ROMA 7 - KITAB NU TUMPU ALLA LELE MA'IMAI'

Atulan po'osoan da bau sonto'

¹ To utu-utusku! Kita Utus iwi-iwi' nonsumbu'mo atulan. Tantu komiu monsumbu'mo taalu' kuasa nu atulan kona hi toto samian, nukona de mian aijo' daagi' tutuu'.

² Susumo samian na boune anu ko langkai'nyo sego-segot i atulan nu langkai'nyo, panyo de langkai'nyo aitu daagi' tutuu'. De langkai'nyo matemo bengkele'nyo aijo' bebas i atulan anu monsegoti ia hi langkai'nyo.

³ De boune aijo' tumuu' tiba mo'ane sangga'at padahan langkai'nyo daagi' tutuu', tantu boune aijo' osanggohi masala'. Panyo de mo'anenyo matemo tantu koonyo nu atulan, boune aijo' binebasmo. Ka' de ia po'ule'mo mo'osoa tiba mo'ane sangga'at, tantu ia misa' masala'.

⁴ Sumo aitumo na bau-baunyo tiba komiu, to Utu-utusku. Kona i atulan nu agama Yahudi komiu i natemo, kalana komiu pinosa'angu'mo tiba butong i Kristus ka' Iamo na tumpunyo, anu sinilaka po'ule'mo pinotumuu'. Ia sinilaka po'ule' pinotumuu' da kita ko kaliangannyo hi Tumpu i kantumuu'anto.

⁵ Kalana, u'utu mae kita tumuu' mombatuki sipat-sipat nu mian. Tempo'nyo aitu anu okamilui monsaduakon da baladosa', anu lubat mae kalana ko atulan nu agama na montoongi kuasa i uno nu butongto. Mokonyo aijo' kita mombau anu mongahenakon kapatean.

⁶ Panyo uuka aiya kita madi'mo sego-segot i atulan nu agama Yahudi. Kita natemo i atulan anu u'utu mae mongkusai kita. Kita madi'mo monsombah susumo jalan u'utu mae mombatuki atulan anu tuli-tulis. Uuka aiya kita monsombahmo mombatuki jalan bu'ou anu pinotiju' nu Roh nu Tumpu hi kita.

Atulan tiba dosa'

⁷ Desumo aitu, apaa na anu otaloakonto? Te atulan nu agama Yahudi aiya ma'idek? Tantu madi'! Panyo atulanmo aijo' na mompokinde'i aku da nonsumbu' anu moko baladosa'. Madi' sinumbu'ku na mangoa pa' apaa, de atulan nu agama madi' nontaloakon, “Boli mangoa.”

⁸ Montului atulan nu agama, dosa' nohumpakmo jalan mompolubat ngangahan nu anu okamilui ka' okangoa'i i uno nu kinyonyoangku; kalana de madi' ko atulan nu agama, te dosa' madi' osumbu'.

⁹ Aku u'utu mae tinumuu' misa' pilenje kino atulanmo nu agama. Panyo salatan atulan nu agama tinokamo, dosa' nontampu'unimo kinantoaan,

¹⁰ ka' aku mule' i natemo. Sahingga atulan nu agama aijo' anu momoonanyo kinahanda'an da mombee'i kantumuu'an, yo aitu ola ahi' mompotoka kapatean hi belengku.

¹¹ Kalana montului atulan nu agama aijo', dosa' nongalamo jalan nongakali ka' nompatei aku.

¹² Atulan nu agama nolengkat mae hi Tumpu, ka' batu-batu palentah i uno nu atulan aijo' nolengkat mae hi Tumpu, sahingga adin ka' ma'ima'.

¹³ Yo te aiya alati'nyo, au'aitu anu ma'ima' aijo' molubatakon kapatean hi belengku? Tantu madi'! Dosa' ahi' na anu mompolubat kapatean aijo'. Dosa' mongala jalan anu ma'ima' da mompotoka kapatean hi belengku, da sipat-sipat nu dosa' kantoaan mana-manasa. Montului palentah-palentah nu Tumpu, sahingga tinoanyo na ko ide' nyo nu dosa'.

Anu madi' mo'imboa i uno nu butong nu mian

¹⁴ Osumbu'to atulan nu agama Yahudi nolengkat mae i Roh nu Tumpu, panyo aku aiya mian ponga'! Aku pinobalukmo da timbali botuan nu dosa'.

¹⁵ Kalana posi aku madi' kusumbu' na anu binaungku. Anu kupaibau aijo' na madi' binaungku; panyo anu kuku ka'ideki aijo' mule' na binaungku.

¹⁶ Yo, de aku mombau anu madi' mo'imboa tiba anu ku ka'ima'i, aijo' alati'nyo aku mongakui te atulan nu agama Yahudi aijo' ma'ima'.

¹⁷ Mokonyo aitu, misa'mo aku na sahondo-hondonyo nombau aijo', panyo dosa' anu mongkusai aku.

¹⁸ Kusumbu' madi' ko sa'angu' pe'e na anu ma'ima' i butongku; aijo'mo sipatku salaku mian. Kalana daagi' ko indi hi belengku mombau anu ma'ima', panyo aku madi' moko ala mombau.

¹⁹ Aku madi' mombau anu ma'ima' anu ku ka'ima'i da o bau; ola mule' binaungku anu toto ma'i-ma'idek.

²⁰ De kubau na anu madi' ka'oho' kubau, aijo' alati'nyo misa' aku na nombau anu haha aijo', panyo dosa' anu mongkuasai butongku.

²¹ Sahingga aku nongala sa'angu' na kaputusan taalu' atulan aiya na montoongi kuasa; de aku mongka'oho' mombau anu ma'ima' ola mule' anu ma'idek na tonginau' hi belengku.

²² Kinyonyoangku mongka'ima'ai atulan nu Tumpu,

²³ panyo aku tinonginau' tukoongku i uno nu butongku daagi' suele ko atulan sangga'at anu montoongi kuasa – aijo'mo atulan anu madi' mo'imboa tiba atulan anu nutalima nu pikilanku. Mokonyo aijo' aku tinonsegot i atulan nu dosa' anu nontoongi kuasa i uno nu butongku.

^24-26 Jadi, sumo aiyamo na balu-balunyo nu aku. Aku mohongo-hongo atulan nu Tumpu mombatuki pikilanku, panyo kalana sipat nu mian daagi' i butongku, aku tinundu'mo i dosa'. Paya' na butongku aiya binalaamo! Ihena mongka'oho' momposalamat aku, i butong aiya anu momboa aku i kapatean? Talima kaseh hi Tumpu Allah! Ia na mongka'oho' momposalamat aku hi Yesus Kristus.