ROMA 12 - KITAB NU TUMPU ALLA LELE MA'IMAI'

Tumuu' bau kapentingan nu Tumpu

¹ To Utu-utus! Tumpu talalo ma'ima' hi kita. Mokonyo aijo' ku poita hondo-hondo na komiu monsombahkon butong miu sumo sa'angu' na panyombahan anu tumuu' ola sa'a-sa'angu'nyo hi Tumpu tiba mule' anu momposanang kinyonyoa-Nyo. Komiu monsombah hi Tumpu tionyo sumo aijo'.

² Boli mombatuki sonto' nu dunia aiya. Bee' da nupotimbali nu Tumpu na butongum timbali bu'ou, da komiu mongabali'. Tiba jalan aijo' yo komiu moko ala monsumbu' pongka'oho' nu Tumpu Allah – aijo'mo apaa na anu ma'ima' tiba anu momposanang kinyonyoa-Nyo ka' anu talakana'.

³ Tumpu nombee'imo balakat hi belengku. Mokonyo aijo' aku mompokinde'i to Utu-utus iwi-iwi': Boli mongoa'i butong lebe matangkas molingkuduimo anu sahondo-hondonyo. Ola ahi' butong miu na otutugi ka' boli kobubuun; toto samian montoa butongnyo iya na anu opoko ala obau anu binee'mo nu Tumpu hi ia, kalana ia pinalesayamo hi Yesus.

⁴ Butongto manjoo' na bagi-bagiannyo. Toto sambagian ko posi-posi gunanyo.

⁵ Sumo aitumo na kita. Mau mule' kita iwi-iwi' manjoo', panyo kita ola sumo sa'a-sa'angu'nyomo na butong, kalana kita nosa'angu'mo hi Kristus. Ka' kita toto samian nosa'angu'mo samian tiba samian susumo bagi-bagian nu sa'angu' na butong.

⁶ Kita toto samian daagi' ko balakat mombau apa-apaa madi' pokakana. Balakat haha aijo' binee' nu Tumpu hi kita samata-mata kalana kalibosan-Nyo. Mokonyo aitu tionyo ogunakonto na balakat haha aijo'. Mian anu ko balakat mompolele lele lengkat mae hi Tumpu, tionyo mompolele lele lengkat mae hi Tumpu Allah aijo' iya na anu nupoko ala.

⁷ Mian anu ko balakat montulungi mian sangga'at, tionyo totu-totu'u montulungi mian sangga'at. Mian anu ko balakat mompogulu', tionyo totu-totu'u mompogulu'.

⁸ Mian anu ko balakat mongkakeha'i mian sangga'at, tionyo totu-totu'u mongkakeha'i mian sangga'at. Mian anu ko balakat mombee'i mian sangga'at apaa na anu daagi' hi ia, tionyo obau na aijo' nu kinyonyoa manonong ka' pantas. Mian anu ko balakat mongatun, tionyo totu-totu'u mongatun. Mian anu ko balakat mompotoa kalibosan hi mian sangga'at, tionyo obau nu kinyonyoa sanang.

⁹ Kalibosi nu kinyonyoa sanang. Opimpali na anu ma'idek, ka' mintoong i anu ma'ima'.

¹⁰ Tionyo to Utu-utus mompaha kali-kalibosi samian ka' samian nu kinyonyoa ma'ima' sumo to mia-mian anu moto utus i sa'angu' na auwan, ka' opai-pai lio komiu mompaha tabe-tabea'i ihe na tongkoimoona montabea'i.

¹¹ Makeke na mokalaja. Boli moluluk. Mombau kalaja nu Tumpu o bika-bikasakon nu Roh nu Tumpu na mokalaja.

¹² Tionyo kita Utus saja' montaha'imani Tumpu ka' saja' lame', sabaanakon na kasusa'an, ka' saja' balado'a.

¹³ Otulungi ka' posukupakon na kapalaluan nu to mia-mian Kristen sangga'at, ka' olabot na to Utu-utus anu sangko agama, anu ma'isa osumbu'to nu kita Utus tiba kinyonyoa anu sanang i laigan beleyum.

¹⁴ Opoita hi Tumpu da nubalakati na to mia-mian anu buhingison hi komiu. Opaka poita hi Tumpu da mombalakati aha, boli montuda'i balaa'.

¹⁵ Suele lame' tiba to mia-mian anu lame'. Ka' humaang tiba mian anu humaang.

¹⁶ Tumuu' mompaha kano-kanonongi samian tiba samian. Boli montige-tige na kinyonyoa, panyo obau na butongum susumo mian anu madi' molabi na kantumuu'annyo. Boli mongoa'i butong lebe pande, padahan madi' pande.

¹⁷ De mian mombau idek hi beleyum, boli obalosi nu ka'idekan. Obau na anu o'oa'i ma'ima' hi mian iwi-iwi'.

¹⁸ Hi beleyum olio sabole-boleh na tumuu' dame tiba mian iwi-iwi'.

¹⁹ To Utu-utusku! Boli hondo-hondo mombalosi ka'idekan, bakas da Tumpuje na mohukum. Kalana i uno nu Kitab nu Tumpu tinulismo, “Akuje na mombalosi. Akuje na mohukum na koonyo nu Tumpu.”

²⁰ Ola ahi', de anu monsampo bali' beleyum mo'ohop, obee'i na ia mongkaan; ka' de ia megot obee'i na ia monginum. Kalana de mombau anu sumo aijo', kita Utus sumomo nompopo'ambangmo ia.

²¹ Boli mompojohok butongum nuhungku'i nu anu ma'idek, panyo kita Utus na tionyo mohungku'i ka'idekan nu ka'ima'an.