PO'ULE' INGULIT 9 - KITAB NU TUMPU ALLA LELE MA'IMAI'

Aha bansa Israel madi' tulu-tulutan'

¹ “Potombihing mae to Utu-utus! Sinaa aiya belemiu motaapmo i Kaunyo Yordan da monjojoongimo da'erah nu to bansa-bansa anu lebe daka' ka' lebe mahoson molingkudui belemiu. To kota-kota nu aha anu toto daka-daka' tiba pagannyo mesen anu matangkas toka-toka i langit.

² Miannyo to daka-daka' ka' mahoson na butongnyo; aha aijo' raksasa, ka' i hongomo nu belemiu, madi' ko samian anu moko ala mongewa aha.

³ Panyo uuka aiya posi toaje nu belemiu mosia na Tumpu Allah nu belemiu lumajang momona lantas belemiu i mihi-mihije susumo apu anu mompapui. Ia na mompatundu' aha i ahop nu mata miu, sahingga belemiu moko ala molaa' ka' sangkinihap na monsilakai aha susumo anu jinanji'mo nu Tumpu.

^4-5 Noko laa' aha na Tumpu Allah nu belemiu, kalana monsangaja'i belemiu boli monsangka belemiu Nu boamo mokiijo' da mongalamo tano' aijo' kalana belemiu ma'ima' ka' nombaumo pongka'oho' nu Tumpu Allah miu, sahingga pantas na montalima. Totu-totu'u madi'! Tumpu nolaa'mo bansa haha aijo' kalana monsangaja'i belemiu, kalana aha ma'idek na gau'nyo. Tumpu nompobee'mo belemiu mongala tano' nu aha, kalana Ia ka'oho' mongganapi janji-Nyo hi mompolee' miu i Abraham, i Ishak ka' i Yakub.

⁶ Palesaya saba' Tumpu Allah nu belemiu madi'mo mombee' tano' anu ma'omuk aijo' hi belemiu kalana belemiu madi' pantas na mongala. Belemiu bansa anu panggaga.

⁷ Inau' mosia na belemiu nonsabapi Tumpu Allah nu belemiu pinusa i padang bola. Salatanmo pe'e belemiu nompala'imo mae Mesir sampe tinoka i aiya belemiu saja' pinanggaga hi Tumpu.

⁸ Ka' mule' i Bungkutnyo nu Sinai belemiu nonsabapimo Tumpu Allah da pinusa hondo sahingga Ia kino tanga'anmo monsilakai belemiu.

⁹ Aku nindakomo i bungkutnyo aijo' da montalima batu palajanjian anu binau nu Tumpu tiba belemiu. Kinopinnyo pinatompulu' na sinaa ka' pinatompulu' na pihi na aku jinojoong i bungkutnyo aijo' madi' nongkaan kabai nonginum.

¹⁰ Lapas aijo' Tumpu nombee'mo hi belengku ohua' na batu anu pinosi tulisan nu Tumpu Allah. I batu aijo' tinulis na potatae-Nyo anu tinaeakon lengkat mae i totonga' nu apu toka hi belemiu, tempo'nyo belemiu sinihukmo i tengke nu bungkutnyo.

¹¹ Noko lapas patompulu' na sinaa ka' patompulu' na pihi, Tumpu nombee'mo mae hi belengku ohua' na batu palajanjian aijo'.

¹² Lantas Tumpu notataemo hi belengku, ‘Pintatau'mo lia-lia', kalana bansa nu beleyum anu binoa mae nu beleyum nosabat lengkat mae i Mesir nombaumo anu ma'idek. Aha nolempangmo madi'mo nontuluti palentah-ngKu, ka' nombaumo patong da osombah.’

¹³ Tumpu notatae mule' hi belengku, ‘Ku sumbu' na bansa aijo' talalo hondo panggaga.

¹⁴ Boli soba-soba mongewa Aku. Ku silakaimo na aha, sahingga aha madi'mo daagi' o'inau'. Panyo beleyum Ku potimbalimo Tuuma nu sa'angu' na bansa anu lebe da'isan ka' lebe mahoson molingkudui aha.’

¹⁵ Lantas, aku nosiloimo ka' nomboamo ohu-ohua' na batu palajanjian aijo', tinoongku nu limangku, nintatau'mo na aku lengkat mae i bungkutnyo anu daagi hau-haunyo moak.

¹⁶ Tinoangku na belemiu nolangkasakonmo palentah nu Tumpu Allah nu belemiu. Belemiu binaladosa'mo hi Tumpu kalana nombaumo sa'angu' na patong sapi' logam na tinutuk.

¹⁷ Sahingga i ahop miu ohua' na batu palajanjian aijo' tinumpakonkumo ka' i hansunmo me toto sampuge.

¹⁸ Lantas daagi' minsan na aku dinumaladupu i ahop nu Tumpu aita' i bungkutnyo kinopinnyo pinatompulu' na sinaa ka' pinatompulu' na pihi, madi' nongkaan kabai nonginum. Aijo' binaungku kalana belemiu nombaumo dosa' hi Tumpu, kalana nombaumo apaa na anu moko pa'idek Ia sahingga Ia notambuha'mo.

¹⁹ Ku kabuhuk na tambuha' nu Tumpu anu tala-talalomo hondo hi belemiu sahingga belemiu kahanda'mo sinilakan-Nyo, panyo uuka aiya Tumpu daagi' nohongo aku.

²⁰ Tumpu notambuha'mo hondo suele hi Harun, sahingga kahanda'mo Nu patei, panyo aku nondo'akonmo ia.

²¹ Patong sapi' logam na tinutuk, i lumbu'akonku i apu. Lantas i hansunanku ka' inguja'ku sampe nahute susumo abu', ka' abu' aijo' i lumbu'akonku i sepe' anu ko ueenyo mo'ili mae lengkat i bungkutnyo aijo'.

²² Suele i Tabera, i Masa ka' i Kibrot-Taawa, belemiu nonsabapimo da Tumpu notambuha'.

²³ Lantas tempo'nyo belemiu sinaimo nu Tumpu nompala'i Kades-Barnea da mambamo ka' monjojoongi tano' anu Nu bee'mo hi belemiu, belemiu madi' mohongo-hongo Tumpu Allah nu belemiu; belemiu madi' mongka'oho' palesaya kabai tulu-tulutan hi Ia.

²⁴ Salatan pe'e aku nonsumbu'mo belemiu, belemiu saja' madi' mohongo-hongo Tumpu.

²⁵ Ku sumbu' na Tumpu kahanda'mo mompagala monsilakai belemiu. Sahingga kopinnyo pinatompulu' na sinaa ka' pinatompulu' na pihi, na aku dinumaladupu i ahop nu Tumpu

²⁶ ka' binalado'a sumo uuka: O Tumpu Anu Matangkas na kuasanyo, boli osilakai na mian anu kitamo Tumpu na tumpunyo aiya. Bansa anu pinobebasmo nu belento ka' i laya'mo mae nu belento nosabat mae lengkat i Mesir tiba kahosonan ka' kakuasaan Nu belento anu daka'.

²⁷ Inau'akon pe'e na to posa-posaihon nu Belento i Abraham, i Ishak ka' i Yakub, ka' boli mompalahatikan aha talalo hondo panggaga, ka'idekan ka' dosa' nu bansa aiya.

²⁸ De mian nu Belento o hopu'imo nu Belento, saba' mian nu aha Mesir motataeje tukoonyo nu aha Belento madi' moko ala momboa bansa nu Belento mokiijo' i lipu' anu jinanji'mo nu belento hi aha, ka' Belento nomboamo mae aha i padang bola, da opatei na aha, kalana belento nongka'idekimo aha.

²⁹ Panyo inau', Tumpu, saba' aha aiya bansa anu pinile'anmo nu Belento da timbalimo mian anu pinalesayamo hi Belento, ka' binoamo mae nu Belento lengkat i Mesir tiba kahosonan ka' kakuasa'an nu Belento anu daka'.”