ROMA 4 - KITAB NU TUMPU ALLA LELE MA'IMAI'

I Abrahamna bau sonto'

¹ Desumo aitu, apaa na timbali otaloakonto mongkona i Abraham, mompolee' nu bansanto? Mosia na anu ingoa'annyomo?

² De hahan anu binaunyomo nonsabapi Tumpu nontalimamo ia salaku mian anu momposanang kinyonyoa nu Tumpu, aijo' yo daagi' ko pintoongan na ia de kobubuun. Panyo ia madi' moko ala buulon i ahop nu Tumpu.

³ I Kitab nu Tumpu tinulis, “I Abraham palesaya hi Tumpu, ka' kalana palesayanyo aijo' ia tinalima nu Tumpu Allah salaku mian anu momposanang kinyonyoa nu Tumpu.”

⁴ Mian anu mombau hia, mohumpak tamboonyo; ka' tamboonyo madi' ola osanggo sumo palasen, kalana aijo' haknyo.

⁵ Panyo daagi' ko mian anu madi' montaha'imani posi usahanyo; ia mongasanakon butongnyo hi Tumpu anu nompoto'imo mian baladosa' opobebasmo i kasala'an. Kalana kapalesaya'annyo aijo' Tumpu nontalimamo mian aijo' salaku mian anu momposanang kinyonyoa nu Tumpu.

⁶ Sumo aijo' mule' na koonyo i Daud; mokonyo aijo' ia nontaeakon salamat kopian toka hi mian anu tinalimamo nu Tumpu Allah salaku mian anu momposanang kinyonyoa-Nyo, madi' Tumpu Allah sola' montutu-tutugi palabuatan nu mian aijo'. I Daud notatae sumo uuka,

⁷ “Salamat kopian na mian anu kasala'an-kasala'annyo ingampunanmo ka' dosa-dosa'nyo ilamunmo nu Tumpu!

⁸ Salamat kopian na mian anu to dosa-dosa'nyo madi' nutuntut nu Tumpu!”

⁹ Te anu otaloakon salamat kopian aiya ola opadolakon toka hi to mia-mian anu nombatukimo atulan nu sunat? Kabai singkona hi to mia-mian anu madi' mombatuki atulan nu sunat? Tinaloakonmo kami momoonanyo, i Abraham tinalima nu Tumpu salaku mian anu momposanang kinyonyoa-Nyo, kalana i Abraham palesaya hi Tumpu Allah.

¹⁰ Yo, naipian na Tumpu nompoto'i anu sumo aijo'? Ma'isa pe'e sinunat kabai pinoko sunatmo na i Abraham? Memang ma'isa pe'e ia sinunat, misa' noko lapasmo.

¹¹ Ia sinunat i mihinyo, ka' sunatnyo aijo' ola sa'angu' na tanda, kalana Tumpu nontalimamo ia salaku mian anu momposanang kinyonyoa nu Tumpu, kalana palesaya hi Tumpu Allah. Ia tinalima nu Tumpu tempo'nyo ia ma'isa pe'e mombatuki atulan nu sunat. Ka' i Abraham tinimbalimo tuuma i uno nu kapalesaya'an mongkona iwi-iwi' na mian anu palesaya hi Tumpu Allah, ka' anu tinalimamo nu Tumpu salaku mian anu momposanang kinyonyoa-Nyo, mau mule' aha madi' mombatuki atulan nu sunat.

¹² I Abraham mule' tuuma i uno nu kapalesaya'an bagi nu to mia-mian anu mombatuki atulan nu sunat. Ia tuuma nu kapalesaya'an nu aha misa' ola kalana aha mombatuki atulan nu sunat, panyo mule' kalana aha tumuu' palesaya hi Tumpu, pokakana i Abraham tempo'nyo ia ma'isa pe'e nombatuki atulan nu sunat.

Janji' nu Tumpu o humpak kalana palesaya hi Tumpu

¹³ Tumpu binajanji' hi Abraham tiba anu ilee'akonnyo, tukoonyo dunia aiya i Abraham na tumpunyo. Tumpu binajanji' sumo aijo' misa' kalana i Abraham tulu-tulutan i atulan nu agama Yahudi, panyo kalana ia palesaya hi Tumpu, sahingga Ia tinalima nu Tumpu salaku mian anu momposanang kinyonyoa-Nyo.

¹⁴ Kalana de ola to mia-mian anu tulu-tulutan i atulan nu agama Yahudi haha aijo' na mohumpak anu jinanji'mo nu Tumpu Allah, de sumo aijo' tantu mian anu palesaya hi Tumpu madi' hondo-hondo kogunanyo, ka' janji mule' nu Tumpu suele madi' kokaliangannyo.

¹⁵ Atulan nu agama Yahudi molubatakon hukuman nu Tumpu. Panyo de madi' ko atulan, tantu madi' ko anu olanggai.

¹⁶ Jadi janji' nu Tumpu aijo' mimpu'u i palesayanyo nu mian hi Tumpu. Aijo' na timbali sa'angu' bau pintoongan hi iwi-iwi' lee' i Abraham, taalu' janji' aijo' obee' hi aha salaku sa'angu' na taju anu halala' lengkat mae hi Tumpu; misa' ola hi aha anu tulu-tulutan i atulan nu agama Yahudi, panyo suele hi aha anu palesaya hi Tumpu pokakana sumo i Abraham palesaya hi Ia. Kalana i Abraham aijo' tuumanto, kita ingko-ingkot i uno nu kapalesaya'an.

¹⁷ Kalana Tumpu notatae sumo uuka hi Abraham, “Aku mompotimbalimo beleyum tuuma nu manjoo' na bansa.” Sumo aijo'mo na Tumpu nombee' janji' aijo' hi Abraham. Ka' i Abraham pinalesayamo hi Ia. Iamo na Tumpu anu mompotumuu' mian silaka; Iamo ahi' na Tumpu anu ola motatae aku mombau apaa na anu madi' toho' daagi', timbali daagi'.

¹⁸ I Abraham ola saja' taha'iman ka' palesaya mau mule' madi'mo nupoko ala nu butongnyo. Kalana aijo' ia tinimbali tuuma nu manjoo' na bansa. Sumo tinulis i uno nu Kitab nu Tumpu, “Lee'um timbali da'isan hondo.”

¹⁹ I Abraham tempo'nyo aitu monsumbu' ia madi'mo tantu daagi' mohumpak bija', kalana butongnyo talalomo notu'a ka' umunnyo ohanimo sa'atu na taun; i Sara mule' bengkele'nyo aijo', lengke'. Panyo palesaya totu-totu'u i Abraham madi' toho' maga'a.

²⁰ Ia tataap palesaya ka' madi' bata-bata i janji' nu Tumpu Allah. Ola o kalana palesayanyo nompotimbalimo ia da mompaka pahoson, sahingga ia saja' mompuji' Tumpu.

²¹ Ia palesaya hondo Tumpu timbali mombau apaa na jinanji'-Nyomo.

²² Mokonyo i Abraham tinalima nu Tumpu salaku mian anu momposanang kinyonyoa nu Tumpu.

²³ Potatae, “Otalima sumo mian anu momposanang kinyonyoa nu Tumpu” tinulis misa' ola posi kona hi Abraham,

²⁴ panyo suele kona hi kita. Kita suele otalima sumo mian anu momposanang kinyonyoa nu Tumpu, kalana kita palesaya hi Tumpu, anu mompotumuu'mo i Yesus, Tumpunto, mau mule' Ia sinilakamo.

²⁵ I Yesus aijo' binee'mo da o patei kalana dosa-dosa'to, lantas Ia po'ule' pinotumuu' nu Tumpu da mompotimbali kita po'ule' mompaha maima' tiba Tumpu.