TITUS 2 - KITAB NU TUMPU ALLA LELE MA'IMAI'

Pangajalan anu totu'u

¹ Panyo beleyum, Titus, tionyo ahi' beleyum mongajanakon pangajalan anu matantu.

² Opokinde'i na mian to momo'ane anu langkai'mo, da aha boli sampa tagoda nu apa-apaa, pande ka' tumuu' sumo mian anu pantas otabe'i. Aha tionyo ahi' suele montoongi pangajalan anu totu'u anu nolengkat mae hi Tumpu, mongkalibosi tala-talakana', ka' sabaan na mongoa'i sansala.

³ Sumo aitu mule' tionyo ahi' beleyum mompokinde'i to bou-boune anu bengkele'mo da kalakuan nu aha sosok tiba apaa na anu patut hi mian anu tumuu' samata-mata bau kapentingan nu Tumpu. Aha madi' timbali mompitana'i mian sangga'at ka' madi' timbali katagean i inumon anu moko palangu. Aha tionyo ahi' mongajanakon hahan anu ma'ima',

⁴ da tiba jalan anu sumo aijo' aha timbali mompogulu' to bou-boune anu ma'isa bengkele' mongkalibosi osoanyo ka' to ana-anaknyo,

⁵ timbali pande, tumuu' susi' ka' timbali tina nu auwan anu ma'ima', anu tulu-tulutan hi langkai'nyo. Tiba jalan anu sumo aijo' madi'mo ko mian anu mompisala'i lele lengkat mae hi Tumpu.

⁶ Sumo aitu mule', pokinde'i na to oli-olitau da aha timbali sinsumbu'.

⁷ I uno nu iwi-iwi na han, tionyo ahi' beleyum timbali sonto' nu kalakuan anu ma'ima'. De beleyum mongajan, beleyum tionyo ahi' jujun ka' totu-totu'u na kinyonyoa.

⁸ Potatae nu anu sinsumbu' na opake da madi' nupoko ala nu pisala'i nu mian, da sampo bali'um timbali ma'ambang kalana madi' ko hahan anu ma'idek, anu timbali tewa' nu sisik nu aha na kita.

⁹ To posa-posaihon tionyo ahi' tulu-tulutan hi tuannyo, ka' momposanang kinyonyoanyo i iwi-iwi' na han. Aha madi' timbali monggagakon,

¹⁰ kabai montomang. Tionyo ahi' aha saja' mompotoa sipat anu ma'ima' ka' tulu-tulutan, da kalana sipat nu aha aijo' mian mompuji pangajalan mongkona Tumpu anu Momposalamat kita.

¹¹ Kalana Tumpu nompotoamo balakat-Nyo kalana kahanda' momposalamat iwi-iwi' mian.

¹² Balakat nu Tumpu aijo' mompogulu' kita da madi'mo daagi' kita tumuu' mompaha sala' tiba pongka'oho' nu Tumpu ka' madi'mo montuluti anu nu ka'ima'i nu dunia. Kita pinogulu' da tumuu' i uno nu dunia aiya, da monsumbu' boli sampa tagoda nu apa-apaa, jujun ka' tulu-tulutan hi Tumpu.

¹³ Uuka aiya kita hau-haunyomo montanda'i Sinaa anu o ima-imaninto aijo'; i Sinaa aijo' dunia montoaje i Yesus Kristus anu talasanggo; aijo'mo Tumpu Anu Matangkas na Kuasanyo ka' Tomundo anu Momposalamat kita.

¹⁴ Ia nongkulubanakonmo butong-Nyo kalana kahanda' mompobebas kita da iwi-iwi' na anu ma'idek bolimo obaunto, ka' mompotimbalimo kita mian anu binebasmo madi'mo ko dosa'nyo ka' samata-mata iamo na tumpu-Nyo, ka' makekemo na mombau anu ma'ima'.

¹⁵ Ajanakon na iwi-iwi' aijo', ka' opokinde'i, ka' otewa' na anu ma'idek hi batu-batu mian anu mohongo beleyum ka' da nupajuli nu aha. Boli mompojohok samian pe'e montoa beleyum madi' ko angga'nyo.