ROMA 9 - KITAB NU TUMPU ALLA LELE MA'IMAI'

Tumpu tiba mian anu palesayamo hi Ia pipinile'anmo

¹ Apaa na anu kutaloakon aiya memang totu'u, kalana aku i Kristusmo na tumpunyo. Aku madi' baleko'. Kinyonyoangku anu pinotiju'mo nu Roh nu Tumpu mompohoson pikilanku, memang potataengku aiya totu'u.

² Aku talalo susa' tibaa kinyonyoangku talalo mongoa'i sansala

³ kalana to Utu-utusku anu sa'a-sa'angu' na bansa tiba aku. Kalana monginau' aha, aku sanaang na nukutuki nu Tumpu ka' oga'atakon hi Kristus.

⁴ Aha mian anu pinile'anmo ka' Tumpu nompotimbalimo aha to ana-anak-Nyo, ka' nompotoamo kuasa-Nyo hi aha. Ia binajanji'mo tiba aha ka' nombee'imo atulan nu agama hi aha. Tumpu nompoto'i hi aha, mosia na aha tionyo balado'a ka' aha mule' nontalimamo anu jinanji'-Nyo.

⁵ Aha ilee'akon nu mompolee'to. I Kristus salaku mian nolengkat mae i bansa nu aha. Ia na lebee i bawo molingkudui iwi-iwi' aijo'. O puji' na Tumpu toka sidu-sidutu'! Amin.

⁶ Aku madi' ko kahanda' montaloakon janji' nu Tumpu madi'mo ko kaliangannyo; panyo misa' iwi-iwi' na mian nu Israel mian anu pinile'anmo nu Tumpu.

⁷ Madi' iwi-iwi' na lee' i Abraham, osanggohimo to ana-anakmo nu Tumpu “Ola lee' i Ishak na osanggohi lee' nu beleyum”.

⁸ Aijo' poso'nyo saba' lee' i Abraham na timbali to ana-anak nu Tumpu, ola lee'nyo anu i hampeakon jina-jinanji'mo nu Tumpu; misa' iwi-iwi'mo na lee'nyo.

⁹ Kalana janji' nu Tumpu sumo uuka, “I tempo' anu pinotantumo, Aku minsusule'je mae, ka' i Sara ko anaknyomo samian na mo'ane.”

¹⁰ Ka' aiya mule': I Ribka mohampeakon ua'aha na anak mo'ane hi samian na tuuma. Aijo'mo i Ishak mompolee'to.

¹¹ Ma'isa pe'e i hampe ua-ua'aha na anak aijo', Tumpu nompotantumo anu Nu pile'i saidi' mae. Pompile'i nu Tumpu aijo' madi' montoa i anu nupoko bau nu mian, panyo samata-mata posi pongka'oho' nu Tumpu na molaga. Kalana tempo'nyo ua-ua'aha na anak mo'ane i Ribka aijo' ma'isa noko ala mombau apa-apaa anu ma'ima' kabai ma'idek.

¹² Tumpu nontaloakonmo hi Ribka, “Anu tu'a-tu'a tundu' hi anu tatampalui'.”

¹³ I Kitab nu Tumpu tinulis nu Tumpu notatae sumo uuka, “I Yakub Ku kalibosi, panyo i Esau Ku ka'ideki.”

¹⁴ Apaa na anu kahanda' otaloakonto tempo' uuka aiya? Tumpu Allah aijo' madi' adin? Memang totu'u Tumpu aijo' adin!

¹⁵ Kalana Tumpu notatae hi Musa, “Aku mompotoaje balakat hi mian anu Ku kahanda'i pompotoan balakat, ka' Ku potoaje na kalibosan hi mian anu Ku kahanda'i pompotoan kalibosan”.

¹⁶ Jadi kaputusan nu Tumpu aijo' madi' mintoong i kasanangan nu kinyonyoa nu mian, kabai anu nubau nu mian, panyo ola samata-mata kanonongan nu Tumpu toka hi mian anu pinile'an-Nyomo aijo'.

¹⁷ Kalana i Kitab nu Tumpu tinulis, “Tumpu notatae hi Tomundo' nu Mesir, ‘Aku mompotimbali beleyum Tomundo' ola sa'angu' na kahanda' aiya, da kalana beleyum, Aku mompotoa kuasang-Ku, ka' mompotimbali sanggong-Ku talasanggo i songko-songko na dunia.’ ”

¹⁸ Jadi, Tumpu mongkalibosi batu-batu mian, de Tumpu Allah ko kahanda' sumo aitu. Ka' Tumpu mompopanggaga samian, de Tumpu ko kahanda' sumo aijo' suele.

Tambuha' nu Tumpu ka' ka'ima'an nu kinyonyoa nu Tumpu Allah

¹⁹ Tantu, kita Utus motataemo hi belengku, “Desumo aitu kadaka' Tumpu daagi' mompoosala' mian? Te misa' madi' ko samian pe'e na moko tewa' pongka'oho' nu Tumpu?”

²⁰ Panyo, kita Utus! Kita Utus ola mian. Ka' kita Utus madi' timbali baani montaami Tumpu! Te timbali na tampat nu bunga mompokilawa hi mian anu nombau, “Ka' kadaka' beleyum nombau aku sumo aiya?”

²¹ Te misa' mian anu nombau tampat nu bunga aijo' ko hak mombau tano' kun aijo' iyaamo pongka'oho'nyo? Sangkompon na tano' kun, mian aijo' ko hak mombau ohua' na ngahannyo na tampat nu bunga: sa'angu' ma'ima' ka' sangga'at madi' talalo ma'ima'.

²² Sumo aijo'mo apaa na anu binau nu Tumpu. Ia ko kahanda' molubatakon tambuha'-Nyo ka' mompotoa kuasa-Nyo. Panyo Ia sabaan hi aha anu tionyo o hukum kalana nonsaduakonmo Ia motambuha'.

²³ Tumpu mule' ko kahanda' mompotoa hi kita kabilahian anu molabi-labih binee'-Nyo hi kita anu nu Nu kalibosi. Kita tinoukaan-Nyomo mohumpak kabilahian aijo'.

²⁴ Kita ilaga-Nyomo, misa' ola lengkat i bansa Yahudi, panyo mule' suele i bansa sangga'at.

²⁵ Kalana i kitab Nabi Hosea, Tumpu notatae, “To mia-mian anu misa' mian-Ku anu palesayamo, Kusanggoje, ‘Mian-Ku anu palesayamo’. Bansa anu madi' Ku kalibosi, Kusanggoje anu ‘Ku kalibosi’.

²⁶ Ka' i tampat pinontaloakonan hi mian, ‘Komiu misa' mian-Ku anu palesayamo,’ i kiijo' to mia-mian haha aijo' osanggoje to ana-anak nu Tumpu anu tumuu'.”

²⁷ I Nabi Yesaya notatae sahondo-hondonyo mongkona bansa Israel, “Mau mule' konjoo' nu bansa Israel sumo bone' i ambai, panyo ola sangkiding na anu salamat;

²⁸ kalana Tumpu malia'mo na monaabu'akon hukuman i isi nu dunia.”

²⁹ I Yesaya notatae sumo uuka mule', “De Tumpu Anu ko Kuasa madi' nombee'i kita lee', tantu kita iwi-iwi' tinimbalimo Sodom ka' Gomora.”

Pompahasumbu'an mian anu palesayamo hi Tumpu tiba Lele Ma'ima' anu nolengkat mae hi Tumpu

³⁰ Jadi, kahondoannyo aijo' sumo uuka: To bansa-bansa sangga'at anu misa' Yahudi madi' ko tanga'an da pompahasumbu'an nu aha tiba Tumpu mompo'ule' ma'ima'. Panyo kalana aha palesaya, sahingga Tumpu nombau pompahasumbu'an nu aha tiba Tumpu mompo'ule' ma'ima'.

³¹ Sumo aitu mule' to mia-mian Yahudi saja' ko tanga'an mohongo-hongo atulan nu pompahasumbu'an nu aha tiba Tumpu mompo'ule' ma'ima'. Panyo ola ahi' da aha madi' mohumpak hasinnyo.

³² Kadaka' aha madi' mohumpak hasinnyo? Kalana aha mombau aijo' madi' palesaya hi Tumpu, panyo ola posi tanga'an nu aha. Sahingga aha notua'mo tinosumpun i “Batu Tosumpunan”.

³³ Mongkona batu aijo', i Kitab nu Tumpu tinulis sumo uuka, “O intomakon na aiya: I Sion pinotimpas-Kumo sambatu na batu anu monsaduakon mian tosumpun; aijo'mo sambatu na batu daka' anu monsaduakon mian motua'. Panyo mian anu palesaya hi Ia madi' mompele-pele'.”