ROMA 16 - KITAB NU TUMPU ALLA LELE MA'IMAI'

Salan do'a i Paulus

¹ Aku kahanda' momposumbu' utusto boune, i Febe. Ia nontulungimo jama'at i Kengkrea.

² Otalima na ia sumo sala' samian anu pinalesayamo hi Tumpu. Memang sumo aijo'mo na to mia-mian anu palesayamo hi Tumpu, tionyo mompaha toa-toa samian ka' samian. Otulungi na ia de ia mompalalui da otulungi miu mae na ia, kalana ia nontulungimo da'isan na mian – ka' suele aku.

³ Potokakon na salan do'angku hi Priskila ka' hi Akwila, to sanga-sangalungku anu nokalaja hingga-hinggat bau kapentingan i Kristus Yesus.

⁴ Aha kiniboli' sinilakamo kalana mongka'oho' momposalamat aku. Aku montalima kaseh hi aha – ka' misa' ola aku, panyo iwi-iwi' na jama'at bansa sangga'at anu misa' Yahudi suele montalima kaseh hi aha.

⁵ Potokakon suele na salan do'angku hi jama'at anu saja' toka sihuk i laigan nu aha. Salan do'a hi Epenetus anu ku kukalibosi. Iamo na mian anu momonanyo pinalesaya hi Kristus i da'erah nu Asia.

⁶ Salan do'angku suele hi Maria. Ia nokalajamo sumo aijo' na kokekenyo kalana kapalaluan miu.

⁷ Potokakon suele na salan do'angku hi Andronikus ka' hi Yunias. Aha sa'a-sa'angu'mo na bansa tiba aku, ka' toho'mo ninsoop i talungku' hingga-hinggat tiba aku. Ma'isa pe'e aku pinalesaya hi Kristus, aha polo-polo'mo pinalesaya. Talasanggohondo na aha hi to rasul-rasul.

⁸ Salan do'a hi Ampliatus, anu ku kukalibosi, kalana ia hingga-hinggat tiba aku nosa'angu'mo tiba Tumpu.

⁹ Potokakon na tabea'ku hi Urbanus, sangalunto anu nokalajamo hingga-hinggat tiba kita kalana kapentingan i Kristus. Sumo aitu mule' tabea'ku hi Stakhis anu ku kukalibosi.

¹⁰ Salan do'angku hi Apeles. Tinoamo na bukuti'nyo ia tulu-tulutan hondo hi Kristus. Salan do'angku suele hi sampoto utusan i Aristobulus,

¹¹ ka' hi Herodion. Ia sa'a-sa'angu'mo na tulunan nu bansa tiba aku. Sumo aitu mule' salan do'angku hi to utu-utus anu sa'agama i uno nu sampotoutusan i Narkisus.

¹² Salan do'angku hi Trifena tiba hi Trifosa anu nake-nakeke na nokalaja montuluti palentah nu Tumpu, ka' hi Persis anu ku kukalibosi. Ia suele nakekemo na nokalaja kalana kapentingan nu Tumpu.

¹³ Salan do'angku hi Rufus ka' hi tinanyo anu sumo-sumomo tinangku. I Rufus mian anu pinile'anmo nu Tumpu ka' talapuji'.

¹⁴ Potokakon na salan do'angku hi Asinkritus, hi Flegon, hi Hermes, hi Patrobas, hi Hermas, ka' hi iwi-iwi' na to utu-utus anu sa'a-sa'agama tiba aha.

¹⁵ Salan do'angku hi Filologus ka' hi Yulia; hi Nereus ka' utusnyo boune, hi Olimpas ka' hi iwi-iwi' mian anu palesayamo tiba aha.

¹⁶ Mompaha sala-salan do'ai nu kalibosan salaku poto utusan nu mian Kristen. Iwi-iwi' na jama'at Kristus mompotoka salan do'a nu aha hi to Utu-utus.

Puusnyomo nu pokinde'nyo

¹⁷ To Utu-utus! Kupoita sabole-boleh: Obala'ingati na to mia-mian anu monsaduakon poga'a-ga'atan ka' mompotabuntala' kapalesaya'an hi Tumpu. Anu susumo aijo' mompaha kea' tiba anu pinogulu'mo hi komiu. Opolilit na mian sumo aijo'.

¹⁸ Kalana to mia-mian anu mombau sumo aijo', misa' mokalaja bau kapentingan i Kristus Tumpunto, panyo ola da mompatika'osa apaa na anu nuka'ima'i i uno nu posi kinyonyoa nu aha. Pagala nusale'i nu potatae nu aha anu toto mata-matami', aha mongakali to mia-mian anu madi' ko anu nupisumbu-sumbu'.

¹⁹ Iwi-iwi' na mian nonsumbu'mo, komiu mohongo-hongo hondo pangajalan mongkona Lele Ma'ima' anu nolengkat mae hi Tumpu. Ka' aku mule' sanang i han anu sumu aijo' hi komiu. Kugagan da komiu pande i hahan anu ma'ima', ka' ponga' i hahan anu ma'idek.

²⁰ Tumpu anu mombee'i ka'ima'an hi mian, malia'mo mompotundu' Ibilis i aluk nu kakuasa'anum, ka' mohopu'imo ia. O amalakon da to Utu-utus saja' Nubalakati Yesus Kristus Tumpunto!

²¹ I Timotius, sangalungku, mompotoka salan do'anyo hi komiu. Sumo aitu mule' na i Lukius, i Yason ka' i Sosipater anu sa'a-sa'angu'mo na tulunan nu bansa tiba aku.

²² Anu nontulis sulat aiya aku, i Tertius. Aku mompotoka salan do'a salaku poto utusan hi komiu.

²³ I Gayus nompakatu salan do'a hi komiu. Aku jinojoong i laigannyo tiba jama'at kami suele mogaleja i kiijo'. I Erastus, kapala nu anu mongulus doi kiijo' i kota, nompakatu salan do'anyo hi komiu. Sumo aitu mule' na Utusto i Kwartus. [

²⁴ O amalakon da Tumpunto i Yesus Kristus mombalakati kita to Utu-utus iwi-iwi'. Amin.]

Pinontuduinyo sulat

²⁵ O puji' na Tumpu! Matangkas na Kuasanyo nompohosonmo palesaya nu kita Utus sumo anu tinulismo i Lele Ma'ima' anu lengkat mae hi Tumpu, anu pinolelengkumo mongkona i Yesus Kristus. Aku nompolele lele aijo' sumo anu pinonyata'mo nu Tumpu Allah; aijo'mo tanga'an nu Tumpu anu no atu-atumo na taun na kopinnyo ma'isa sinumbu' nu mian.

²⁶ Panyo uuka aiya, kalana palentah nu Tumpu anu madi' ko kamingkotannyo, tanga'an aijo' pinonyata'mo ka' binebakonmo hi iwi-iwi' na bansa, han aijo' tinoa hi anu tinulismo nu to nabi-nabi, da aha iwi-iwi' palesaya ka' mohongo-hongo hi Tumpu Allah.

²⁷ Olamo Ia sa'a-sa'angu'nyo na Tumpu, Ia talalo hondo pande. O amalakon da Ia saja' opopodaka' sidu-sidutu' hi Yesus Kristus! Amin. Tabea' mami, I Paulus, posaihon i Kristus Yesus 49