PO'ULE' INGULIT 8 - KITAB NU TUMPU ALLA LELE MA'IMAI'

Tano' anu ma'ima' bau kajojoongan

¹ “Iwi-iwi' na atulan anu binee'kumo hi belemiu sinaa aiya tionyo ahi' obau miu ka' boli panggaga, da belemiu tataap tumuu', mompaka pintuang ka' manjoo'mo ka' jojoongmo i tano' anu jinanji'mo nu Tumpu hi mompolee' nu belemiu.

² O' inau'! Patompulu' na taun na kopinnyo Tumpu Allah miu nolaya'mo mae belemiu i uno nu lumambanan anu majo'on nontului mae padang bola. I uno nu lumambanan aijo' niat nu Tumpu Allah da monsobai belemiu, da Nu toa apaa na anu i uno nu kinyonyoa nu belemiu ka' apaa belemiu montuluti sagala palentah-Nyo.

³ Ia nompojohokmo belemiu da mo'ohop, lantas belemiu binee'an-Nyomo manna da okaan. Daagi' pe'e u'utu mae belemiu ka' mompolee' miu ma'isa toho' nongkaan kaanon aijo'. Tumpu nombau sumo aitu da mongajan belemiu kalana manusia madi' tumuu' de ola kalana anu okaan, panyo maumo pa' apaa na anu nutaeakon nu Tumpu timbali bau kantumuu'an.

⁴ Kopinnyo patompulu' na taun pihude miu madi' maluso ka' tengke miu madi' ahi' bangkak.

⁵ O inau' ahi' kalana Tumpu Allah nu belemiu nongajanmo belemiu susumo samian na tuuma nongajanmo to ana-anaknyo.

⁶ Jadi, baumo iwi-iwi' apaa na anu pinalentahkonmo nu Tumpu Allah nu belemiu. Tumuu' ka' tuluti na atulannyo iwi-iwi' ka' o adati na Ia.

⁷ Tumpu Allah nu belemiu nomboamo belemiu i lipu' anu ma'omuk; lipu' anu manjoo' na kau'nyo ka' matanyo nu uee, ka' mabohos mae na soloknyo lengkat i uno nu tano' monguwei to bangka-bangka'nyo ka' to puge-puge'nyo.

⁸ Lipu' aijo' hasinnyo lupa-lupa na gandum, anggur, bua'nyo nu ara, bua' nu dalima, kau' zaitun ka' juu' nu uani'.

⁹ Ikiijo' mae belemiu madi'mo mo'ohop kabai kakulangan. Batu gahanggan ko galo'nyo besak, ka' puge-puge'nyo haha aijo' timbali pongkekean miu tambaga.

¹⁰ Belemiu mongkaan sampe ma'osa ka' mompoita talima kaseh hi Tumpu Allah nu belemiu kalana tano' anu ma'omuk anu binee'-Nyomo hi belemiu.”

Pokinde' da boli okolilimi na Tumpu

¹¹ “Ojagai ima-ima' boli saidi' mae belemiu mongkolilimimo Tumpu Allah nu belemiu; boli okolilimi maumo pe'e ola sa'angu' na atulan-Nyo aijo' anu binee'kumo hi belemiu sinaa aiya.

¹² De belemiu nongkaanmo sampe na'osamo ka' nombaumo to lai-laigan anu ma'ima' bau kajojoongan nu belemiu,

¹³ ka' de nintuangmo na sapi', ka' mee' ka' domba nu belemiu, salaka ka' mosoni' miu ka' iwi-iwi' na halata' nu belemiu sangga'at.

¹⁴ Ojaga ima-ima' da belemiu boli kobubuun ka' mongkolilimimo Tumpu Allah nu belemiu anu mompobebasmo belemiu lengkat mae i Mesir tampat nu belemiu binotuanan.

¹⁵ Tumpu nolaya' mae belemiu nongkua mae padang bola anu ewa ka' okabuhuk, ka' manjoo' na ulo anu ko bisa'nyo ka' ko beyua'nyo. I tano' anu mapeges madi' ko ueenyo Ia nompodaagi' uee mo'ili ka' i lubat mae i batu, da belemiu monginum singko-singko ma'osa.

¹⁶ I padang bola Ia nombee'i manna da okaan nu belemiu, kaanon anu ma'isa nusumbu' nu mompolee' miu. Tumpu nompodaagi' aijo' da monsobai belemiu da momposanang kinyonyoa miu, da i mihinyo mae Ia timbali mombau anu ma'ima' hi belemiu.

¹⁷ Jadi boli hondo-hondo bapikin kalana usaha ka' kahosonan nu belemiu sahingga kinayamo na belemiu.

¹⁸ O' inau' kalana Tumpu Allah nu belemiu na anu mombee'i kakaya'an aijo' hi belemiu.

¹⁹ Boli okolilimi na Tumpu Allah nu belemiu ka' boli palesaya hi to pilo-pilogot sangga'at ka' opuji' montuluti aha. Sinaa aiya aku mompotuka'mo belemiu kalana de belemiu mombau mule', belemiu tionyo ahi' nusilakaimo nu Tumpu.

²⁰ De belemiu madi' tulu-tulutan hi Tumpu Allah nu belemiu suele Nu silakaimo susumo bansa-bansa anu i hopu'an-Nyomo i ahop nu mata miu.”