TITUS 3 - KITAB NU TUMPU ALLA LELE MA'IMAI'

Kalakuan nu mian Kristen

¹ Opo'ingat na to mia-mian i jama-jama'at nu beleyum da aha tulu-tulutan hi to pola-polaya' ka' anu mongkuasai negara, ka' mule' tulu-tulutan mombau iwi-iwi na han anu ma'ima'.

² Taloakon hi aha da boli mompitana' kabai painggaga mau mule' pa' hi he, panyo mingkalakuan manonong na kinyonyoa. Tionyo ahi' aha saja' tobos hi iwi-iwi' na mian.

³ Kalana naipuan mae kita suele ponga', sala' na jalan, ka' madi' tulu-tulutan. Kita binotuananmo nu ngangahan na napisu tiba anu o ka'ima'i; kita tumuu' ko makisut ma'idek ka' madi' sanang hi sangalu, tiba mule' mompaha ka'i-ka'ideki.

⁴ Panyo Tumpu anu Momposalamat kita nompotoamo kalibosan ka' kanonongan nu kinyonyoa-Nyo hi kita.

⁵ Ia momposalamat kita, misa' kalana kita nombaumo anu ma'ima', panyo kalana Ia ahi' na nongkalibosimo kita. Ia momposalamat kita kalana pakalaja'an nu Roh nu Tumpu, anu nombee'imo kita kantumuu'an bu'ou susumo anu po'ule'mo i hampeakon, ka' kantumuu'an anu bu'ou, aijo'mo kita pinobelesimo.

⁶ Tumpu nombee'imo mae Roh-Nyo hi kita kalana pakalaja'an i Yesus Kristus, Tomundo anu Momposalamat kita,

⁷ da kalana balakat i Yesus, kita mompo'ule'mo ma'ima' tiba Tumpu, ka' kita mohumpakmo kantumuu'an anu ma'ima' sampe toka sidu-sidutu', anu saja' o'ima-imaninto.

⁸ Potatae aiya totu'u ka' kona. Ku kahanda'i da beleyum sabole-bole mompoteteng han haha aiya, da to mia-mian anu palesayamo hi Tumpu totu-totu'u bala usaha da mombau pakalaja'an-pakalaja'an anu ma'ima' ka' mingguna hi mian iwi-iwi'.

⁹ Opimpali'i na painggagan anu madi' ko gunanyo, to sisi-sisik anu pa' iyamae na pinolengkatannyo, mompaha lawa-lawani ka' pahantuda'an mongkona atulan nu agama. Iwi-iwi' aijo' madi' ko gunanyo, ka' madi' ko untungnyo.

¹⁰ Mian anu monsaduakon poga'a-ga'atan i uno nu jama'at, tionyo ahi' nu tewa' minsan kabai pinduan, lapas aijo' boli daagi' mosangalu tiba ia.

¹¹ Nu sumbu' saba' mian anu sumo aijo' palaganta ka' dosa'nyo haha aijo' na ponsumbu'an saba' ia memang sala'mo.

To poki-pokinde' anu pupusnyomo

¹² Lia-lia' salatan aku nonsaimo i Artemas kabai i Tikhikus namba hi beleyum, bala usaha lia-lia' sampa' mae toka hi belengku kiijo' Nikopolis, kalana aku ko kahanda' jojoong kiijo' mae kopinnyo ola kakona i tempo' nu bakin.

¹³ Bala usaha totu-totu'u otulungi na i Zenas, anu pande hondo i atulan aijo', ka' i Apolos, da aha timbalimo mamba ka' madi' ko kakulangan apa-apaa.

¹⁴ To mia-mian anu bubu' kita tionyo ahi' balajan mombau hahan anu ma'ima' da timbali mompodaagi' kapalaluan anu talalo opalalui; boli sampe aha tumuu' madi' mingguna.

¹⁵ Iwi-iwi' na Utus anu aiya hi belengku, nompakatu salan do'a hi beleyum. Potokakon na salan do'a mami hi to sanga-sangalunto anu sa'a-sa'angu' na kapalesaya'an. O'amalakon da Tumpunto mombalakati kita Utus iwi-iwi'. Tabea' mami, I Paulus 6