ROMA 10 - KITAB NU TUMPU ALLA LELE MA'IMAI'

¹ To Utu-utus! Ku indi hondo da bansangku o posalamat. Ka' aku totu-totu'u mondo'akon aha hi Tumpu.

² Aku baani na montaloakon aha makeke hondo na palesaya hi Tumpu. Panyo keke nu aha aijo' madi' mimpu'u i kapandean anu lengkat mae hi Tumpu.

³ Aha madi' monsumbu' jalannyo nu Tumpu mombau pompahasumbu'an nu mian, tiba Ia mompo'ule' ma'ima'. Ka' kalana aha ola mosi bau pongka'oho' nu aha, sahingga aha madi' tundu' i jalan anu nupotiju' nu Tumpu.

⁴ Atulan nu agama pinoko baumo i Kristus. Jadi batu-batu mian anu pinalesayamo hi Kristus, pompahasumbu'annyo tiba Tumpu mompo'ule'mo na'ima.

Kasalamatan bagi nu mian iwi-iwi'

⁵ I Musa nontulis tukoonyo mian anu mompo'ule' ma'ima' tiba Tumpu kalana mintoong i atulan nu agama, mian aijo' tumuu' kalana mohongo-hongo atulan nu agama aijo'.

⁶ Panyo mongkona jalannyo mian mompaha ima' tiba Tumpu, Kitab nu Tumpu nontaloakon sumo uuka, “Bolimo beleyum motatae i kinyonyoaum, ‘Ihe na saidi' mae moliba' i suluga?’ (alati'nyo momboa mae i Kristus mintau'),

⁷ kabai, ‘Ihe na saidi' mae mintau' mokaiyong i dunia nu mian mate?’ (alati'nyo mohangkat i Kristus lengkat i kapatean).”

⁸ Kahanda'nyo sumo uuka, “Lele lengkat hi Tumpu aijo' ohani hondo hi beleyum; i nganga'um tiba i kinyonyoaum.” Aijo'mo na lele anu oleleakon kami; lele tukoonyo tionyo mian palesaya.

⁹ Kalana de kita Utus mangaku nu nganga'um tukooyum “I Yesus aijo' Tumpu”, ka' kita Utus palesaya i kinyonyoaum tukooyum Tumpu mompotumuu'mo i Yesus anu sini-sinilakamo, saba' kita Utus o posalamat.

¹⁰ Kalana mian palesaya i kinyonyoanyo, sahingga Tumpu nontalima ia salaku mian anu nompaha ima'mo tiba Tumpu. Ka' mule' tiba nganga'nyo mian mangaku, sahingga ia o posalamat.

¹¹ I uno nu Kitab nu Tumpu tinulis, “Mian anu palesaya madi' mompele-pele'.”

¹² Aijo' kona hi mian iwi-iwi', kalana madi' o posi posangalasan mian nu Yahudi tiba to mia-mian bansa sangga'at. Tumpu anu sa'a-sa'angu'nyo, aijo'mo na Tumpu nu mian iwi-iwi'. Ia mombee'i balakatnyo molabih-labih hi iwi-iwi' na mian anu momoita tulung hi Ia.

¹³ I uno nu Kitab nu Tumpu tinulis, “Iwi-iwi' na mian anu momoita tulung hi Tumpu oposalamat.”

¹⁴ Panyo mosia na mian timbali momoita tulung hi Tumpu de aha ma'isa palesaya? Ka' mosia na aha timbali palesaya hi Tumpu de aha ma'isa nohongo pa' mosia na Ia aijo'? Sumo aitu mule' mosia na aha timbali mohongo mongkona Tumpu, de madi' ko anu monsisikakon?

¹⁵ Ka' mosia na mian timbali momboa lele aijo' de aha madi' opokau? I uno nu Kitab nu Tumpu tinulis sumo uuka, “Paya' na ko'ima'nyo na to mia-mian montalima Lele Ma'ima' lengkat hi Tumpu!”

¹⁶ Panyo madi' iwi-iwi' na mian montalima Lele Ma'ima aijo'. Kalana i Yesaya notataemo, “Kita Tumpu, ihe na palesaya i anu opolele kami?”

¹⁷ Mokonyo aijo' to mia-mian timbali palesaya kalana aha mohongo lele, ka' lele o hongo kalana daagi' ko mian anu mompolele pa' mosia na i Kristus anjo'.

¹⁸ Panyo kupokilawa: Pa' totu'u aha memang ma'isa nohongo lele aijo'? Tantu polo'mo! Kalana i uno nu Kitab nu Tumpu tinulis sumo uuka, “Potatae nu aha sinongkomo i dunia, sisi-sisik nu aha tinokamo i puus nu tano'.”

¹⁹ Po'ule' kupokilawa: Pa' bansa nu Israel ma'isa nonsumbu'? Bakas da anu opokilawa aijo' momoona montaami i Musa. I Musa notatae, “Sumo uuka na koo-Nyo nu Tumpu, ‘Kupotimbalije na komiu madi' sanang na kinyonyoa hi bansa sangga'at anu misa' mian anu palesayamo ka' Kupotimbalije na komiu motambuha' hi bansa anu ponga'.’ ”

²⁰ I Yesaya lebee binaani mule': Ia notatae, “Sumo uuka na koo-Nyo nu Tumpu, ‘To mia-mian anu madi' molio Aku, nonsingkabotimo Aku; ka' Aku nompotoamo butong-Ku hi aha anu madi' moleleki mongkona Aku.’ ”

²¹ Panyo mongkona bansa Israel, i Yesaya nontaloakon, “Sumo uuka na koo-Nyo nu Tumpu, ‘Sansina-sinaa Aku montajuakon limang-Ku hi sa'angu' na bansa anu panggaga ka' madi' mohongo-hongo.’ ”