ROMA 5 - KITAB NU TUMPU ALLA LELE MA'IMAI'

Po'ule' ma'ima' tiba Tumpu

¹ Uuka aiya kita po'ule'mo na'ima' tiba Tumpu, kalana kita palesaya. Mokonyo aitu kita tumuu' i uno nu kadamean tiba Tumpu kalana Tumpunto i Yesus Kristus.

² Kalana kita palesaya hi Yesus, sahingga Ia nompotimbali kita moko ala mongoa'i liibos nu Tumpu, ka' kalana liibos aijo' kita tumuu' uuka aiya. Kalana aijo' kita lame' na kinyonyoa, kalana kita ko anu otaha'imani aijo'mo kita mongoa'ije tumuu' ma'ima' anu binee' nu Tumpu!

³ Ka' misa' ola aijo', kita mule' lame' i uno nu kasansala'an, kalana osumbu'to kasansala'an mombau mian timbali tapakuun,

⁴ ka' tapakuunan mombau mian moko tahan ujian; aijo'mo na mompokododo kinyonyoa taha'iman.

⁵ Anu otaha'imani susumo aiya madi' ahi' mombaleko'i kita, kalana kinyonyoanto ingisianmo nu Tumpu nu liibos-Nyo. Tumpu nombau aijo' montului Roh-Nyo, anu binee'mo hi kita.

⁶ Tempo'nyo kita i uno nu madi'mo moko ala, i Kristus sinilakamo pontokong kita i tempo' anu tinantukanmo nu Tumpu; padahan kita to mia-mian anu najo'onmo hi Tumpu.

⁷ Batu-batu mian anu adin susa' na mongka'oho' mate. Beilako' mian anu ma'ima' na kinyonyoa yo daagi' ko mian anu baani mate.

⁸ Panyo Tumpu mompotoa liibos-Nyo hi kita tempo'nyo i Kristus sinilaka pontokong kita tempo'nyo kita daagi' baladosa'.

⁹ Uuka aiya kita po'ule'mo na'ima' tiba Tumpu kalana tinokongmo nu kasilakan i Kristus; kalana aijo' kita tantumo suele oposalamat, madi'mo nukona nu tambuha' nu Tumpu kalana i Kristus.

¹⁰ De tempo'nyo kita nompaha idek ka' Tumpu, kita pinodame-Nyomo nu kinasilakaan nu Anak-Nyo, apaa mule' uuka aiya salatan pompahasumbu'anto ka' Tumpu po'ule'mo na'ima', matantumo kita oposalamat mule' i uno nu kantumuu'an i Kristus.

¹¹ Ka' lebe mule' molingkudui aijo', kita lame' kalana ka'ima'an nu Tumpu anu inyata'mo hi Tumpunto i Yesus Kristus. Kalana palesaya hi Kristus, kita uuka aiya nongoa'imo pompahasumbu'anto anu ma'ima' aijo' tiba Tumpu.

I Adam ka' i Kristus

¹² Dosa' ninsoop i uno nu dunia sinabapan nu samian, ka' lengkat i dosa' aijo' sahingga ko anumo sinilaka. Ahennyo, kapatean nolele isongko-songko na mian, kalana iwi-iwi' na mian binaladosa'mo.

¹³ Ma'isa pe'e atulan nu agama Yahudi binee', dosa' daagi'mo i dunia. Panyo dosa' aijo' madi' o tuntut, kalana madi' ko atulan anu olanggai.

¹⁴ Mau mule' lengkat pe'e tempo'nyo hi Adam kino toka-toka tempo'nyo hi Musa, kapatean nongkuasaimo songko-songko na mian. Aitu pe'e to mia-mian anu madi' nolanggai susumo anu binau i Adam, mian haha aijo' suele kinuasanmo nu kapatean. I Adam te gambalan nu anu saidi' mae toka.

¹⁵ Panyo ua-ua'aha aijo' madi' pokakana; kalana balakat nu Tumpu lebe daka' de opokakanakon tiba panggaga i Adam anu madi-madi' mohongo-hongo. Panggaga nu samian monsaduakon mian da'isan mate. Lebe daka' mule' na balakat nu Tumpu tiba kasalamatan anu binee'-Nyo hi mian anu sumo aijo' na konjoo'nyo, kalana ka'ima'an nu kinyonyoa nu samian, aijo'mo i Yesus Kristus.

¹⁶ Balakat nu Tumpu mule' lebe daka' molingkudui dosa' nu samian aijo'. Kalana salatan samian nolanggaimo anu o tewa', nanabu'mo na kaputusan, “Sinala'mo”. Panyo salatan manjoo'mo na mian nombau dosa', tinokamo na balakat lengkat hi Tumpu mompoto'i, “Madi'mo ko sala'nyo”.

¹⁷ Kalana samian nolanggaimo anu otewa', kapatean nolelemo iyaya mae kalana sinaduakon nu samian aijo'. Lebe daka' mule' apaa na anu binau nu samian aijo'mo i Yesus Kristus. Kalana Ia, Tumpu mombee' molabi-labih na balakat-Nyo hi mian anu sumo aijo' na konjoo'nyo, ka' ola i halala'akon da aha timbali mompo'ule' ma'ima' tiba Tumpu; aha nongkuasai dunia aiya kalana i Yesus Kristus.

¹⁸ Jadi, kalana samian nolanggai anu otewa', ahennyo iwi-iwi' na mian i hukum, sumo aitu mule' de samian mombau anu mombatuki pongka'oho' nu Tumpu, ahennyo iwi-iwi' na mian pinobebas i kasala'an ka' binee'an kantumuu'an.

¹⁹ Ka' susumo manjoo' na mian timbali mian baladosa' kalana samian anu madi' montapali, sumo aijo' mule' na konjoo'nyo nu mian opotimbali po'ule' ma'ima' tiba Tumpu, kalana samian na anu montapali Tumpu.

²⁰ Anu nombee' atulan nu agama Yahudi aijo' posi Tumpu. Panyo lebe mian makeke montapali atulan aijo', lebe mule' aha molanggai ka' baladosa' hi Tumpu. Mau mule' mian lebe mombau dosa', Tumpu lebe mule' mongkalibosi aha.

²¹ Jadi, kita tionyo mate kalana kita nombaumo dosa'. Panyo Tumpu mongkalibosi kita mombee'i jalan hi kita da mompaha ima' tiba Ia. Ka kalana pompahasumbu'anto tiba Tumpu po'ule'mo na'ima', Ia mule' mombee'i kantumuu'an kopian ka' sampe toka sidu-sidutu' hi kita kalana i Yesus Kristus, Tumpunto.