ROMA 14 - KITAB NU TUMPU ALLA LELE MA'IMAI'

Boli mompisala'i utusum

¹ Mian anu madi' junjuhi' na palesayanyo itina' hi komiu to Utu-utus, otalima ma'i-ma'ima'. Boli painggaga tiba ia anu pa' mosia na pongka'oho'nyo.

² Daagi' ko mian anu ko tanga'an tukoonyo ia timbali mongkaan mau mule' apaa. Panyo daagi' ko mian sangga'at anu ola ue-uengke' na palesayanyo; nu oa'i anu ola timbali nukaan ola santo uta-utan.

³ Mian anu mongkaan mau mule' apaa, boli mongalu mian anu mongkaan ola kaanon anu tinantukanmo; ka' mian anu mongkaan ola anu tinantukanmo, boli mule' mompisala'i mian anu mongkaan mau mule' apaa, kalana Tumpu nontalimamo ia.

⁴ Ihe na kita Utus, sahingga kita Utus mompisala'imo posaihon nu mian sangga'at? Pa' posaihon aijo' motua' kabai mobula, aijo' ponsumbu'an nu tuannyo. Ka' memang posaihon aijo' po'ule'je tuminjo mahoson, kalana Tumpu moko ala mompotimbali ia tuminjo ka' mahoson.

⁵ Daagi' ko mian anu mongoa'i sala'sa'angu' na sinaa anu tinantukanmo lebe penting molingkudui sinaa-sinaa sangga'at, sadang mian sangga'at mule' monsangka tukoonyo sinaa haha aijo' pokakanamo. Bakasmo da toto samian montantukan posi pikilannyo.

⁶ Mian anu mompentingkan sinaa-sinaa anu tinantukanmo, mian aijo' mombau sumo aijo' da mompopodaka' Tumpu. Mian anu mongkaan mau mule' pa' apaa, mombau sumo aijo' da mompopodaka' Tumpu, kalana ia montalima kaseh hi Tumpu, saba' nohumpakmo kaanon aijo'. Sumo aijo' mule' tiba mian anu mongkaan ola kaanon anu tinantukanmo; mian aijo' mule' mompopodaka' Tumpu ka' montalima kaseh hi Tumpu.

⁷ Madi' ko samian pe'e aiya hi kita anu tumuu' ola posi kapentingan nu butong; ka' madi' ko samian pe'e anu aiya hi kita silaka posi kapentingan nu butongnyo.

⁸ De kita tumuu', kita tumuu' bau kapentingan nu Tumpu. Ka' de kita silaka, kita mule' silaka bau kapentingan nu Tumpu. Jadi, tumuu' kabai silaka, kita aiya Tumpu na tumpunyo.

⁹ I Kristus sinilakamo ka' po'ule' tinumuu'. Mokonyo aijo' Ia timbali Tumpu nu to mia-mian anu tumuu' tiba mule' Tumpu nu to mia-mian anu sinilakamo.

¹⁰ Jadi, to Utu-utus! Bau apaa na mompisala'i utusum anu sa'a-sa'angu' na kapalesaya'an? Ka' bau apaa na kita Utus monsangka ia madi' ko angga'nyo? Kita iwi-iwi' mo'ahopje hi Tumpu Allah da o putusi.

¹¹ I uno nu Kitab nu Tumpu tinulismo, “Totu'unyo”, koo-Nyo nu Tumpu, “toto samian tionyo monsombah i ahop-Ku; ka' toto samian tionyo mangaku tukoonyo Akumo na Tumpu Allah.”

¹² Jadi kita toto samian tionyo mongakui iwi-iwi' apaa na anu binauntomo hi Tumpu.

Boli monsaduakon Utusum sala' na pikilan

¹³ Mokonyo aitu boli kita mompaha pisa-pisala'i. Ola ahi' opai-pai lio da komiu madi' mombau apa-apaa anu monsaduakon samian na utus, anu sa'a-sa'angu' na kapalesaya'an tagoda ka' baladosa'.

¹⁴ Kalana aku nosa'angu'mo tiba i Tumpu Yesus, sahingga ku palesaya hondo taalu' madi' ko apa-apaa na anu sabenannyo mahenyu; panyo han aijo' mahenyu hi toto samian de mian aijo' monsangka mahenyu.

¹⁵ Panyo de apaa na anu okaan nu kita Utus, samian na utus sangalunto anu bubuu' palesaya osakitimo na kinyonyoanyo, saba' kita Utus madi'mo mimpikilan molengkat i kinyonyoa anu molibos. De i Kristus sinilakamo bau kapentingan nu toto samian, boli mompojohok mian aijo' dumo ma'idek na kinyonyoanyo kalana nu saduakonmo nu anu okaan nu kita Utus.

¹⁶ Mokonyo aijo' boli mompojohok apaa na anu ma'ima' hi komiu, osangkamo madi' ma'ima' nu mian sangga'at.

¹⁷ Kalana de Tumpu mompalentahmo kantumuu'an nu mian toto samian, apaa na anu timbali nukaan kabai o inum, madi'mo penting. Anu penting aijo'mo, mian anu mohongo-hongo pongka'oho' nu Tumpu Allah, mongoa'i sabaan na kinyonyoa, ka' montalima kalame'an anu binee'mo nu Roh nu Tumpu.

¹⁸ Mian anu mohongo-hongo apaa na anu pinalentahkonmo i Kristus susumo aijo', mian aijo' momposanangmo kinyonyoa nu Tumpu, ka' nu angga'i nu to mia-mian sangga'at.

¹⁹ Mokonyo aijo' apaa na anu okahanda'i obaunto tionyo ahi' saja' hahan anu mompotimbali posa'angu'an ka' mompaha bango-bangonakon.

²⁰ Boli ola kalana kaanon, kita Utus mongideimo apaa na anu binaumo nu Tumpu. Iwi-iwi na kaanon memang halala' okaan; panyo de apaa na anu okaan nu kita Utus monsaduakon mian sangga'at baladosa', tantu kita Utus sala'mo.

²¹ Sahanyo bolimo okaan na ponoha' kabai monginum anggur, kabai mombau pa'apaa, de han aijo' monsaduakon samian na utus anu sa'a-sa'angu' na kapalesaya'an timbali baladosa'.

²² Ola ahi' apaa na anu nupalesaya nu kita Utus aijo', olamo ahi' kita Utus na mosi bau aijo' i ahop nu Tumpu. Mian anu madi' mongoa'i kasala'an apaa na anu nusangka totu'u, mian aijo' tantu bilahimo.

²³ Panyo mian anu mongoa'i bata-bata na mongkaan apa-apaa, padahan lapas mae nukaanmo ahi' na kaanon aijo', mian aijo' nuposala' nu Tumpu; kalana mian aijo' madi' montuluti apaa na anu nupalesaya pa' anu totu'u kabai anu madi' totu'u. Ka' mau mule' apaa na anu nubau de madi' okinyonyoai hondo-hondo aijo' ola timbali dosa'.