu. Aha madi'mo nonsombah Tumpu, Tumpu Allah nu mompolee' nu aha, aijo'mo Tumpu Allah anu nomboamo mae aha nosabat lengkat i Mesir. Aha nontampu'uni nonsombah Baal ka' Asytoret ka' to pilo-pilogot sangga'at anu nusombah nu to bansa-bansa anu montikubi aha. Sahingga tinambuha'anmo nu Tumpu na aha ka' nompojohokmo sampobali' nu aha nontumbuhi ka' nompahuhuimo aha. Aha madi'mo noko ala nongahopi sampobali' nu aha anu aitu mae nontikubi aha.

¹⁵ De aha mambamo mahampate Tumpumo na mongewa aha, susumo anu pinoto'i-Nyomo hi aha. Sahingga aha nongoa'imo kasusa'an anu daka' hondo.

¹⁶ Saja'mo Tumpu nombee'i aha to pola-polaya' anu mongka'oho' molapasakon aha da sampobali' nu aha bolimo mompahuhuakon.

¹⁷ Panyo aha madi' montapali polaya' haha aijo'. Aha nonsombahmo to pilo-pilogot sangga'at, ka' madi'mo nohongo-hongo Tumpu. Aha madi'mo nontuluti sonto' nu mompolee' nu aha anu tulu-tulutan hi palentah nu Tumpu iwi-iwi'.

¹⁸ De Tumpu mombee'imo samian na polaya' hi bansa Israel, Tumpu saja' montulungi polaya' aijo'. Ka' de polaya' aijo' daagi' tutuu' Tumpu saja' montoa aha da boli opoposia nu sampobali' nu aha. Ia molibos hi aha de ia mohongo aha susa'mo kalana osansalamo ka' sakisamo.

¹⁹ Panyo de polaya' aijo' silakamo, bansa aijo' mompaka baumo anu ma'idek ka' lebemo molingkudui aha anu ilapisannyo mae momona. Aha pinalesayamo ka' nohongo-hongomo to pilo-pilogot sangga'at ka' nonsombahmo pilogot haha aijo'. Aha nompinsusule'imo kabiasa'an anu toto ide-idek anu saja' nubau nu aha ka' madi'mo mongka'oho' mombabali'i sipat nu aha.

²⁰ Kalana aijo' Tumpu nontambuha'imo hondo mian nu Israel, ka' notatae, “Aku nompalentahmo mompolee' nu bansa aiya da montoongi palajanjian-Ku hi aha. Panyo bansa aijo' nongkakabasakonmo palajanjian aijo'; aha nolanggaimo palentah-ngKu.

²¹ Uuka aiya Aku madi'mo mongka'oho' molaa', maumo pa' bansa apaa anu daagi' i lipu' aiya de i Yosua silakamo.

²² Ku potimbalimo na bansa haha aijo' da monguji' bansa Israel, da Ku sumbu' pa' aha mian nu Israel mongka'oho' mombatuki iwi-iwi' na anu Ku palentahkon susumo mompolee' nu aha kabai madi'.”

²³ Mokonyo aijo' Tumpu madi' nombee'i ka'untungan nahampate hi Yosua nongewa bansa haha aijo'. Panyo ola ahi' Tumpu nompojohokmo aha jinojoong i lipu' aijo', ka' madi'mo sampa nolaa' aha.