TO MIA-MIAN KOPIAN 18 - KITAB NU TUMPU ALLA LELE MA'IMAI'

I Mikha tiba tulunan nu bansa Dan

¹ Tempo'nyo aijo' Israel, madi' ko tomundo'nyo. Tulunan nu bansa Dan daagi' saja' molio da'erah da timbali da'erah nu aha, kalana aha ma'isa nohumpak tano' tiba to tulu-tulunan nu bansa sangga'at anu hi aha bansa Israel.

² Kalana aijo' aha nompile'imo olima' na mian anu baani hi aha mian anu hi tulunan nu bansa Dan anu jojoong i Zora tiba Asytoal, lantas nombee'imo kalaja hi aha olima' na mian aijo' da monselidiki lipu' aijo'. Sahingga nambamo na mian haha aijo', ka' tinokamo i da'erah nu bungkutnyo i da'erah nu aha Efraim. Ikiijo' aha sinonso'mo hi laigan i Mikha.

³ Salatan kahanda'mo minsoop i laigan aijo' aha nohongomo olitau nu aha Lewi aijo' notatae, ka' nusumbu' nu aha na potatae aijo'. Jadi, aha nongohanimo ia ka' nompokilawa, “Kadaka' beleyum tinokamo i aiya? Apaa na anu nu bau? Ihe na nomboa mae beleyum?”

⁴ Olitau aijo' nontaami, “Aku i aiya kalana i Mikha. Ia na nohangkat aku binau imamnyo ka' nonggaji aku.”

⁵ Lantas aha notataemo hi ia, “Desumo aijo', tulungi pokilawakon hi Tumpu Allah pa' lajang mami aiya ko gunanyo kabai madi'.”

⁶ Tinaaman nu imam aijo', “Boli bata-bata. Tumpu monsitujuimo lajang nu belemiu aiya.

⁷ Lapas aijo' nambamo na aha olima' aijo' nokiijo' i Lais. Ikiijo' mae aha lewa'mo nompalahatikan miannyo. Lantas sinumbu'mo nu aha na kantumuu'an nu anu jojoong i Lais aijo' sumomo kantumuu'an nu bansa Sidon. Maumo aha madi'mo nogalum ka' najo'onmo lengkat hi bansa Sidon, aha tumuu' madi' ko anu mompoposia, madi' ko anu monsampobali', bilahi, ka' madi' ko kakulangan apa-apaa.”

⁸ Salatan aha olima' na mian haha aijo' ninsusule'mo hi aha mian bubu' mae tulunan nu bansanyo kiijo' i Zora tiba Esitaol, aha pinoitamo da monsisik apaa na anu tinoa mae ka' i hongo nu aha.

^9-10 Lantas aha notataemo, “Imbo' da otumbuhintomo na Lais. Kami nambamo nokiijo', ka' nontoamo tano'nyo ma'ima', ewa ka' kaya, iwi-iwi' daagi'. Boli sabole-bolemo jojoong i aiya ka' madi' ko anu opibau-bau. Sampamo mokiijo' ka' opatundu'mo na lipu' aijo'. Otokaije nu belemiu saba' aha anu jojoong ikiijo' madi' hondo montaha'imani otumbuhimo. Kami palesaya totu-totu'u hi Tumpu Allah mombee'mo lipu' aijo' hi belemiu.”

¹¹ Kalana aijo' nambamo na Zora tiba Esytaol ka' aha 600 na mian tulunan nu bansa Dan. Tiba toongon anu bau pahampate tinoukanmo

¹² aha nambamo nontulu sasu kinsoban Kiryat-Yearim i tano' nu Yehuda lantas binakemahmo ikiijo'. Aijo' na sababnyo tampat aitu daagi' Lewa' osanggohi Binakema'an i Dan.

¹³ Lengkat ikiijo' aha i lumajangmo lau-laus namba i da'erah bungkutnyo nu Efraim lantas tinokamo ilaigan hi Mikha.

¹⁴ Aha olima' na mian anu sinai momona namba mondoyoni notataemo hi to sanga-sangalunyo, “Pa' osumbu' nu belemiu na sala'sa'angu' na laigan aiya ko patongnyo anu i lapisan nu salaka? Ka' mule' to pato-patong sangga'at ka' baju' nu imam. Soba tutugi apaa na tionyo ahi' obaunto.”

¹⁵ Lantas aha nambamo hi laigan i Mikha kajojoongan nu olitau nu aha Lewi aijo' ka' nompokilawa pa' mosia na lele nu aha.

¹⁶ Tempo'nyo aijo' aha ano'atu na suludadu nu aha tulunan nu bansa Dan anu kaho ko toongon bau pahampate aijo', hau-haunyomo tinjo-tinjo i ahop nu sabatan daka'.

¹⁷ Aha olima' na anu nondoyoni aijo' lau-laus ninsoop i uno nu laigan, ka' nongala patong kau' anu i lapisan nu salaka aijo', tiba to pato-patong sangga'at tiba baju' nu imam. Olitau mian nu Lewi aijo' hau-haunyo tinjo-tinjo tiba aha ano'atu na suludadu haha aijo' i sabatan daka'.

¹⁸ Salatan aha olima' na mian aijo' ninsoopmo i laigan hi Mikha ka' nongalamo baju' nu imam tiba to pato-patong nu pilogot haha aijo', olitau nu mian Lewi aijo' nompokilawamo, “Apaa na obau nu belemiu aiya?”

¹⁹ Aha nontaami, “Pomohokot! Boli mompokilawa. Batuki mae na kami, beleyumje na timbali imam ka' anu mompokinde'i kami. Boli ola timbali imam hi sa'angu' na auwan, lebe ma'ima' timbali imam hi sa'angu' na tulunan nu bansa!”

²⁰ Olitau nu aha mian Lewi sinitujumo i pokinde' aijo'. Jadi, ia nongalamo baju' nu imam ka' patong haha aijo' nu pilogot lantas nombatukimo aha.

²¹ Lapas aijo' mian da'isan haha aijo' i lumajangmo lau-laus na aha, to ana-anak namba momona, potuu'on tiba to paka-pakakas nu aha.

²² Salatan aha najo'onmo, i Mikha nolagamo to sanga-sangalunyo anu mompaha ohani na laigan lantas hingga-hinggatmo nololoi' aha mian tulunan nu bansa Dan haha aijo'. Salatan ingohanimo hi aha,

²³ i Mikha tiba to mia-mian sangalunyo haha aijo', lewa'mo nolobo'i aha. Aha mian tulunan nu bansa Dan haha aijo' nonsiloimo ka' nompokilawa hi Mikha, “Apaamo uuka? Kadaka' nanjoo'mo na mian tinoka mae?”

²⁴ Tinaaman i Mikha, “Belemiu nompopalaihakonmo mae to pato-patongku tiba imamnyo, sahingga aku madi'mo daagi' ko apa-apaa, lantas belemiu notatae, 'Apaamo uuka!’ ”

²⁵ Koonyo nu mian haha aijo' tulunan nu bansa Dan, “Sahanyo gintumi na nganga'; da boli mian haha aijo' motambuha' ka' montumbuhimo beleyum. Dumo beleyum ka' iwi-iwi' na to utu-utus nu belemiu silaka.”

²⁶ Noko taloakon sumo aijo', mian haha aijo' tulunan nu bansa Dan nambamo lau-laus na aha. Tinoa i Mikha memang aha na lebe mahoson molingkudui ia, kalana aijo' ia ninsusule'mo.

^27-28 Noko palaihakon i imam tiba to paka-pakakas anu opake monsombah anu pinosi bau i Mikha aijo' aha mian tulunan nu bansa Dan aijo' nambamo nontumbuhi Lais, kota anu kantumuu'an nu miannyo madi' ko anu lewa' mompoposia. (Kota aijo' kiijo' i sa'angu' na bangka'nyo tiba kota Bet-Rehob.) Aha mian nu Dan haha aijo' nompateimo iwi-iwi' na mian anu jojoong i Lais lantas nompapumo kota aijo'. Madi' ko anu tinoka mae nontulungi aha mian nu Lais aijo' kalana tampat nu aha nosi tade majo'on lengkat i Sidon. Lapas aijo' aha mian nu Dan po'ule'mo nombau kota aijo' ka' jinojoongmo ikiijo'.

²⁹ Sanggo nu kota aijo' binolosanmo nu aha tinimbalimo kota Dan, tiniho i sanggo nu mompolee' nu aha, aijo'mo i Dan anak i Yakub.

³⁰ Patong nu pilogot anu binoa mae nu aha aijo' pinotinjomo nu aha i kota aijo' lantas nohangkatmo i Yonatan, anak i Gerson, makumpu i Musa na tinimbali imam nu aha. Tulunan i Gerson aijo' sabole-bolemo binau imam nu aha tulunan nu bansa Dan, sampe aha mian nu Israel binoamo ka' pinojoongmo i lipu' sangga'at.

³¹ Patong pilogot anu pinosi bau i Mikha aijo' tataap kiijo' i Lais, sumo aitu mule' na Kemah nu Tumpu tataap kiijo' i Silo.